રાજ્યમાં જમીન અને મિલકતના ઈ-રજિસ્ટ્રેશન કરાવવાનું હવે મોંઘું બન્યું છે. રાજ્યના મહેસૂલ વિભાગ દ્વારા જાહેર કરાયેલા નવા નોટિફિકેશન અનુસાર, હવે ઈ-રજિસ્ટ્રેશન કરાવતા દરેક દસ્તાવેજ માટે રૂ.100 પ્રોસેસિંગ ફી ચૂકવવી પડશે. આ નિર્ણયથી રાજ્યભરમાં મિલકત ખરીદ-વેચાણ કરનારા નાગરિકો પર વધારાનો નાણાકીય ભાર પડશે.
ઈ-રજિસ્ટ્રેશન દસ્તાવેજ માટે ફરજિયાત રીતે રૂ.100 પ્રોસેસિંગ ફી વસૂલવામાં આવશે
પ્રાપ્ત માહિતી મુજબ, રાજ્યના મહેસૂલ વિભાગે રજિસ્ટ્રેશન અધિનિયમ, 1908 હેઠળ આપવામાં આવેલી સત્તાનો ઉપયોગ કરીને આ નોટિફિકેશન જાહેર કર્યું છે. સરકાર દ્વારા અગાઉ 3 ઓગસ્ટ 1987ના રોજ જાહેર કરાયેલા ફી ટેબલમાં સુધારો કરીને આ નવી જોગવાઈ ઉમેરવામાં આવી છે. આ સુધારા અંતર્ગત હવે દરેક ઈ-રજિસ્ટ્રેશન દસ્તાવેજ માટે ફરજિયાત રીતે રૂ.100 પ્રોસેસિંગ ફી વસૂલવામાં આવશે.
“ઈ-રજિસ્ટ્રેશન માટે પ્રોસેસિંગ ફી”
ફી ટેબલમાં ક્રમાંક 29 તરીકે “ઈ-રજિસ્ટ્રેશન માટે પ્રોસેસિંગ ફી” નામે નવો આર્ટિકલ ઉમેરવામાં આવ્યો છે. આ જોગવાઈના અમલથી જમીન-મિલકતના તમામ પ્રકારના ઈ-રજિસ્ટ્રેશન દસ્તાવેજો પર આ ફી લાગુ પડશે. મહત્વપૂર્ણ બાબત એ છે કે આ નિર્ણય તાત્કાલિક અસરથી અમલમાં આવશે. નોટિફિકેશનને ગુજરાત સરકારના એક્સ્ટ્રા ઓર્ડિનરી ગેઝેટમાં પ્રસિદ્ધ કરવાની સાથે સાથે તેને ઈ-પબ્લિશ કરવાની સૂચના પણ આપવામાં આવી છે. ઉપરાંત, નોટિફિકેશનનો ગુજરાતી ભાષામાં અનુવાદ થયા બાદ તેની આવૃત્તિ પણ પ્રસિદ્ધ કરવામાં આવશે. આ નવી જોગવાઈથી રાજ્યમાં ઈ-રજિસ્ટ્રેશન પ્રક્રિયા વધુ વ્યવસ્થિત બનશે તેમ સરકારનું માનવું છે, જોકે સામાન્ય નાગરિકો માટે રજિસ્ટ્રેશન ખર્ચમાં વધારો થવાનો છે.
