રાજ્યમાં વધતા માર્ગ અકસ્માતોને ધ્યાનમાં રાખીને વાહન વ્યવહાર કમિશનરની કચેરીએ તમામ પ્રાદેશિક વાહન વ્યવહાર કચેરીઓ (RTO) ને મહત્વપૂર્ણ પત્ર લખ્યો છે. આ પત્રમાં વાહનો પર અનધિકૃત રીતે લગાવવામાં આવતી અતિ તેજસ્વી White LED હેડલાઈટ્સ અંગે સઘન એન્ફોર્સમેન્ટ કાર્યવાહી કરવાની સ્પષ્ટ સૂચના આપવામાં આવી છે.
LED હેડલાઈટ સામે કડક કાર્યવાહી કરવાનો આદેશ
છેલ્લા કેટલાક સમયથી વાહનોમાં લગાવવામાં આવતી અનધિકૃત White LED લાઇટ અને વધુ તીવ્રતા ધરાવતા હેડલેમ્પના કારણે અન્ય વાહનચાલકોની આંખ અંજાઈ જાય છે, જેના પરિણામે માર્ગ અકસ્માત થવાની શક્યતા વધી જાય છે. આ બાબતે વાહન વ્યવહાર વિભાગને વારંવાર રજુઆતો મળી રહી છે કે આવા તેજ લાઈટ ધરાવતા વાહનોને કારણે ગંભીર અકસ્માતો સર્જાય છે અને ક્યારેક આવા અકસ્માતોમાં મૃત્યુ પણ થાય છે. આ સમસ્યાને ગંભીરતાથી લઈ વાહન વ્યવહાર કમિશનરની કચેરી દ્વારા અગાઉ પણ સંદર્ભિત પત્રો (1 થી 7) દ્વારા તમામ સંબંધિત કચેરીઓને આવા વાહનો સામે કડક કાર્યવાહી કરવા સૂચવવામાં આવ્યું હતું. આ મુદ્દાની નોંધ ઉચ્ચ કક્ષાએ પણ લેવામાં આવી છે.
ચેકિંગ કરવાની સૂચના આપવામાં આવી
હાલમાં ફરી એકવાર સ્પષ્ટ કરવામાં આવ્યું છે કે રાજ્યમાં તમામ પ્રકારના વાહનો પર લગાવવામાં આવેલી અનધિકૃત અને અતિ તીવ્રતા વાળી White LED હેડલાઈટ સામે નિયમિત અને સઘન એન્ફોર્સમેન્ટ કાર્યવાહી કરવી અનિવાર્ય રહેશે. સાથે જ વાહન ડીલરો દ્વારા વાહનો પર અનધિકૃત White LED આપવામાં ન આવે તેની ખાતરી કરવા માટે ડીલર સ્તરે પણ કડક ચેકિંગ કરવાની સૂચના આપવામાં આવી છે. વાહન વ્યવહાર વિભાગે આ કાર્યવાહી દ્વારા માર્ગ સલામતી વધારવા અને અકસ્માતોની સંખ્યા ઘટાડવાનો ઉદ્દેશ વ્યક્ત કર્યો છે. તમામ વાહનચાલકોને નિયમોનું પાલન કરવા અને અનધિકૃત લાઈટનો ઉપયોગ ટાળવા અપીલ કરવામાં આવી છે.
