LPG Cylinder Shortage: ઇઝરાયલ અને ઈરાન વચ્ચે ચાલતા યુદ્ધમાં અમેરિકાએ ઘી હોમતા વિશ્વભરમં સ્થિતિ તંગ બની છે. બીજી તરફ પાકિસ્તાન અને અફઘાનીસ્તાન પણ સામસામે આવી ગયા છે. આ પરિસ્થિતિને કારણે દુનિયાભરમાં ઓઈલ અને ગેસ સેક્ટર પર માઠી અસર પડી છે. ભારતમાં પણ એલપીજી ગેસની અછતને લઈને ચિંતામાં સતત વધારો થઈ રહ્યો છે. જેને કારણે ગુજરાત પણ એક પ્રકારે ગેસ અને ઓઈલ સેક્ટરમાં સંકટ તોળાઈ રહ્યું છે. ત્યારે રાજ્યના ઉર્જામંત્રી ઋષિકેશ પટેલનું ગેસ સંકટ અંગે મોટું નિવેદન સામે આવ્યું છે.
કેન્દ્ર સરકારે ઘરેલું LPG સિલિન્ડરના રિફિલ બુકિંગના નિયમોમાં ફેરફાર કર્યો
હવે ગ્રાહકો એક સિલિન્ડર બુક કર્યા પછી બીજો સિલિન્ડર 21 દિવસને બદલે 25 દિવસ પછી જ બુક કરી શકશે
રાજ્યમાં ગેસના પુરવઠા અંગે ઉર્જા અને પેટ્રો કેમિકલ મંત્રી ઋષિકેશ પટેલનું મોટું નિવેદન
દેશભરમાં એલપીજી ગેસની અછતને લઈને ચિંતા વધતી જોવા મળી રહી છે. ઈરાન અને અમેરિકા વચ્ચે વધેલા તણાવની અસર હવે ભારતના ગેસ પુરવઠા પર પણ જોવા મળી રહી છે. અનેક શહેરોમાં હોટલ અને રેસ્ટોરન્ટ ઉદ્યોગ પર સંકટ ઊભું થયું છે. આવી સ્થિતિમાં ગુજરાત સરકાર તરફથી મહત્વપૂર્ણ નિવેદન આવ્યું છે. રાજ્યના ઉર્જા અને પેટ્રોકેમિકલ મંત્રી ઋષિકેશ પટેલે સ્પષ્ટ કર્યું છે કે ગુજરાતમાં એકપણ ઘરમાં ચૂલો બંધ ન થાય તેની સંપૂર્ણ કાળજી સરકાર લઈ રહી છે.
મંત્રી ઋષિકેશ પટેલના જણાવ્યા મુજબ રાજ્યમાં ઘરેલું ગેસ પુરવઠાને સર્વોચ્ચ પ્રાથમિકતા આપવામાં આવી રહી છે. આ માટે ઔદ્યોગિક ગેસના ઉપયોગમાં 50 ટકા સુધી કાપ મૂકવામાં આવ્યો છે. ઉપરાંત ખાતર બનાવતી કંપનીઓ અને દૂધની ડેરીઓમાં વપરાતા ગેસમાં પણ લગભગ 40 ટકા ઘટાડો કરવામાં આવ્યો છે. સરકારનું મુખ્ય લક્ષ્ય એ છે કે રાજ્યના દરેક ઘરમાં ગેસ સિલિન્ડર સરળતાથી ઉપલબ્ધ રહે.
આ વચ્ચે કેન્દ્ર સરકારે પણ ગેસ પુરવઠા અંગે મહત્વનો નિર્ણય લીધો છે. હવે ઘરેલું LPG સિલિન્ડરના રિફિલ બુકિંગના નિયમોમાં ફેરફાર કરવામાં આવ્યો છે. અગાઉ ગ્રાહકો એક સિલિન્ડર પછી 21 દિવસમાં બીજો સિલિન્ડર બુક કરી શકતા હતા, જ્યારે હવે આ સમયગાળો વધારીને 25 દિવસ કરવામાં આવ્યો છે. એટલે કે હવે બીજો સિલિન્ડર 25 દિવસ બાદ જ બુક કરી શકાશે.
ગેસ સંકટની અસર હોટલ અને ફૂડ ઇન્ડસ્ટ્રી પર પણ જોવા મળી રહી છે. બેંગલુરુ સહિત કેટલાક શહેરોમાં કોમર્શિયલ ગેસ સપ્લાયમાં અચાનક ઘટાડો થતા હોટલ એસોસિએશને હોટલો બંધ કરવાની ચેતવણી આપી છે. ઓઈલ કંપનીઓએ નોન-ડોમેસ્ટિક LPGનો પુરવઠો હાલ માટે સ્થગિત કરવાની સૂચના આપી છે.
ગુજરાતના સાણંદ GIDCમાં પણ ગેસ સપ્લાય અંગે ઉદ્યોગકારો અને અધિકારીઓ વચ્ચે બેઠક યોજાઈ હતી. ગેસ પુરવઠામાં ઘટાડો થવાથી ઓટોમોબાઈલ સપ્લાય ચેઇન અને હજારો મજૂરોના રોજગાર પર અસર થવાની ભીતિ વ્યક્ત કરવામાં આવી છે. તેમ છતાં સરકાર અને ગેસ કંપનીઓ સ્થિતિ સામાન્ય કરવા માટે પ્રયાસ કરી રહી હોવાનું જણાવાયું છે.
