Commonwealth Games 2026 Opening Ceremony: ગ્લાસગો: સ્કોટલેન્ડના ગ્લાસગોમાં ગુરુવારે કોમનવેલ્થ ગેમ્સ 2026નો ભવ્ય પ્રારંભ થયો. વિશ્વપ્રસિદ્ધ OVO હાઇડ્રો એરિનામાં યોજાયેલા ઉદ્ઘાટન સમારોહમાં સ્કોટલેન્ડની સંસ્કૃતિ, સંગીત અને આધુનિક ટેક્નોલોજીનો અનોખો સમન્વય જોવા મળ્યો. રંગબેરંગી લાઇટ શો, સાંસ્કૃતિક કાર્યક્રમો અને ખેલાડીઓની પરેડ સાથે આગામી 11 દિવસ સુધી ચાલનારા રમતોત્સવનો સત્તાવાર પ્રારંભ થયો.
આ વખતે કોમનવેલ્થ ગેમ્સનું આયોજન અગાઉની આવૃત્તિઓની સરખામણીએ વધુ કોમ્પેક્ટ સ્વરૂપમાં કરવામાં આવ્યું છે. જોકે સ્પર્ધાની ગુણવત્તા અને વૈશ્વિક સ્તરના આયોજનમાં કોઈ કમી ન રહે તે માટે આયોજકોએ વિશેષ આયોજન કર્યું છે. હવે વિશ્વભરના રમતપ્રેમીઓની નજર મેડલની જંગ અને નવા રેકોર્ડ્સ પર રહેશે.
ભારતીય દળની શાનદાર એન્ટ્રી
'પરેડ ઓફ નેશન્સ' દરમિયાન ભારતીય દળની એન્ટ્રી ખાસ આકર્ષણનું કેન્દ્ર બની હતી. ટોક્યો ઓલિમ્પિક્સમાં રજત ચંદ્રક જીતનાર વેઇટલિફ્ટર મીરાબાઈ ચાનૂ ભારતીય તિરંગા સાથે ધ્વજવાહક તરીકે આગળ રહી હતી, જ્યારે ટોક્યો ઓલિમ્પિક્સની કાંસ્ય પદક વિજેતા બોક્સર લવલીના બોર્ગોહેને કોમનવેલ્થ બેટન સાથે ભારતીય દળનું નેતૃત્વ કર્યું હતું. ભારતીય ટીમ એરિનામાં પ્રવેશતા જ દર્શકોએ તાળીઓના ગડગડાટ સાથે તેમનું સ્વાગત કર્યું હતું.
પરંપરા મુજબ બ્રિટનના રાજા કિંગ ચાર્લ્સ ત્રીજાએ કોમનવેલ્થ ગેમ્સ 2026ને સત્તાવાર રીતે ખુલ્લી જાહેર કરી હતી. નોંધનીય છે કે 2014 બાદ બીજી વખત ગ્લાસગોને આ રમતોની યજમાની મળી છે.
125 ખેલાડીઓ સાથે ભારતનું મેડલ મિશન
આ વખતે ભારતે 125 સભ્યોનું મજબૂત દળ મોકલ્યું છે, જે પેરા સ્પોર્ટ્સ સહિત કુલ 13 રમતોમાં ભાગ લઈ રહ્યું છે. રસપ્રદ વાત એ છે કે ઉદ્ઘાટન સમારોહ પહેલાં જ ભારતનો અભિયાન શરૂ થઈ ગયો હતો અને ભારતીય લોન્સ બાઉલ્સ ટીમે સૌપ્રથમ સ્પર્ધામાં ભાગ લીધો હતો.
