Donald Trump : અમેરિકાના રાષ્ટ્રપતિ Donald Trumpએ ફરી એકવાર આક્રમક વેપાર નીતિનો સંકેત આપતાં યુરોપિયન દેશોને કડક ચેતવણી આપી છે. ટ્રમ્પે જણાવ્યું છે કે અમેરિકન ટેક કંપનીઓ પર ડિજિટલ સર્વિસ ટેક્સ (DST) લાદનારા કોઈપણ દેશ સામે અમેરિકા 100 ટકા ટેરિફ લગાવવાની કાર્યવાહી કરશે. ટ્રમ્પે સોશિયલ મીડિયા પર કરેલી પોસ્ટમાં કહ્યું કે ઘણા યુરોપિયન દેશો અમેરિકન કંપનીઓ પર ડિજિટલ સર્વિસ ટેક્સ લાગુ કરવાની દિશામાં આગળ વધી રહ્યા છે અને કેટલાક દેશો તો તેને અમલમાં મૂકવાની નજીક છે. તેમણે ચેતવણી આપી કે જે દેશ આવા ટેક્સ લાગુ કરશે, તેના દ્વારા અમેરિકામાં નિકાસ કરવામાં આવતી તમામ વસ્તુઓ પર તરત જ 100 ટકા ટેરિફ લાદવામાં આવશે.
વેપાર કરારો પર પણ અસરની ચેતવણી
ટ્રમ્પે વધુમાં જણાવ્યું કે આ પ્રકારના નવા ટેરિફ અગાઉથી થયેલા અથવા ભવિષ્યમાં થનારા વેપાર કરારો પર પણ હાવી રહેશે. તેમના કહેવા મુજબ, જો કોઈ દેશ અમેરિકન કંપનીઓને નિશાન બનાવીને ડિજિટલ ટેક્સ લાગુ કરશે તો અમેરિકા તેની સામેના વેપાર કરારોને પણ બાજુએ મૂકી શકે છે. આ નિવેદન એવા સમયે આવ્યું છે જ્યારે અમેરિકા અને યુરોપિયન યુનિયન વચ્ચે વેપાર સંબંધોને લઈને ફરીથી તણાવ વધી રહ્યો છે. ટ્રમ્પે અગાઉ યુરોપિયન માલસામાન પર 25 ટકા ટેરિફ ફરીથી લાગુ કરવાની પણ ધમકી આપી હતી જેથી યુરોપિયન દેશો વેપાર સંબંધી તેમની પ્રતિબદ્ધતાઓનું પાલન કરે.
આ પણ ખાસ વાંચો : ભૂકંપે છીનવી લીધો ફૂટબોલરનો આખો સંસાર! : વેનેઝુએલામાં વિનાશક આફત બાદ સ્ટાર ખેલાડી સોશિયલ મીડિયા પર મદદ માટે રડી પડ્યો
ફ્રાન્સ સાથે જૂનો વિવાદ ફરી ચર્ચામાં
ડિજિટલ સર્વિસ ટેક્સનો મુદ્દો ખાસ કરીને ફ્રાન્સ સાથે અમેરિકાના લાંબા સમયથી ચાલી રહેલા મતભેદોનું કેન્દ્ર રહ્યો છે. Emmanuel Macronએ તાજેતરમાં સ્પષ્ટ કર્યું હતું કે ફ્રાન્સ અમેરિકન દબાણ સામે ઝુકશે નહીં અને અમેરિકન ટેક જાયન્ટ્સ પર લાગુ કરવામાં આવેલા ડિજિટલ ટેક્સને પાછો ખેંચવાનો કોઈ નિર્ણય લેવામાં આવશે નહીં. ફ્રાન્સે વર્ષ 2019થી એવી કંપનીઓ પર 3 ટકા ડિજિટલ ટેક્સ લાગુ કર્યો છે, જેમની સ્થાનિક આવક 25 મિલિયન યુરોથી વધુ અને વૈશ્વિક આવક 750 મિલિયન યુરોથી વધુ હોય. આ ટેક્સ મુખ્યત્વે ઓનલાઈન જાહેરાત, ડિજિટલ માર્કેટપ્લેસ અને અન્ય ઇન્ટરનેટ આધારિત સેવાઓને આવરી લે છે. ફ્રાન્સમાં આ કરને 6 ટકા સુધી વધારવાની ચર્ચા પણ થઈ ચૂકી છે. ટ્રમ્પે અગાઉ ચેતવણી આપી હતી કે જો ફ્રાન્સ આ ડિજિટલ ટેક્સ નાબૂદ નહીં કરે તો અમેરિકા ફ્રેન્ચ વાઇન સહિતના ઉત્પાદનો પર 100 ટકા સુધીના ટેરિફ લગાવી શકે છે.
આ પણ ખાસ વાંચો : 'અમે કાશ્મીરી છીએ કે નહીં તેનું પ્રમાણપત્ર કોઈ પાસેથી લેવાની જરૂર નથી' : PoKના નેતા ફૈસલ મુમતાઝ રાઠોરનો કડક પ્રહાર
