ભારતના કરોડો અન્નદાતાઓ માટે ફેબ્રુઆરી મહિનો ખુશીઓની ભેટ લઈને આવી શકે છે. પ્રધાનમંત્રી કિસાન સન્માન નિધિ (PM-KISAN) યોજનાના આગામી 22મા હપ્તાની રાહ જોઈ રહેલા ખેડૂતો માટે મહત્વના અપડેટ્સ સામે આવ્યા છે. વર્ષ 2026ના કેન્દ્રીય બજેટ પહેલા અથવા બજેટ સત્ર દરમિયાન સરકાર ખેડૂતોના ખાતામાં રૂ.2,000નો હપ્તો જમા કરાવી શકે છે. એટલું જ નહીં, આ વખતે બજેટમાં વાર્ષિક સહાયની રકમમાં વધારો થવાની પણ પ્રબળ શક્યતા સેવાઈ રહી છે.
કેન્દ્ર સરકારની આ યોજના અત્યાર સુધી ખેડૂતો માટે આર્થિક કરોડરજ્જુ સાબિત થઈ છે. અત્યાર સુધીમાં 21 હપ્તા સફળતાપૂર્વક ખેડૂતોના ખાતામાં પહોંચ્યા છે, ત્યારે હવે 22મા હપ્તાને લઈને ખેડૂતોમાં ભારે ઉત્સાહ જોવા મળી રહ્યો છે. જોકે, આ લાભ મેળવવા માટે સરકારે કેટલાક નવા નિયમો અને વેરિફિકેશન પ્રક્રિયા ફરજિયાત બનાવી છે, જેની જાણકારી દરેક ખેડૂત માટે અનિવાર્ય છે.
1. ક્યારે આવશે 22મો હપ્તો? જાણો સંભવિત તારીખ
સામાન્ય રીતે PM કિસાન યોજનાનો હપ્તો દર ચાર મહિને જારી કરવામાં આવે છે. છેલ્લો 21મો હપ્તો નવેમ્બર 2025માં જારી કરવામાં આવ્યો હતો. ગત વર્ષના ટ્રેન્ડ અને મીડિયા રિપોર્ટ્સ મુજબ, 8 ફેબ્રુઆરીથી 24 ફેબ્રુઆરી વચ્ચે સરકાર 22મો હપ્તો જારી કરી શકે છે. 1 ફેબ્રુઆરીએ રજૂ થનારા બજેટ બાદ તરત જ ખેડૂતોને આ આર્થિક ભેટ મળી શકે છે.
2. બજેટ 2026: શું રૂ.6,000 થી વધીને રૂ.9,000 થશે સહાય?
ખેતીના વધતા ખર્ચને ધ્યાનમાં રાખીને ખેડૂત સંગઠનો લાંબા સમયથી સહાયની રકમ વધારવાની માંગ કરી રહ્યા છે. અટકળો છે કે નાણામંત્રી નિર્મલા સીતારમણ આ બજેટમાં વાર્ષિક સહાય રૂ.6,000 થી વધારીને રૂ.8,000 અથવા રૂ.9,000 કરવાની જાહેરાત કરી શકે છે. જો આવું થશે, તો ખેડૂતોને દર ચાર મહિને રૂ.2,000ના બદલે રૂ.3,000 નો હપ્તો મળી શકે છે.
3. e-KYC અને 'ફાર્મર આઈડી' (Farmer ID) હવે ફરજિયાત
જો તમે હજુ સુધી e-KYC પ્રક્રિયા પૂર્ણ નથી કરી, તો તમારો હપ્તો અટકી શકે છે. આ ઉપરાંત, હવે સરકાર યુનિક ફાર્મર આઈડી (11 અંકનો નંબર) પણ ફરજિયાત બનાવી રહી છે.
e-KYC કેવી રીતે કરવું? ખેડૂતો pmkisan.gov.in પર જઈને OTP દ્વારા અથવા નજીકના CSC સેન્ટર પર જઈને બાયોમેટ્રિક દ્વારા આ પ્રક્રિયા કરી શકે છે.
ફેસ ઓથેન્ટિકેશન: PM Kisan એપ દ્વારા ચહેરો સ્કેન કરીને પણ સરળતાથી KYC થઈ શકે છે.
4. ગુજરાતના ખેડૂતો માટે 'ફાર્મર રજીસ્ટ્રી' (Farmer Registry)
ગુજરાત ખેતી નિયામકની કચેરી દ્વારા રાજ્યના ખેડૂતોને તાકીદ કરવામાં આવી છે કે તેઓ તાત્કાલિક ફાર્મર રજીસ્ટ્રેશન કરાવી લે. આ માટે ખેડૂતો જાતે gjfr.agristack.gov.in પોર્ટલ પર જઈને અથવા ગ્રામ પંચાયતમાં VCE મારફતે નોંધણી કરાવી શકે છે. જે ખેડૂતોની નોંધણી બાકી હશે તેમને 22મા હપ્તામાં મુશ્કેલી પડી શકે છે.
5. જો હપ્તો ન આવે તો ક્યાં સંપર્ક કરવો?
ઘણીવાર ટેકનિકલ ખામી અથવા આધાર લિંકિંગના અભાવે પૈસા અટકી જતા હોય છે. આવા સમયે ખેડૂતો નીચેના હેલ્પલાઇન નંબર પર મદદ માંગી શકે છે:
પીએમ કિસાન હેલ્પલાઇન: 155261 / 1800115526
લેન્ડલાઇન નંબર: 011-23381092
ઈમેલ આઈડી: [email protected]
