દિલ્હી-એનસીઆર વિસ્તારમાં શુક્રવારે અચાનક ભૂકંપના ઝટકા અનુભવાતા લોકોમાં ગભરાટ ફેલાયો હતો. ખાસ કરીને ઊંચી ઇમારતોમાં રહેનારા લોકો તરત જ બહાર દોડી ગયા હતા. મળતી માહિતી મુજબ આ ઝટકા લગભગ 30 થી 35 સેકન્ડ સુધી અનુભવાયા હતા, જેનાથી લોકોમાં દહેશતનો માહોલ ઉભો થયો હતો.
આ ઝટકાની અસર માત્ર દિલ્હી સુધી મર્યાદિત નહોતી, પરંતુ ઉત્તર ભારતના અન્ય અનેક વિસ્તારોમાં પણ ધરતી ધ્રૂજતી અનુભવી હતી. લોકોના જણાવ્યા અનુસાર પહેલા હળવો કંપન અનુભવાયો અને પછી થોડા સેકન્ડ માટે ઝટકો થોડો તેજ લાગ્યો.
જમ્મુ-કાશ્મીરથી લઈને યુપી સુધી અનુભવાયો આંચકો
દિલ્હી-એનસીઆર સિવાય, જમ્મુ-કાશ્મીર, પંજાબ અને ઉત્તર પ્રદેશના કેટલાક વિસ્તારોમાં પણ ભૂકંપના ઝટકા અનુભવાયા હતા. ખાસ કરીને નોઈડામાં રહેવાસીઓએ સોશિયલ મીડિયા પર આ ઘટના અંગે માહિતી શેર કરી હતી.
ઘણા લોકો પોતાના ઓફિસ અને ઘરોમાંથી બહાર નીકળી ખુલ્લી જગ્યાએ ઊભા રહ્યા હતા. કેટલાક સ્થળોએ લોકોમાં થોડો સમય ગભરાટ જોવા મળ્યો, જોકે કોઈ મોટા નુકસાન અથવા જાનહાનિની માહિતી હાલ સુધી મળી નથી.
ભૂકંપની તીવ્રતા અને કેન્દ્ર અંગે માહિતીની રાહ
હાલમાં આ ભૂકંપની તીવ્રતા અને કેન્દ્ર વિશે સત્તાવાર માહિતી મળવાની રાહ જોવાઈ રહી છે. સામાન્ય રીતે ભારતના ઉત્તર ભાગમાં હિમાલયી પટ્ટો સિસ્મિક ઝોનમાં આવતો હોવાથી અહીં ભૂકંપની ઘટનાઓ અવારનવાર બનતી રહે છે.
વિજ્ઞાનીઓના જણાવ્યા મુજબ, આવા હળવા ઝટકા મોટાભાગે મોટા નુકસાનકારક નથી હોતા, પરંતુ તે લોકો માટે ચેતવણીરૂપ બની શકે છે કે તેઓ આપત્તિ વ્યવસ્થાપન માટે તૈયાર રહે.
