Gandhinagar : ગાંધીનગર જિલ્લામાં આગામી સ્થાનિક સ્વરાજની ચૂંટણીઓને લઈને રાજકીય માહોલ ગરમાયો છે, ત્યારે જિલ્લા વહીવટી તંત્ર દ્વારા પ્રચાર પ્રસારના નિયમોમાં મોટા ફેરફાર કરવામાં આવ્યા છે. જિલ્લા કલેકટરે એક મહત્વનું જાહેરનામું બહાર પાડીને ચૂંટણી પ્રચાર દરમિયાન થતાં જાહેર મિલકતોના બગાડને અટકાવવા માટે કડક આદેશો આપ્યા છે. આ આદેશો સાથે હવે નેતાઓએ પ્રચાર કરવાની રીતમાં મોટો ફેરફાર કરવો પડશે.
જાહેર મિલકતોનું રક્ષણ
સામાન્ય રીતે ચૂંટણી સમયે શહેરની દીવાલો અને થાંભલાઓ પોસ્ટરોથી ઢંકાઈ જતાં હોય છે. જોકે, આ વખતે ગાંધીનગર જિલ્લામાં સરકારી મકાનો, રસ્તાઓ, ટેલિફોન કે ઈલેક્ટ્રિક થાંભલાઓ, એસ.ટી. બસ સ્ટોપ અને સરકારી વાહનો પર કોઈપણ પ્રકારનું લખાણ લખવા કે પોસ્ટર ચોંટાડવા પર સંપૂર્ણ પ્રતિબંધ લાદવામાં આવ્યો છે. જો કોઈ આ નિયમનો ભંગ કરશે, તો તેની સામે કાનૂની કાર્યવાહી કરવામાં આવશે.
સરકારી આવાસનો ઉપયોગ
રાજ્ય ચૂંટણી આયોગની સૂચના મુજબ, હવે કોઈપણ રાજકીય પક્ષ કે ઉમેદવાર સરકારી વિશ્રામગૃહ (ગેસ્ટ હાઉસ), ડાક બંગલા અથવા સરકારી રહેણાંકનો એકહથ્થો ઉપયોગ કરી શકશે નહીં. વહીવટી તંત્ર દ્વારા સ્પષ્ટ કરવામાં આવ્યું છે કે તમામ પક્ષોને સમાન તક આપવી જરૂરી છે. આ સ્થળોનો ઉપયોગ પ્રચાર કચેરી તરીકે કે કોઈ ચૂંટણીલક્ષી હેતુ માટે કરી શકાશે નહીં.
બેઠકો અને પાર્કિંગ પર નિયંત્રણ
નવા નિયમો મુજબ, સરકારી વિશ્રામગૃહ કે અતિથિગૃહમાં કોઈપણ પ્રકારની રાજકીય બેઠકો યોજી શકાશે નહીં. આ ઉપરાંત, પ્રચાર માટે આવતા મહાનુભાવોને ફાળવવામાં આવેલા રૂમની સાથે માત્ર બે જ વાહનોને પરિસરમાં પાર્કિંગ કરવાની મંજૂરી આપવામાં આવશે. આ નિર્ણયથી સરકારી પરિસરમાં થતી ભીડ પર લગામ આવશે.
સમયમર્યાદા અને કાયદો
કોઈપણ વ્યક્તિને સરકારી ગેસ્ટ હાઉસમાં 48 કલાકથી વધુ સમય માટે રૂમ ફાળવવામાં આવશે નહીં. ખાસ વાત એ છે કે, મતદાનના 48 કલાક પહેલા પ્રચાર માટે આવતા મહાનુભાવો આ વિશ્રામગૃહોમાં રોકાઈ શકશે નહીં. આ તમામ નિયમો ગાંધીનગર જિલ્લાના ચૂંટણી લક્ષી વિસ્તારોમાં 30 એપ્રિલ 2026 સુધી અમલમાં રહેશે.
