પશ્ચિમ બંગાળના કોલકાતામાં સ્થિત એક લૉ કોલેજની વિદ્યાર્થિની સાથે ગેંગરેપની ઘટના સામે આવી છે. 25 જૂનના રોજ કોલેજના કેમ્પસમાં 3.5 કલાક સુધી ચાલેલા દુષ્કર્મના કેસમાં CCTV ફૂટેજ, મેડિકલ રિપોર્ટ અને પીડિતાની ફરિયાદે આરોપીઓ વિરુદ્ધ ગંભીર પુરાવા રજૂ કર્યા છે.
CCTV ફૂટેજથી દ્રષ્ટિએ દુષ્કર્મની પુષ્ટિ
કોલેજના CCTV ફૂટેજમાં બપોરે 3:30 વાગ્યાથી રાત્રે 10:50 સુધી પીડિતાને બળજબરીથી ગાર્ડ રૂમમાં લઇ જવાતી અને ત્યારબાદની ઘટનાઓ જોવા મળી. તપાસ અધિકારીએ પુષ્ટિ કરી કે વિડિયો ફૂટેજ, પીડિતાની ફરિયાદના દાવાઓ સાથે મેળ ખાય છે.
મેડિકલ રિપોર્ટ: બળાત્કાર અને શારીરિક ઇજા સ્પષ્ટ
CNMC હોસ્પિટલમાં થયેલી મેડિકલ તપાસમાં સામૂહિક બળાત્કાર અને પીડિતાની શારીરિક પરિસ્થિતિમાં બળજબરીના નિશાન મળ્યા છે — જેમાં નખના ઘા, ઉઝરડા અને મારપીટના ઘા સામેલ છે.
ચાર આરોપીઓ ઝડપાયા, SIT રચાઈ
હાલ સુધીમાં ચાર આરોપીઓની ધરપકડ થઈ છે:
મનોજીત મિશ્રા (31) – મુખ્ય આરોપી અને કોલેજનો ભૂતપૂર્વ વિદ્યાર્થી
ઝૈબ અહેમદ (19) અને પ્રમિત મુખર્જી (20) – વર્તમાન વિદ્યાર્થી
પિનાકી બેનર્જી (55) – ગાર્ડ રૂમના કર્મચારી
આ ઉપરાંત, આસિસ્ટન્ટ કમિશનરની આગેવાની હેઠળ પાંચ સભ્યોની વિશિષ્ટ તપાસ ટીમ (SIT) રચાઈ છે.
પીડિતાની ફરિયાદ: બળાત્કાર, ધમકી અને બ્લેકમેઇલ
પીડિતાએ પોતાના નિવેદનમાં કહ્યું કે સાંજે 7:30થી 10:50 સુધીના સમયગાળામાં ત્રણે આરોપીઓએ બળાત્કાર ગુજાર્યો, તેને હોકી સ્ટિકથી મારવાનો પ્રયાસ થયો અને વીડિયો બનાવવામાં આવ્યો. છોડતી વખતે આરોપીઓએ વીડિયો વાઇરલ કરવાની ધમકી આપી.
તેણે વધુમાં જણાવ્યું કે મુખ્ય આરોપી મનોજીતે લગ્નની ઓફર આપી હતી, પણ તેણીએ તેનો ઈનકાર કર્યો હતો કારણ કે તે પહેલેથી જ સંબંધમાં છે.
રાજકીય પ્રતિક્રિયાઓ અને વિવાદ
TMC સાંસદ કલ્યાણ બેનર્જીએ કહ્યું: “મિત્ર જો મિત્ર પર બળાત્કાર કરે તો શું કરી શકીએ?” — જેના કારણે વિવાદ ઉભો થયો.
TMCએ તેમના નિવેદનને "અંગત વિચાર" ગણાવતાં પાર્ટીનું વલણ સ્પષ્ટ કર્યું કે તેઓ ઝીરો ટોલરન્સ પોલિસી ધરાવે છે.
બીજી તરફ, ભાજપે ચાર સભ્યોની તપાસ સમિતિ રચી છે જેમાં મીનાક્ષી લેખી, સતપાલ સિંહ અને અન્ય સાંસદો સામેલ છે. પાર્ટી તરફથી રાજ્ય સરકાર પર જવાબદારી નિભાવવામાં નિષ્ફળ થવાનો આરોપ મૂકાયો છે.
