કેન્દ્ર સરકારના કર્મચારીઓ માટે ગુડ ન્યૂઝ! : મોંઘવારી ભથ્થામાં થઈ શકે છે વધારો?

મોદી સરકાર કેન્દ્રીય કર્મચારીઓને મોટી ભેટ આપી શકે છે. કેન્દ્રીય કર્મચારીઓને જુલાઈ 2025થી મોંઘવારી ભથ્થા (DA)માં 4 ટકાના વધારાનો લાભ મળી શકે છે. તાજેતરમાં આવેલા મોંઘવારી રિપોર્ટના આધારે જણાઈ રહ્યું છે કે, કેન્દ્રના કર્મચારીઓના મોઘવારી ભથ્થામા વધારો થવાનો સંકેત છે. મોંઘવારી ભથ્થું વર્તમાન 55 ટકાથી વધીને 59 ટકા થઈ જશે. મોંઘવારી ભથ્થામાં આ વધારો જુલાઈથી અમલમાં આવશે, પરંતુ તેની સત્તાવાર જાહેરાત ઓગસ્ટ અથવા સપ્ટેમ્બર-ઓક્ટોબરમાં તહેવારોની નજીક થઈ શકે છે તેવી ચર્ચાઓ છે
CPI ડેટાના આધારે DA 59% સુધી પહોંચી શકે
મોંઘવારી ભથ્થું (DA)ની ગણતરી ઓલ ઈન્ડિયા કન્ઝ્યુમર પ્રાઇસ ઇન્ડેક્સ ફોર ઇન્ડસ્ટ્રિયલ વર્કર્સ (AICPI-IW)ના આધારે કરવામાં આવે છે. મે 2025માં આ ઇન્ડેક્સ 0.5 ટકા વધીને 144 થયો છે. છેલ્લા ત્રણ મહિનામાં ઇન્ડેક્સમાં વધારો જોવા મળ્યો છે. માર્ચ 2025માં તે 143 હતો, એપ્રિલમાં 143.5 હતો અને હવે મે 2025માં તે 144 પર પહોંચી ગયો છે. જો ઇન્ડેક્સમાં ઉપરનો ટ્રેન્ડ ચાલુ રહે અને જૂનમાં તે 144.5 પર પહોંચે, તો ઓલ ઈન્ડિયા કન્ઝ્યુમર પ્રાઇસ ઇન્ડેક્સ ફોર ઇન્ડસ્ટ્રિયલ વર્કર્સ (AICPI-IW)ની 12 મહિનાની સરેરાશ 144.17 ની આસપાસ પહોંચવાની ધારણા છે. જ્યારે તેને 7મા પગાર પંચના ફોર્મ્યુલાનો ઉપયોગ કરીને સમાયોજિત કરવામાં આવે છે, ત્યારે DA દર 58.85 ટકા સુધી પહોંચે છે. એટલે જ સરકાર જુલાઈ 2025થી મોંઘવારી ભથ્થું વધારીને 59 ટકા કરી શકે છે.
સરકાર ક્યાં મહિનામાં જાહેરાત કરી શકે?
મોંઘવારી ભથ્થું (DA) વર્ષમાં બે વાર વધતું હોય છે. આ વધારો સામાન્ય રીતે જાન્યુઆરી અને જુલાઈમાં થાય છે. મોંઘવારી ભથ્થું ઓલ ઈન્ડિયા કન્ઝ્યુમર પ્રાઈસ ઈન્ડેક્સ ફોર ઔદ્યોગિક કામદારો (AICPI-IW)ના 12 મહિનાના સરેરાશના આધારે નક્કી કરવામાં આવે છે. મોંઘવારી ભથ્થામાં વધારો જુલાઈથી અમલમાં આવશે, પરંતુ તે સામાન્ય રીતે પાછળથી જાહેર કરવામાં આવે છે. પાછલા વર્ષોમાં સરકારે સપ્ટેમ્બર અથવા ઓક્ટોબરમાં તહેવારોના સમયગાળાની આસપાસ આવો વધારો કર્યા છે. આ વર્ષે પણ તેની જાહેરાત દિવાળીની આસપાસ થઈ શકે છે. સાતમા પગાર પંચ હેઠળ મોંઘવારી ભથ્થામાં આ અંતિમ વધારો હશે, કારણ કે તેનો કાર્યકાળ 31 ડિસેમ્બર 2025 ના રોજ સમાપ્ત થાય છે. સરકારે આ વર્ષની શરૂઆતમાં આઠમા પગાર પંચની જાહેરાત કરી છે, પરંતુ તેમાં કોઈ વધુ પ્રગતિ થઈ નથી. સરકારે હજુ સુધી નવા કમિશનના ચેરમેન અને સભ્યોની નિમણૂક કરી નથી.