ભારતને આ વખતે એથ્લેટિક્સ, વેઇટલિફ્ટિંગ, બોક્સિંગ, બેડમિન્ટન, ટેબલ ટેનિસ અને અન્ય રમતોમાં મેડલ જીતવાની આશા છે. ખાસ કરીને ઓલિમ્પિક ચેમ્પિયન નીરજ ચોપરા, વેઇટલિફ્ટર મીરાબાઈ ચાનૂ અને બોક્સર લવલીના બોર્ગોહેન પર દેશની સૌથી વધુ નજર રહેશે. બર્મિંગહામ 2022માં ભારતે નોંધપાત્ર સફળતા મેળવી હતી અને આ વખતે પણ તે પ્રદર્શનને દોહરાવવાનો પ્રયાસ રહેશે.
74 દેશો વચ્ચે મેડલ માટે જંગ
કોમનવેલ્થ ગેમ્સની 23મી આવૃત્તિમાં 74 દેશોના ખેલાડીઓ 10 રમતોમાં પોતાનું કૌશલ્ય અજમાવી રહ્યા છે. તમામ સ્પર્ધાઓ ગ્લાસગોના સ્કોટિશ ઇવેન્ટ કેમ્પસ, સ્કોટસ્ટાઉન સ્ટેડિયમ, ટોલક્રોસ ઇન્ટરનેશનલ સ્વિમિંગ સેન્ટર અને ગ્લાસગો એરિના સહિતના મુખ્ય સ્થળોએ યોજાશે.
આગામી 11 દિવસ દરમિયાન વિશ્વના શ્રેષ્ઠ ખેલાડીઓ વચ્ચે મેડલ માટે રસાકસી જોવા મળશે. દરેક સ્પર્ધા બાદ મેડલ ટેલીમાં થતા ફેરફારો પર પણ રમતપ્રેમીઓની નજર રહેશે.
ગુજરાત માટે કેમ મહત્વની છે આ ગેમ્સ?
કોમનવેલ્થ ગેમ્સ માત્ર ભારત માટે જ નહીં, પરંતુ ગુજરાત માટે પણ ખાસ મહત્વ ધરાવે છે. છેલ્લા કેટલાક વર્ષોમાં ગુજરાતમાં રમતગમતનું માળખું ઝડપથી વિકસ્યું છે. ખેલ મહાકુંભ, જિલ્લા અને રાજ્ય કક્ષાની સ્પર્ધાઓ તેમજ આધુનિક સ્પોર્ટ્સ ઇન્ફ્રાસ્ટ્રક્ચરના કારણે રાજ્યમાંથી આંતરરાષ્ટ્રીય સ્તરે પહોંચનારા ખેલાડીઓની સંખ્યા સતત વધી રહી છે. ત્યારે તમને જણાવી દઈએ કે, કોમેનવેલ્થ ગેમ્સ 2030 અમદાવાદમાં યોજવા જઈ રહી છે.
રમતવિશેષજ્ઞોના મતે, આંતરરાષ્ટ્રીય સ્તરે ભારતનું સતત સારું પ્રદર્શન રાજ્ય સરકારો માટે પણ રમતગમતમાં વધુ રોકાણ અને યુવા પ્રતિભાને પ્રોત્સાહન આપવાનો માર્ગ મોકળો કરે છે. ગુજરાતમાં આગામી વર્ષોમાં યોજાનારી વિવિધ રાષ્ટ્રીય સ્પર્ધાઓ અને ખેલ વિકાસ યોજનાઓને પણ આવી સફળતાઓથી પ્રેરણા મળી શકે છે.
ભારતની મેડલ ટેલી પર રહેશે નજર
બર્મિંગહામ 2022માં ભારતે શાનદાર પ્રદર્શન કરીને મેડલ ટેલીમાં ટોચના દેશોમાં સ્થાન મેળવ્યું હતું. આ વખતે પણ ભારતીય દળ પાસેથી સમાન અથવા તેનાથી વધુ સારું પ્રદર્શન કરવાની અપેક્ષા છે. આગામી 11 દિવસ દરમિયાન ભારતના દરેક મેડલ પર સમગ્ર દેશની સાથે ગુજરાતના રમતપ્રેમીઓની પણ નજર રહેશે.
