મ્યાનમાર પછી આ જગ્યા પર આવ્યો ભયંકર ભૂકંપ : 7ની તીવ્રતાના ભૂકંપ પછી સુનામીની ચેતવણી

દક્ષિણપશ્ચિમ પેસિફિક મહાસાગરના ટોંગા ટાપુઓમાં રવિવારે (30 માર્ચ 2025) સાંજે 5.48 વાગ્યે રિક્ટર સ્કેલ પર 7.0ની તીવ્રતાનો ભૂકંપ આવ્યો હતો. નેશનલ સેન્ટર ફોર સિસ્મોલોજી દ્વારા આ માહિતી આપવામાં આવી છે. યુએસ જિયોલોજિકલ સર્વે (યુએસજીએસ) અનુસાર આ શક્તિશાળી ભૂકંપને કારણે પ્રશાંત મહાસાગર ક્ષેત્ર માટે સુનામીની ચેતવણી જારી કરવામાં આવી છે.

ભૂકંપ બાદ સુનામીની ચેતવણી
યુએસજીએસના જણાવ્યા અનુસાર ભૂકંપ મુખ્ય ટાપુ ટોંગાથી લગભગ 100 કિલોમીટર (62 માઇલ) ઉત્તરપૂર્વમાં આવ્યો હતો. પેસિફિક સુનામી વોર્નિંગ સેન્ટરે જણાવ્યું હતું કે ભૂકંપના કેન્દ્રના 300 કિલોમીટર (185 માઇલ)ની અંદર દરિયાકાંઠાના વિસ્તારોને ખતરનાક મોજાઓ અસર કરી શકે છે. હાલમાં કોઈ જાનહાનિના અહેવાલ નથી.

આ શહેરની વસ્તી લગભગ એક લાખ
ટોંગા 171 ટાપુઓ અને માત્ર 100,000 થી વધુની વસ્તી ધરાવતો પોલિનેશિયન રાષ્ટ્ર છે. તેમાંના મોટા ભાગના ટોંગાટાપુના મુખ્ય ટાપુ પર રહે છે. તે ઓસ્ટ્રેલિયાના દરિયાકાંઠાની પૂર્વમાં 3,500 કિલોમીટરથી વધુ દૂર સ્થિત છે. ટોંગા ટાપુ લગૂન અને ચૂનાના પથ્થરની ખડકોથી ઘેરાયેલો છે.

મ્યાનમાર અને થાઈલેન્ડમાં ભૂકંપના આંચકા
30 માર્ચ, 2025ના રોજ મ્યાનમાર અને થાઇલેન્ડમાં 7.7 ની તીવ્રતાનો ભૂકંપ આવ્યો હતો, જેના કારણે ભારે વિનાશ થયો હતો. થાઇલેન્ડની રાજધાની બેંગકોકમાં નિર્માણાધીન એક બહુમાળી ઈમારત ધરાશાયી થઈ ગઈ છે, જેના કારણે મ્યાનમારમાં હજારો લોકો બેઘર થઈ ગયા છે. મ્યાનમારમાં મૃત્યુઆંક હાલમાં 1,700થી વધુ છે. એવું કહેવામાં આવી રહ્યું છે કે જેમ જેમ કાટમાળ દૂર કરવામાં આવશે તેમ તેમ મૃત્યુઆંક વધુ વધી શકે છે.