Gmail : ડિજિટલ યુગમાં સ્માર્ટફોન વાપરતા દરેક વ્યક્તિ માટે Gmail એકાઉન્ટ અનિવાર્ય છે. એન્ડ્રોઇડ ફોન હોય કે, ઓફિસનું કામ, Gmail વગર બધું જ અધૂરું છે. અત્યારે માર્કેટમાં Jio અને Airtel જેવી ટેલિકોમ કંપનીઓ પોતાના ગ્રાહકોને આકર્ષવા માટે રિચાર્જ પ્લાન સાથે 1TB કે 2TB સુધીનું 'Google One' સ્ટોરેજ ફ્રી આપી રહી છે. જોકે, આ લલચામણી ઓફર ભવિષ્યમાં તમારા માટે મોટી મુસીબત બની શકે છે અને તમારા Gmail એકાઉન્ટને ડિસેબલ કરી શકે છે.
ગૂગલની સ્ટોરેજ સિસ્ટમ અને મર્યાદા
ગૂગલની ઇકોસિસ્ટમમાં Gmail, Google Drive અને Google Photos આ ત્રણેય સેવાઓ એક જ સ્ટોરેજ શેર કરે છે. સામાન્ય રીતે દરેક યુઝરને 15GB ફ્રી સ્પેસ મળે છે. આ સ્પેસમાં તમારા ઇમેઇલ્સ, ડ્રાઇવમાં સેવ કરેલા ડોક્યુમેન્ટ્સ અને હાઇ-ક્વોલિટી ફોટાઓનો સમાવેશ થાય છે. જ્યારે આ 15GB ની મર્યાદા પૂરી થાય છે, ત્યારે તમારી સેવાઓ પ્રભાવિત થાય છે.
ટેલિકોમ કંપનીઓની ફ્રી ઓફરની માયાજાળ
Jio અને Airtel જેવી કંપનીઓ પ્રીમિયમ પ્લાન્સ સાથે 6 મહિનાથી લઈને 18 મહિના સુધી 1TB કે તેથી વધુ સ્ટોરેજ બિલકુલ ફ્રી આપે છે. યુઝર્સ આ મોટી સ્પેસ જોઈને પોતાના ફોનના તમામ ફોટા, વીડિયો અને જૂનો ડેટા ક્લાઉડ પર અપલોડ કરી દે છે. સમસ્યા ત્યારે સર્જાય છે, જ્યારે આ ફ્રી ઓફરનો સમયગાળો પૂર્ણ થાય છે. સમય પૂરો થતાં જ ગૂગલ તમારી પાસે સબસ્ક્રિપ્શન ચાર્જની માંગણી કરે છે, જે સામાન્ય યુઝર માટે મોંઘો સાબિત થઈ શકે છે.
એકાઉન્ટ બંધ થવાનું જોખમ અને પ્રક્રિયા
જો તમે સબસ્ક્રિપ્શન ન ખરીદો, તો તમારું સ્ટોરેજ ફરીથી 15GB ની જૂની મર્યાદા પર આવી જાય છે. જો તમે પહેલેથી જ 1TB ડેટા ભરી દીધો હોય, તો તમારું એકાઉન્ટ 'Over Quota' બતાવશે. આવી સ્થિતિમાં સૌથી મોટું નુકસાન એ થાય છે કે, તમારા જીમેઇલ પર નવા ઇમેઇલ આવવાનું બંધ થઈ જાય છે. એટલું જ નહીં, તમે ગૂગલ ડ્રાઇવ પર નવી ફાઇલ અપલોડ નથી કરી શકતા કે, ફોટાનો બેકઅપ નથી લઈ શકતા. લાંબા સમય સુધી એકાઉન્ટ ઓવર ક્વોટા રહે તો ગૂગલ તમારો ડેટા ડિલીટ પણ કરી શકે છે.
ઓટો બેકઅપની ભૂલ અને તેના ગેરફાયદા
મોટાભાગના યુઝર્સના ફોનમાં ગૂગલ ફોટોઝનું 'Auto Backup' ઓન હોય છે. આ ફીચરને કારણે વ્હોટ્સએપના ફાલતુ વીડિયો અને ફોટા પણ સીધા ગૂગલ સર્વર પર સેવ થઈ જાય છે. Jio અને Airtel ની ફ્રી ઓફર દરમિયાન આ ડેટા ઝડપથી ભરાય છે. જ્યારે ફ્રી ઓફર પૂરી થાય ત્યારે સેંકડો GB ડેટાને ડિલીટ કરવો કે મેનેજ કરવો એ ટેકનિકલ રીતે ખૂબ જ કંટાળાજનક અને અઘરું કામ બની જાય છે.
બચવાના ઉપાયો અને ડેટા મેનેજમેન્ટ
આ મુસીબતથી બચવા માટે કેટલીક બાબતો ખાસ ધ્યાનમાં રાખવી જોઈએ. સૌપ્રથમ, ફોટોઝમાં જઈને ઓટો બેકઅપ બંધ કરો અને માત્ર જરૂરી હોય તેવા જ ફોટા મેન્યુઅલી અપલોડ કરો. ક્લાઉડ સ્ટોરેજનો ઉપયોગ માત્ર મહત્વના બેંકિંગ ડોક્યુમેન્ટ્સ અને પ્રોફેશનલ ફાઇલો સાચવવા માટે જ કરો. જો તમે કોઈ ફ્રી સ્કીમ લીધી હોય, તો તેનો સમય પૂરો થાય તે પહેલા વધારાનો ડેટા કોઈ હાર્ડ ડ્રાઇવ કે પેનડ્રાઇવમાં ટ્રાન્સફર કરી લેવો હિતાવહ છે.
