કેન્દ્રીય કર્મચારીઓ અને પેન્શનરો માટે જુલાઈ 2026નું મોંઘવારી ભથ્થું (DA) અને મોંઘવારી રાહત (DR) વધારાની રાહ હવે વધુ રસપ્રદ બની રહી છે. તાજેતરના ફુગાવાના આંકડા અને ઉપલબ્ધ ગણતરીઓના આધારે એવું માનવામાં આવી રહ્યું છે કે કેન્દ્ર સરકાર આગામી અર્ધવાર્ષિક સમીક્ષામાં DA માં વધુ 3 ટકાનો વધારો જાહેર કરી શકે છે. જો આ અંદાજ સાચો સાબિત થાય તો હાલના 60 ટકાના DAમાં વધારો થઈ તે 63 ટકા સુધી પહોંચી જશે.
કેન્દ્ર સરકાર સામાન્ય રીતે વર્ષમાં બે વખત, જાન્યુઆરી અને જુલાઈથી અમલમાં આવે તે રીતે DA અને DRમાં સુધારો કરે છે. જોકે તેની સત્તાવાર જાહેરાત સામાન્ય રીતે થોડા મહિના બાદ કરવામાં આવે છે. જુલાઈ 2026થી લાગુ થનારા વધારાની જાહેરાત સપ્ટેમ્બર અથવા ઓક્ટોબર મહિનામાં થવાની સંભાવના વ્યક્ત કરવામાં આવી રહી છે.
આ પણ વાંચો: શું સસ્તી થશે આંતરરાષ્ટ્રીય ફ્લાઇટ ટિકિટ? : જેટ ફ્યુઅલના ભાવમાં 27%નો મોટો ઘટાડો, જાણો શું અસર પડશે ભાડા પર?
CPI-IWના આંકડાઓથી વધારાના સંકેત
મોંઘવારી ભથ્થાની ગણતરી માટે કેન્દ્ર સરકાર ઓલ ઈન્ડિયા કન્ઝ્યુમર પ્રાઇસ ઇન્ડેક્સ ફોર ઈન્ડસ્ટ્રિયલ વર્કર્સ (CPI-IW)નો ઉપયોગ કરે છે. લેબર બ્યુરો દ્વારા જાહેર કરાયેલા એપ્રિલ 2026ના આંકડા અનુસાર CPI-IW 149.9 પર પહોંચ્યો છે, જે અગાઉની સરખામણીએ વધારો દર્શાવે છે.
જાન્યુઆરીથી એપ્રિલ 2026 સુધીના ઉપલબ્ધ આંકડાઓના આધારે નિષ્ણાતોનું માનવું છે કે DAની ગણતરી જૂન 2026 સુધી 63 ટકાથી વધુના સ્તરે રહી શકે છે. સરકાર DAને સામાન્ય રીતે પૂર્ણાંકમાં જાહેર કરતી હોવાથી 3 ટકાનો વધારો શક્ય માનવામાં આવી રહ્યો છે.
કર્મચારીઓને કેટલો મળશે ફાયદો?
જો DA માં 3 ટકાનો વધારો થાય તો કેન્દ્રીય કર્મચારીઓના માસિક વેતનમાં સીધી અસર જોવા મળશે. ઉદાહરણ તરીકે, 18,000 રૂપિયાના મૂળ પગાર ધરાવતા કર્મચારીને દર મહિને લગભગ 540 રૂપિયાનું વધારાનું DA મળશે.
જો સરકાર સપ્ટેમ્બર 2026માં વધારાની જાહેરાત કરે તો કર્મચારીઓને જુલાઈ, ઓગસ્ટ અને સપ્ટેમ્બર એમ ત્રણ મહિનાનું એરિયર મળશે. આ સ્થિતિમાં એરિયરનો અંદાજિત લાભ 1,620 રૂપિયા સુધી પહોંચી શકે છે.
જો જાહેરાત ઓક્ટોબરમાં થાય તો ચાર મહિનાના એરિયર સાથે આ રકમ લગભગ 2,160 રૂપિયા સુધી પહોંચી શકે છે. ઉચ્ચ મૂળ પગાર ધરાવતા કર્મચારીઓ માટે આ લાભ નોંધપાત્ર રીતે વધુ રહેશે.
