Gujarat STD.10-12 Board Exam: ગુજરાત માધ્યમિક અને ઉચ્ચતર માધ્યમિક શિક્ષણ બોર્ડે વિદ્યાર્થીઓની ધૂળેટી પર પાણી ફેરવ્યું છે. હકીકતમાં બોર્ડ દ્વારા ધોરણ 10-12 ની બોર્ડની પરીક્ષાનું ટાઈમટેબલ જાહેર કરવામાં આવ્યું છે. શિક્ષણ બોર્ડે 4 માર્ચે એટલે કે ધૂળેટીના દિવસે જ પેપર રાખ્યું છે. પરીક્ષાના આ યોજનથી વાલી અને વિદ્યાર્થીઓ મૂંઝવણમાં મૂકાયા છે.
જાહેર રજાના દિવસે ધો.10-12ની પરીક્ષા
ગુજરાત શિક્ષણ બોર્ડ દ્વારા ગત 11 નવેમ્બર, 2025 ના રોજ SSC ધોરણ 10 અને HSC 12 ની મુખ્ય બોર્ડ પરીક્ષાના ટાઈમ ટેબલની જાહેરાત કરી હતી. બોર્ડ સમયપત્રક મુજબ, 4 માર્ચ, 2026ના રોજ ધોરણ 12 સામાન્ય પ્રવાહનું નામાના મૂળતત્ત્વો, સાયન્સ પ્રવાહનું જીવવિજ્ઞાન અને ધોરણ 10 નું સામાજિક વિજ્ઞાનના પેપરનું આયોજન કરવામાં આવ્યું છે.
જ્યારે ગુજરાત સરકારના સામાન્ય વહીવટ વિભાગ દ્વારા 27 નવેમ્બરના રોજ વર્ષ 2026ની સત્તાવાર જાહેર રજાઓની યાદી જાહેર કરાઈ હતી. જેમાં 4 માર્ચ, 2026ના રોજ હોળી-ધૂળેટીની જાહેર રજા છે. જોકે, શિક્ષણ બોર્ડે જાહેર રજાના દિવસે પરીક્ષાનું આયોજન કરતાં શિક્ષણ બોર્ડનો અણઘડ વહીવટ કર્યો હોવાનું સામે આવ્યું છે. જાહેર રજાના દિવસે બોર્ડની ધોરણ 10-12ની પરીક્ષાનું આયોજન કરાયું છે, ત્યારે વિદ્યાર્થી અને વાલી મૂંઝવણમાં મૂકાયા છે. 
