સુરતના વરાછા વિસ્તારમાં પોતાને ઇન્કમટેક્સ અધિકારી તરીકે ઓળખાવી વેપારીઓને ધમકાવી વસૂલી કરતો એક ડુપ્લીકેટ ઇન્કમટેક્સ અધિકારી ઝડપાયો છે. ગ્લોબલ માર્કેટ વિસ્તારમાં વેપારીઓ પાસેથી ખોટી કાર્યવાહી કરવાની ધમકી આપી પૈસા ઉઘરાવતો આરોપી વરાછા પોલીસે બ્લીસ હોટલ ખાતેથી ઝડપી લીધો હતો.
ગ્લોબલ માર્કેટના વેપારીઓને ફોન અને રૂબરૂ મળી ધમકાવતો હતો
મળતી માહિતી મુજબ, આરોપી પોતાને ઇન્કમટેક્સ ઓફિસર હોવાનું કહી ગ્લોબલ માર્કેટના વેપારીઓને ફોન અને રૂબરૂ મળી ધમકાવતો હતો. વેપારીઓ પાસેથી મળેલી ચોક્કસ માહિતીના આધારે વરાછા પોલીસે જાળ બિછાવ્યો હતો. પોલીસની સર્વેલન્સ અને PCR ટીમે ઝડપી અને સંકલિત કાર્યવાહી કરી આરોપીને રંગેહાથ ઝડપી લીધો હતો.
આરોપી રાજસ્થાનનો રહેવાસી
પોલીસ તપાસમાં ખુલાસો થયો છે કે આરોપી રાજસ્થાનનો રહેવાસી છે અને લાંબા સમયથી સુરત વિસ્તારમાં આ રીતે ઠગાઈ કરી રહ્યો હતો. આરોપી ખોટી ઓળખાણ આપીને વેપારીઓમાં ભય ફેલાવી ગેરકાયદે વસૂલી કરતો હોવાનું પણ સામે આવ્યું છે. વરાછા પોલીસ સ્ટેશનમાં આરોપી સામે ગુનો નોંધવામાં આવ્યો છે. આ કેસમાં આરોપી સામે BNS કલમ 204 અને 308(2) હેઠળ કાર્યવાહી કરવામાં આવી છે. વરાછા પોલીસે સમયસર અને સતર્કતા દાખવીને મોટી ઠગાઈ અટકાવી હોવાનું સામે આવ્યું છે. આ ઘટનાથી વેપારીઓમાં રાહતનો શ્વાસ લેવાયો છે અને વરાછા પોલીસની સતર્કતા ફરી એકવાર સાબિત થઈ છે.