આ પણ વાંચો: UPI યુઝર્સ માટે આજથી મોટો નિયમ : 1 જૂનથી Google Pay અને PhonePe પર મોટા ટ્રાન્ઝેક્શન માટે ફિંગરપ્રિન્ટ કે ફેસઆઈડી ફરજિયાત
પેન્શનરોને પણ મળશે રાહત
DA ની જેમ જ કેન્દ્ર સરકારના પેન્શનરોને મોંઘવારી રાહત (DR) આપવામાં આવે છે. તેથી DAમાં જે વધારો થશે તે જ પ્રમાણમાં DR માં પણ વધારો થવાની સંભાવના છે. પરિણામે લાખો પેન્શનરોની માસિક આવકમાં પણ વધારો થશે.
વધતી મોંઘવારી વચ્ચે આ વધારો નિવૃત્ત કર્મચારીઓ માટે ખાસ મહત્વનો માનવામાં આવે છે, કારણ કે દૈનિક જીવન ખર્ચમાં સતત વધારો થઈ રહ્યો છે.
8 મા પગાર પંચ વચ્ચે DA પર સૌની નજર
આ વખતે DA વધારો વધુ ચર્ચામાં છે કારણ કે તે 8 મા પગાર પંચની પ્રક્રિયા વચ્ચે આવી રહ્યો છે. કેન્દ્રીય કર્મચારી સંગઠનો લાંબા સમયથી માંગ કરી રહ્યા છે કે નવા પગાર પંચની ભલામણો અમલમાં આવે તે પહેલાં DA નો એક ભાગ મૂળ પગારમાં મર્જ કરવામાં આવે.
ગયા વર્ષે કેન્દ્ર સરકારે 8મા પગાર પંચની રચનાની જાહેરાત કરી હતી. હાલ પંચ દ્વારા વિવિધ મંત્રાલયો, કર્મચારી સંગઠનો અને અન્ય હિતધારકો પાસેથી સૂચનો મેળવવાની પ્રક્રિયા ચાલી રહી છે. એવી અપેક્ષા છે કે આગામી છ મહિનામાં પંચ પોતાની ભલામણો સરકારને સોંપી શકે છે.
મોટા એરિયરની પણ ચર્ચા
8મા પગાર પંચની ભલામણો 1 જાન્યુઆરી 2026થી પૂર્વવર્તી અસરથી લાગુ થવાની સંભાવનાઓ અંગે પણ ચર્ચા ચાલી રહી છે. જો સરકાર ભલામણોને રેટ્રોસ્પેક્ટિવ અસરથી અમલમાં મૂકે તો કર્મચારીઓને 18થી 20 મહિનાના મોટા એરિયરનો લાભ મળી શકે છે.
જોકે સરકાર તરફથી હજુ સુધી આ અંગે કોઈ સત્તાવાર જાહેરાત કરવામાં આવી નથી. તેથી કર્મચારીઓએ હાલ આ પ્રકારના અંદાજોને માત્ર સંભાવના તરીકે જ જોવાની જરૂર છે.
આ પણ વાંચો: શું સસ્તી થશે આંતરરાષ્ટ્રીય ફ્લાઇટ ટિકિટ? : જેટ ફ્યુઅલના ભાવમાં 27%નો મોટો ઘટાડો, જાણો શું અસર પડશે ભાડા પર?
અંતિમ નિર્ણય પર સૌની નજર
હાલ ઉપલબ્ધ CPI-IWના આંકડા 3 ટકાના DA વધારાની દિશામાં સંકેત આપી રહ્યા છે. જોકે અંતિમ નિર્ણય મે અને જૂન 2026ના ફુગાવાના આંકડા તથા કેન્દ્ર સરકારની મંજૂરી બાદ જ સ્પષ્ટ થશે. તેથી આગામી કેટલાક મહિના કેન્દ્રીય કર્મચારીઓ અને પેન્શનરો માટે મહત્વપૂર્ણ બની શકે છે.
