Sena Medal Award: જામનગર જિલ્લાના રહેવાસી અને ભારતીય સેનામાં ફરજ બજાવતા દિનેશભાઈ પાલાભાઈ લગારીયાએ પોતાની અસાધારણ બહાદુરીથી દેશનું નામ રોશન કર્યું છે. ભારતીય સેનાની 12મી બટાલિયન ‘ધ ગ્રેનેડિયન્સ રેજિમેન્ટ’માં સેવારત દિનેશભાઈને તેમની શૂરવીરતા બદલ પ્રતિષ્ઠિત સેના મેડલથી સન્માનિત કરવામાં આવ્યા છે. આ સન્માન તેમને આર્મી ડેના અવસરે જયપુર ખાતે આયોજિત વિશેષ સમારંભમાં આપવામાં આવ્યું હતું.
ઓપરેશન સિંદૂર દરમિયાન ભજવી મહત્વપૂર્ણ ભૂમિકા
‘ઓપરેશન સિંદૂર’ દરમિયાન દિનેશભાઈને આતંકવાદીઓના મહત્વપૂર્ણ ઠેકાણાઓને નિશાન બનાવવાની જવાબદારી સોંપવામાં આવી હતી. દુશ્મન દ્વારા ભારે ગોળીબાર અને સતત બોમ્બમારા વચ્ચે પણ તેમણે અડગ રહીને ફરજ બજાવી. આ ઓપરેશનમાં તેમની ભૂમિકા અત્યંત નિર્ણાયક સાબિત થઈ હતી, જેના કારણે સુરક્ષા દળોને વ્યૂહાત્મક સફળતા મળી. અત્યંત જોખમી પરિસ્થિતિ વચ્ચે દિનેશભાઈએ એન્ટી-ટેન્ક ગાઈડેડ મિસાઈલ (ATGM)નો ઉપયોગ કરીને નિર્ધારિત લક્ષ્ય પર સચોટ હુમલો કર્યો હતો. તેમની આ કુશળતા અને સાહસના પરિણામે આતંકવાદીઓના મજબૂત ઠેકાણાઓ સંપૂર્ણપણે ધ્વસ્ત થયા હતા. આ કાર્યવાહીથી દુશ્મનની કામગીરી અને યોજનાઓને મોટો ફટકો પડ્યો હતો.
સેના મેડલથી કરાયું સન્માન
દિનેશભાઈના આ સાહસિક પગલાંઓના કારણે આતંકવાદીઓની આગળની તમામ યોજનાઓ નિષ્ફળ સાબિત થઈ હતી. સુરક્ષા દળો માટે આ એક મોટી વ્યૂહાત્મક સફળતા હતી, જેના કારણે સમગ્ર વિસ્તારમાં સુરક્ષા વ્યવસ્થા વધુ મજબૂત બની. તેમના શૌર્યથી સાથી સૈનિકોમાં પણ નવી ઊર્જા અને ઉત્સાહનો સંચાર થયો હતો. દિનેશભાઈ પાલાભાઈ લગારીયાને તેમની બહાદુરી, કાર્યક્ષમતા અને સંગઠન પ્રત્યેની અતૂટ નિષ્ઠા બદલ સેના મેડલથી સન્માનિત કરવામાં આવ્યા. આ સન્માન ભારતીય સેનામાં તેમની નિષ્ઠાવાન સેવા અને અસાધારણ શૌર્યનું પ્રતિબિંબ છે.
માધુપુર ગામ અને હાલાર માટે ગૌરવ
મૂળ ખંભાળિયા તાલુકાના માધુપુર ગામના વતની દિનેશભાઈની આ સિદ્ધિથી સમગ્ર હાલાર પ્રદેશમાં ગૌરવની લાગણી પ્રસરી છે. તેમના પરિવારજનો, ગામવાસીઓ અને જિલ્લામાં ખુશીની લહેર જોવા મળી રહી છે. દિનેશભાઈ આજે યુવાનો માટે પ્રેરણારૂપ બન્યા છે અને દેશસેવાની સાચી ભાવનાનું જીવંત ઉદાહરણ પુરું પાડે છે.
