અમેરિકાના રાષ્ટ્રપતિ ડોનાલ્ડ ટ્રમ્પે ઈરાનના ટોચના નેતૃત્વ અને સુપ્રીમ લીડર પર આકરા પ્રહારો કરીને રાજદ્વારી ગરમાવો વધારી દીધો છે. એક કાર્યક્રમ દરમિયાન ટ્રમ્પે કટાક્ષ કરતા જણાવ્યું હતું કે ઈરાનમાં હાલમાં એવો કોઈ મક્કમ નેતા રહ્યો નથી જેની સાથે વાતચીત કરી શકાય. ટ્રમ્પે દાવો કર્યો કે ઈરાનના જૂના નેતાઓ સત્તા ગુમાવી ચુક્યા છે અથવા તો પદ છોડી ગયા છે અને હવે ત્યાં કોઈ નવું નેતૃત્વ લેવા તૈયાર નથી. તેમણે ઉમેર્યું કે, "અમે ઈરાન સાથે વાતચીત કરવા ઈચ્છીએ છીએ, પરંતુ સમસ્યા એ છે કે ત્યાં વાત કરવા માટે કોઈ યોગ્ય વ્યક્તિ જ ઉપલબ્ધ નથી."
પોતાના સંબોધનમાં વેનેઝુએલાનો ઉલ્લેખ કરતા ટ્રમ્પે પોતાના પ્રથમ કાર્યકાળ દરમિયાન અમેરિકી સૈન્યના પુનર્નિર્માણની વાત પણ દોહરાવી હતી. તેમણે કહ્યું કે મને અંદાજ નહોતો કે આપણે સૈન્ય શક્તિનો આટલો વ્યાપક ઉપયોગ કરવો પડશે, પરંતુ મને આનંદ છે કે મેં સેનાને આટલી સજ્જ બનાવી. ઈરાન પર નિશાન સાધતા તેમણે વધુમાં જણાવ્યું કે મધ્ય પૂર્વમાં એવા દેશો પર પણ મિસાઈલ હુમલા કરવામાં આવ્યા જેઓ આ સંઘર્ષમાં સામેલ નહોતા. ટ્રમ્પના મતે ઈરાન આખા મધ્ય પૂર્વ પર કબજો કરવા માંગે છે અને જો તેમની પાસે પરમાણુ હથિયાર હોત, તો તેઓ તેનો ઉપયોગ કરતા જરા પણ અચકાયા ન હોત.
ટ્રમ્પના આ વિવાદાસ્પદ નિવેદન બાદ ઈરાન તરફથી તીખી પ્રતિક્રિયા આવી છે. ઈરાનના વિદેશ મંત્રી અબ્બાસ અરાઘચીએ ટ્રમ્પના દાવાઓને પાયાવિહોણા ગણાવ્યા છે. ઈરાનનું માનવું છે કે ટ્રમ્પ પ્રશાસન જાણીજોઈને મધ્ય પૂર્વમાં અશાંતિ ફેલાવવાનું કામ કરી રહ્યું છે. ઉલ્લેખનીય છે કે અમેરિકા અને ઈરાન વચ્ચે લાંબા સમયથી પરમાણુ કરાર અને આર્થિક પ્રતિબંધોને લઈને તણાવ ચાલી રહ્યો છે, જે ટ્રમ્પના આ નવા નિવેદન બાદ વધુ ઘેરો બનવાની શક્યતા છે.
