Vadodara News: આજે ચૈત્ર સુદ આઠમ અને મર્યાદા પુરુષોત્તમ ભગવાન શ્રી રામના જન્મોત્સવ એટલે કે રામનવમીનો પવિત્ર તહેવાર છે. આ શુભ અવસરે આગામી મહાનગરપાલિકાની ચૂંટણીને ધ્યાનમાં રાખીને વડોદરા શહેર કોંગ્રેસ અત્યારથી જ એક્શન મોડમાં આવી ગઈ છે. કોંગ્રેસે આજથી જ વડોદરામાં પોતાના ચૂંટણી પ્રચારના વિધિવત રીતે શ્રીગણેશ કર્યા છે.
ધાર્મિક આસ્થા સાથે રાજકીય પ્રારંભ
ચૂંટણી પ્રચારની શરૂઆત કરતા પહેલા વડોદરા શહેર કોંગ્રેસના તમામ અગ્રણીઓએ બહુચરાજી માતાના દર્શન કરી આશીર્વાદ મેળવ્યા હતા. ભક્તિમય વાતાવરણ વચ્ચે માતાજીના આશીર્વાદ લઈ કોંગ્રેસે શહેરમાં જનસંપર્ક વધારવા માટે કમર કસી છે.
'ઓટોરિક્ષા સ્ટીકર અભિયાન' દ્વારા લોકસંપર્ક
શહેરના દરેક ખૂણે અને સામાન્ય નાગરિક સુધી પોતાનો સંદેશ પહોંચાડવા માટે કોંગ્રેસે 'ઓટોરિક્ષા સ્ટીકર અભિયાન' લોન્ચ કર્યું છે. આ અભિયાન દ્વારા ઓટોરિક્ષાઓ પર કોંગ્રેસના પ્રચાર પ્રસાર માટેના સ્ટીકરો લગાડવામાં આવશે, જે શહેરના વિવિધ વિસ્તારોમાં ફરતી રહીને લોકોનું ધ્યાન ખેંચશે. રામનવમીના આ પવિત્ર દિવસે અમે જનતાની વચ્ચે જઈ રહ્યા છીએ. આ અભિયાન દ્વારા અમે શહેરના દરેક મધ્યમ અને ગરીબ વર્ગના લોકો સાથે સીધો સંવાદ સ્થાપિત કરીશું."
આગેવાનોની હાજરીમાં કાર્યકરોમાં ઉત્સાહ
આ કાર્યક્રમમાં વડોદરા શહેરના રાજકીય માંધાતાઓ ઉપસ્થિત રહ્યા હતા, જેમાં મુખ્યત્વે ઋત્વિજ જોશી વડોદરા શહેર કોંગ્રેસ પ્રમુખ, ચંદ્રકાંત શ્રીવાસ્તવ મહાનગરપાલિકાના વિપક્ષ નેતા, જાગૃતિબેન રાણા વડોદરા શહેર કોંગ્રેસ ઓબીસી વિભાગના ચેરમેન. આ નેતાઓ સાથે મોટી સંખ્યામાં કોંગ્રેસના અગ્રણીઓ અને ઉત્સાહી કાર્યકર્તાઓ પણ જોડાયા હતા. આગામી મ્યુનિસિપલ કોર્પોરેશનની ચૂંટણીમાં ભાજપ સામે મજબૂત પડકાર ફેંકવા માટે કોંગ્રેસે અત્યારથી જ પાયાનું કામ શરૂ કરી દીધું હોય તેમ જણાય છે.
