અમદાવાદના ઘાટલોડિયા વિસ્તાર અને ગોતા વોર્ડમાં આવેલા આકાંક્ષા એપાર્ટમેન્ટમાં ઝાડા અને ઊલટીના કેસોમાં નોંધપાત્ર વધારો થતાં આરોગ્ય ચિંતાઓ ઊભી થઈ છે. સ્થાનિક રહીશોના જણાવ્યા મુજબ છેલ્લા કેટલાક દિવસોથી પીવાનું પાણી અને ગટરનું પાણી મિક્સની શંકા વચ્ચે મોટી સંખ્યામાં લોકો બીમાર પડ્યા છે. એકસાથે મોટી સંખ્યામાં ઝાડા-ઊલટીના કેસો સામે આવતા સોસાયટીના રહીશોમાં ભારે રોષ ફેલાયો છે અને તંત્રની કામગીરી સામે સવાલો ઉઠી રહ્યા છે.
મળતી માહિતી મુજબ શુક્રવારથી આકાંક્ષા એપાર્ટમેન્ટમાં રહેવાસીઓમાં ઝાડા, ઊલટી અને પેટ સંબંધિત તકલીફોના કેસો વધવા લાગ્યા હતા. સ્થાનિકોનો આક્ષેપ છે કે મ્યુનિસિપલ કોર્પોરેશનના પીવાના પાણીમાં ગટરનું પાણી ભળતા આ સ્થિતિ સર્જાઈ છે. તેના કારણે અનેક પરિવારો પ્રભાવિત થયા છે અને રોજિંદું જીવન પણ ખોરવાઈ ગયું છે.
આ પણ વાંચો: જૂનાગઢનું ભવનાથ મંદિર ફરી આવ્યું વિવાદમાં : સાધુઓની હકાલપટ્ટીથી લઈને વહીવટી બેદરકારી સુધી ઉછ્યા અનેક સવાલો
500 લોકો બીમાર હોવાનો દાવો
સોસાયટીના રહીશોના જણાવ્યા મુજબ અંદાજે 500 જેટલા લોકો ઝાડા-ઊલટીની સમસ્યાથી પીડાઈ રહ્યા છે. જોકે આ આંકડાની સત્તાવાર પુષ્ટિ હજુ સુધી થઈ નથી, પરંતુ સ્થાનિકોનું કહેવું છે કે લગભગ દરેક બ્લોકમાં બીમારીના કેસો જોવા મળી રહ્યા છે. કેટલાક પરિવારોમાં એકથી વધુ સભ્યો પણ બીમાર થયા હોવાનું જણાવવામાં આવ્યું છે.
રહિશોનું કહેવું છે કે છેલ્લા ચાર દિવસથી સ્થિતિ ગંભીર બની રહી છે, છતાં હજુ સુધી પૂરતી અને અસરકારક કાર્યવાહી જોવા મળી નથી. લોકોમાં સૌથી વધુ નારાજગી એ બાબતને લઈને છે કે આરોગ્ય અને નાગરિક તંત્રના જવાબદાર અધિકારીઓ અથવા સ્થાનિક જનપ્રતિનિધિઓ સમયસર સ્થળ પર પહોંચ્યા નથી.
આ પણ વાંચો: વડોદરામાં કાળજું કંપાવતો અકસ્માત : કારચાલક વૃદ્ધ મહિલાએ એક્ટિવા સવાર ભાઈ-બહેનને 50 ફૂટ સુધી ઢસડ્યા
બહારથી પાણી મંગાવવાની ફરજ
આરોગ્ય સંકટ વચ્ચે રહીશોને પીવાના શુદ્ધ પાણી માટે બહારના સ્ત્રોતો પર નિર્ભર રહેવું પડી રહ્યું છે. સ્થાનિકોના જણાવ્યા મુજબ સોસાયટીમાં આવતું પાણી ઉપયોગ માટે સુરક્ષિત ન હોવાનું માનતા ઘણા પરિવારો પાણીના કેન અને બાટલા ખરીદીને ઉપયોગ કરી રહ્યા છે. જેના કારણે લોકોને વધારાનો આર્થિક બોજ પણ સહન કરવો પડી રહ્યો છે.
રહિશોનું કહેવું છે કે જો પાણી પુરવઠામાં ખરેખર દૂષિતતા આવી હોય તો તેની તાત્કાલિક તપાસ કરીને કારણ શોધવું જરૂરી છે. સાથે જ અસરગ્રસ્ત લોકોને સમયસર સારવાર અને સુરક્ષિત પાણી ઉપલબ્ધ કરાવવાની પણ માંગ ઉઠી રહી છે.
આરોગ્ય વિભાગની કામગીરી પર નજર
સ્થિતિને ધ્યાનમાં રાખીને મેડિકલ ટીમ દ્વારા અસરગ્રસ્ત રહીશોની તપાસ શરૂ કરવામાં આવી હોવાનું જાણવા મળ્યું છે. આરોગ્ય અધિકારીઓ દ્વારા દર્દીઓના લક્ષણો, પાણીના નમૂનાઓ અને સંભવિત કારણોની તપાસ કરવામાં આવી રહી છે. તપાસના અહેવાલ બાદ જ રોગચાળાનું ચોક્કસ કારણ સ્પષ્ટ થઈ શકશે.
આ પણ વાંચો: ગુજરાતમાં પ્રી-મોન્સૂન એક્ટિવિટી જોરમાં : 11 જિલ્લામાં ઓરેન્જ એલર્ટ; ગરમીથી મોટી રાહત
સ્થાનિકોમાં ઉગ્ર અસંતોષ
આકાંક્ષા એપાર્ટમેન્ટના રહીશો હવે માત્ર તાત્કાલિક રાહત નહીં પરંતુ કાયમી ઉકેલની માંગ કરી રહ્યા છે. પાણી પુરવઠાની લાઇનો, ગટર વ્યવસ્થા અને તાજેતરમાં થયેલી કોઈ મરામત કામગીરીની સંપૂર્ણ તપાસ કરવાની માંગ ઉઠી રહી છે. લોકોનું કહેવું છે કે જો સમયસર કાર્યવાહી કરવામાં આવી હોત તો મોટી સંખ્યામાં લોકો બીમાર પડતા અટકાવી શકાય હોત.
હાલ સમગ્ર ઘટનાને લઈને વિસ્તારના રહીશોમાં ચિંતા અને અસંતોષનું વાતાવરણ છે. હવે સૌની નજર તંત્રની તપાસ અને તેના સત્તાવાર અહેવાલ પર છે, જેનાથી આ રોગચાળાના વાસ્તવિક કારણો સામે આવી શકશે.
