સોના અને ચાંદીના બજારમાં છેલ્લા કેટલાક દિવસોથી ભારે ઉથલપાથલ જોવા મળી રહી છે. વૈશ્વિક આર્થિક અનિશ્ચિતતા, મધ્ય પૂર્વમાં વધતા તણાવ અને આંતરરાષ્ટ્રીય કોમોડિટી માર્કેટમાં થયેલા ફેરફારોની અસર હવે ભારતીય બજારમાં પણ સ્પષ્ટ દેખાઈ રહી છે. મલ્ટી કોમોડિટી એક્સચેન્જ (MCX) સહિત ઘરેલું બજારમાં સોના અને ચાંદીના ભાવમાં નોંધપાત્ર ઘટાડો નોંધાયો છે. ખાસ કરીને ચાંદીના ભાવમાં થયેલો ઘટાડો રોકાણકારો માટે ચિંતાનો વિષય બન્યો છે, જ્યારે જ્વેલરી ખરીદવાની તૈયારી કરી રહેલા લોકો માટે આ રાહતના સમાચાર ગણાઈ રહ્યા છે.
ચાંદીના ભાવમાં સતત ઘટાડો
ચાંદીમાં સૌથી મોટો ઘટાડો જોવા મળ્યો છે. MCX પર 3 જુલાઈ એક્સપાયરી વાળા ચાંદીના વાયદા ભાવમાં છેલ્લા સપ્તાહ દરમિયાન સતત દબાણ રહ્યું હતું. ગત સપ્તાહના અંતે થોડો સુધારો જોવા મળ્યો હોવા છતાં સમગ્ર અઠવાડિયું ઘટાડાની દિશામાં રહ્યું.
આંકડાઓ મુજબ 5 જૂનના રોજ ચાંદીનો ભાવ રૂ. 2,48,537 પ્રતિ કિલો પર બંધ થયો હતો. ત્યારબાદ શુક્રવાર સુધીમાં તે ઘટીને રૂ. 2,46,604 પ્રતિ કિલો સુધી પહોંચી ગયો. એટલે કે માત્ર એક સપ્તાહમાં પ્રતિ કિલો રૂ. 1,933નો ઘટાડો નોંધાયો.
પરંતુ વધુ ચોંકાવનારી વાત એ છે કે જૂન મહિનાની શરૂઆતથી અત્યાર સુધીમાં ચાંદીના ભાવમાં રૂ. 20,000થી વધુનો ઘટાડો થઈ ચૂક્યો છે. મે મહિનાના અંતિમ ટ્રેડિંગ સેશનમાં ચાંદી રૂ. 2,66,998 પ્રતિ કિલો પર હતી, જ્યારે હાલમાં તેનો ભાવ રૂ. 2,46,604 સુધી આવી ગયો છે. એટલે કે માત્ર 10 દિવસમાં જ ચાંદી રૂ. 20,394 પ્રતિ કિલો સસ્તી થઈ ગઈ છે.
આ પણ વાંચો: મોંઘવારીના સમયમાં સુરક્ષિત રોકાણ માટે પોસ્ટ ઓફિસની 5 લોકપ્રિય સ્કીમ : જાણો ક્યાં મળે છે વધુ વ્યાજ
ઓલ-ટાઈમ હાઈથી લાખો રૂપિયાનો ઘટાડો
વર્ષની શરૂઆતમાં ચાંદી સતત નવી ઊંચાઈઓ સર કરી રહી હતી. જાન્યુઆરી મહિનામાં ચાંદીએ પ્રથમ વખત રૂ. 4 લાખનો આંકડો પાર કરીને રૂ. 4,57,328 પ્રતિ કિલોનો ઐતિહાસિક રેકોર્ડ બનાવ્યો હતો. પરંતુ હાલના ભાવની તુલનામાં જોઈએ તો ચાંદી તેના સર્વોચ્ચ સ્તરથી રૂ. 2,10,724 પ્રતિ કિલો સસ્તી થઈ ગઈ છે.
આટલો મોટો ઘટાડો કોમોડિટી માર્કેટમાં અસાધારણ માનવામાં આવે છે. નિષ્ણાતોનું કહેવું છે કે ચાંદીમાં છેલ્લા કેટલાક મહિનાઓ દરમિયાન થયેલા તેજ ઉછાળા બાદ હવે પ્રોફિટ બુકિંગ અને વૈશ્વિક માંગમાં નરમાઈના કારણે સુધારો જોવા મળી રહ્યો છે.
આ પણ વાંચો: ફિટમેન્ટ ફેક્ટર અંગે કેન્દ્ર સરકારના કર્મચારીઓ માટે ઝટકો? : 8 મા પગાર પંચને લઈ મોટો પ્લાન
સોનાની ચમક પણ પડી ફીકી
ચાંદીની જેમ સોનાના ભાવમાં પણ છેલ્લા દિવસોમાં ભારે ઘટાડો નોંધાયો છે. MCX પર 5 ઓગસ્ટ એક્સપાયરી વાળું 24 કેરેટ સોનાનું વાયદા કરાર છેલ્લા પાંચ દિવસમાં નોંધપાત્ર રીતે તૂટ્યું છે. 5 જૂનના રોજ 10 ગ્રામ સોનાનો ભાવ રૂ. 1,55,594 હતો, જે શુક્રવાર સુધીમાં ઘટીને રૂ. 1,50,675 પર આવી ગયો. એટલે કે માત્ર પાંચ દિવસમાં જ 10 ગ્રામ સોનામાં રૂ. 4,919નો ઘટાડો થયો છે. જો છેલ્લા 10 દિવસની વાત કરીએ તો ઘટાડો વધુ મોટો છે. 29 મેના રોજ સોનાનો ભાવ રૂ. 1,60,911 હતો. હાલ તે રૂ. 1,50,675 પર આવી જતાં 10 દિવસમાં રૂ. 10,236નો ઘટાડો નોંધાયો છે.
રેકોર્ડ સ્તરથી 53 હજાર રૂપિયા સસ્તું સોનું
સોનાએ પણ આ વર્ષે જાન્યુઆરીમાં ઐતિહાસિક ઊંચાઈ હાંસલ કરી હતી. તે સમયે MCX પર 10 ગ્રામ સોનાનો ભાવ રૂ. 2,04,375 સુધી પહોંચી ગયો હતો. હાલના ભાવ સાથે તેની સરખામણી કરવામાં આવે તો સોનું રૂ. 53,700 જેટલું સસ્તું થઈ ગયું છે.
આ ઘટાડાએ ટૂંકા ગાળાના રોકાણકારોને ઝટકો આપ્યો છે, પરંતુ લાંબા ગાળાના ખરીદદારો માટે આ તક બની શકે છે. ખાસ કરીને લગ્નસરા અને તહેવારોની સિઝન પહેલાં કિંમતી ધાતુઓમાં આવેલી નરમાઈથી ગ્રાહકોને ફાયદો થઈ શકે છે.
