Kutch Car-Tempo Accident : કચ્છના ભચાઉ તાલુકામાં રાત્રિના સમયે ચાર વાહનો વચ્ચે થયેલા ગંભીર અકસ્માતે સમગ્ર વિસ્તારમાં શોકનો માહોલ સર્જ્યો છે. ભચાઉ નજીક આવેલા કેસરી ગઢ રિસોર્ટ સામે રાત્રે અંદાજે 12 વાગ્યાના અરસામાં કાર અને આઇસર ટેમ્પો વચ્ચે જોરદાર ટક્કર થઈ હતી.
સવાર એક વર્ષનું બાળક ઘટનાસ્થળે જ મોતન
અકસ્માત એટલો ગંભીર હતો કે બંને વાહનોમાં આગ લાગી ગઈ. કારમાં સવાર એક વર્ષનું બાળક ઘટનાસ્થળે જ મોતને ભેટ્યું, જ્યારે કારમાં રહેલા પતિ-પત્નીને ગંભીર ઇજાઓ પહોંચતા તેમને તાત્કાલિક સારવાર અર્થે ભુજની હોસ્પિટલમાં ખસેડવામાં આવ્યા હતા.
ટ્રેલરચાલકનું મોત
આ અકસ્માત બાદ પાછળથી આવી રહેલા બે ટ્રેલર પણ અકસ્માતગ્રસ્ત કાર અને આઇસર સાથે અથડાઈ ગયા હતા. આ ઘટનામાં એક ટ્રેલરચાલકનું પણ ઘટનાસ્થળે જ મોત થયું હોવાનું જાણવા મળ્યું છે. અકસ્માતની જાણ થતાં સ્થાનિક લોકોએ તાત્કાલિક 108 એમ્બ્યુલન્સ સેવા, પોલીસ કાફલો અને ભચાઉ ફાયર ટીમને જાણ કરી હતી.
'તમામ પ્રયત્નો છતાં બાળકને બચાવી શકાયું નહોતું'
ફાયર ટીમે ઘટનાસ્થળે પહોંચીને આગ પર કાબૂ મેળવવાનો પ્રયાસ કર્યો, પરંતુ ફાયરમેનોએ દુઃખ વ્યક્ત કરતાં જણાવ્યું હતું કે, 'તમામ પ્રયત્નો છતાં બાળકને બચાવી શકાયું નહોતું'. આ હૃદયદ્રાવક અકસ્માતમાં બે લોકોના મોત અને અનેક લોકોને ઇજાઓ થતાં વિસ્તારમાં શોકની લાગણી છવાઈ ગઈ છે.
