Banaskantha News: બનાસકાંઠા જિલ્લાના ડીસા શહેરમાં રખડતા ઢોરનો ત્રાસ વધુ એક વખત સામે આવ્યો છે. શહેરના વ્યસ્ત સોની બજાર વિસ્તારમાં સ્કૂલે જઈ રહેલા 7 વર્ષના બાળક પર અચાનક રખડતી ગાયે હુમલો કર્યો હતો. ગાયે બાળકને શિંગડે ચડાવી દેતા તે ગંભીર રીતે ઇજાગ્રસ્ત થયો હતો. ઘટનાથી સમગ્ર વિસ્તારમાં ભય અને અફરાતફરીનો માહોલ સર્જાયો હતો.
સ્કૂલે જતાં સમયે અચાનક ગાયે કર્યો હુમલો
મળતી માહિતી મુજબ બાળક સવારે નિયમિત રીતે સ્કૂલે જઈ રહ્યો હતો ત્યારે સોની બજાર વિસ્તારમાં રખડતી ગાય અચાનક ઉશ્કેરાઈ ગઈ હતી. ગાયે બાળક પર હુમલો કરીને તેને શિંગડાં વડે ઉછાળી દીધો હતો. હુમલો એટલો અચાનક હતો કે આસપાસ હાજર લોકો પણ ક્ષણભર માટે ગભરાઈ ગયા હતા.
સ્થાનિકોએ દોડી જઈ બાળકને બચાવ્યો, ગાય ભાગી છૂટી
બાળક પર હુમલો થતાં આસપાસના વેપારીઓ અને સ્થાનિક લોકો તાત્કાલિક ઘટનાસ્થળે દોડી આવ્યા હતા. લોકોએ હિંમતપૂર્વક ગાયને દૂર હાંકી કાઢતાં ગાય ત્યાંથી ભાગી ગઈ હતી. સમયસર બચાવ કામગીરી થતાં બાળકનો જીવ બચી ગયો હતો. બાદમાં ઇજાગ્રસ્ત બાળકને સારવાર માટે હોસ્પિટલમાં ખસેડવામાં આવ્યો હોવાનું જાણવા મળ્યું છે.
રખડતા ઢોરના વધતા ત્રાસ સામે લોકોમાં રોષ
આ ઘટનાને પગલે સ્થાનિકોમાં ભારે રોષ જોવા મળી રહ્યો છે. સોની બજાર જેવા વ્યસ્ત વિસ્તારમાં રખડતા ઢોરના કારણે રોજિંદા વાહનચાલકો, વેપારીઓ અને વિદ્યાર્થીઓને જોખમનો સામનો કરવો પડે છે. અગાઉ પણ આવા બનાવો બન્યા હોવાનો સ્થાનિકો દાવો કરી રહ્યા છે.
આ પણ વાંચો: સુરેન્દ્રનગરમાં સરકારી જમીનમાં ખાડો ખોદી સંતાડેલો ₹93000નો દારૂ ઝડપાયો : મુખ્ય આરોપી ફરાર
તંત્ર સામે કડક કાર્યવાહીની ઉઠી માંગ
સ્થાનિક લોકોએ નગરપાલિકા અને સંબંધિત તંત્ર પાસે રખડતા ઢોરને પકડી સુરક્ષિત સ્થળે ખસેડવા માટે તાત્કાલિક અને અસરકારક કાર્યવાહી કરવાની માંગ કરી છે. લોકોનું કહેવું છે કે જો સમયસર કડક પગલાં નહીં ભરાય તો ભવિષ્યમાં વધુ ગંભીર અકસ્માતો સર્જાઈ શકે છે.
