અમેરિકાના રાષ્ટ્રપતિ ડોનાલ્ડ ટ્રમ્પે તાજેતરમાં સોશિયલ મીડિયા પ્લેટફોર્મ ટ્રુથ પર પોતાનો એક ફોટો શેર કર્યો હતો, જેના કારણે ભારે ચર્ચા શરૂ થઈ હતી. વેનેઝુએલા પરના હુમલા અને રાષ્ટ્રપતિ નિકોલસ માદુરોની ધરપકડ બાદ, ટ્રમ્પે હવે પોતાને વેનેઝુએલાના "કાર્યકારી રાષ્ટ્રપતિ" જાહેર કર્યા છે. ટ્રમ્પે આ ફોટો મજાક તરીકે શેર કર્યો હતો. અગાઉ, દેશના ઉપરાષ્ટ્રપતિ, ડેલ્સી રોડ્રિગ્ઝને વેનેઝુએલાના વચગાળાના રાષ્ટ્રપતિ તરીકે નિયુક્ત કરવામાં આવ્યા હતા.
ટ્રમ્પે રવિવારે સોશિયલ મીડિયા પ્લેટફોર્મ ટ્રુથઆઉટ પર પોતાનો આ ફોટો શેર કર્યો. આ તસવીરમાં વિકિપીડિયાના ઓફિશિયલ પેજને એડિટ કરવામાં આવ્યું છે, જેમાં જાન્યુઆરી 2026 માં ડોનાલ્ડ ટ્રમ્પને વેનેઝુએલાના વર્તમાન રાષ્ટ્રપતિ તરીકે દર્શાવવામાં આવ્યા છે. આ પોસ્ટ ઝડપથી વાયરલ થઈ ગઈ, જેમાં લોકોએ ટ્રમ્પના ઇરાદા પર સવાલ ઉઠાવ્યા.
નોંધનીય છે કે 3 જાન્યુઆરીના રોજ, અમેરિકાએ એક મોટી લશ્કરી કાર્યવાહી શરૂ કરી અને વેનેઝુએલાના રાષ્ટ્રપતિ નિકોલસ માદુરો અને તેમની પત્ની સેલિયા ફ્લોરેસને રાષ્ટ્રપતિ સંકુલમાંથી ધરપકડ કરી હતી. બંનેને અમેરિકા લઈ જવામાં આવ્યા છે અને તેમની સામે કેસ ચલાવવામાં આવી રહ્યો છે. દરમિયાન, ડેલ્સી રોડ્રિગ્ઝે વેનેઝુએલાના રાષ્ટ્રપતિ તરીકેની ફરજો સંભાળી લીધી છે. જોકે, ટ્રમ્પે અગાઉ કહ્યું છે કે જ્યાં સુધી "સુરક્ષિત, ન્યાયી અને સમજદાર સંક્રમણ" સુનિશ્ચિત ન થાય ત્યાં સુધી અમેરિકા વેનેઝુએલાની સરકાર ચલાવતું રહેશે.
ટ્રમ્પે વેનેઝુએલાની નવી સરકારને પણ ધમકી આપી છે. ટ્રમ્પે આગામી દિવસોમાં વેનેઝુએલા સામે વધુ લશ્કરી કાર્યવાહીની ચેતવણી આપી છે. તેમણે જણાવ્યું છે કે માદુરોના નજીકના લોકો અને યુનાઇટેડ સ્ટેટ્સને સહયોગ ન કરનારાઓ સામે ફરીથી કાર્યવાહી કરવામાં આવી શકે છે. આ દરમિયાન, યુએસ સેક્રેટરી ઓફ સ્ટેટ માર્કો રુબિયોએ જણાવ્યું છે કે યુએસ પાસે વેનેઝુએલા માટે ત્રણ તબક્કાની યોજના છે જે દેશમાં સ્થિરતા સુનિશ્ચિત કરશે.
