ઓપરેશન સિંદૂર બાદ પાકિસ્તાનના કિરાના હિલ્સથી રેડિએશન લીક થવાનો દાવો : પરમાણુ એજન્સીએ જણાવી અંદરની સચ્ચાઈ

ઓપરેશન સિંદૂર હેઠળ ભારતીય સેનાએ પાકિસ્તાનમાં 9 આતંકવાદી ઠેકાણાઓનો નાશ કર્યો હતો. ત્યારથી એવો દાવો કરવામાં આવી રહ્યો છે કે ત્યાં રેડિયેશન લીક થઈ રહ્યું છે. અમેરિકા પણ આ બાબતે મૌન રહ્યું છે. દરમિયાન આંતરરાષ્ટ્રીય પરમાણુ ઉર્જા એજન્સીએ આ મામલે એક નિવેદન જારી કર્યું છે. એજન્સીએ બુધવારે કહ્યું કે પાકિસ્તાનના કોઈપણ પરમાણુ કેન્દ્ર પર રેડિયેશન કે લીકેજની કોઈ ઘટના બની નથી.

ઊર્જા એજન્સીએ શું કહ્યું?
અહેવાલ મુજબ પરમાણુ ઉર્જા એજન્સીના પ્રેસ વિભાગના પ્રવક્તાએ કહ્યું કે અમને આની જાણ છે. એજન્સી પાસે ઉપલબ્ધ માહિતી અનુસાર પાકિસ્તાનના કોઈપણ પરમાણુ મથકમાંથી કોઈ રેડિયેશન લીકેજ થયું નથી. અગાઉ, કેટલાક વિદેશી મીડિયા સંગઠનો સોશિયલ મીડિયા પર દાવો કરી રહ્યા હતા કે ભારત દ્વારા હાથ ધરવામાં આવેલા ઓપરેશન સિંદૂરમાં કિરાના હિલ્સને નિશાન બનાવવામાં આવ્યું હતું. જ્યાં પાકિસ્તાન પાસે પરમાણુ શસ્ત્રોનો ભંડાર છે.

ભારતે હુમલાનો કર્યો ઇનકાર
અગાઉ, ભારતીય વાયુસેનાના ડિરેક્ટર જનરલ એર ઓપરેશન્સ એર માર્શલ એકે ભારતીએ આ દાવાઓને સંપૂર્ણપણે નકારી કાઢતા મીડિયાને કહ્યું હતું કે અમને ખબર નહોતી કે કિરાના હિલ્સમાં પરમાણુ શસ્ત્રો રાખવામાં આવ્યા છે, અમને આની જાણ નહોતી. અમે કિરાના હિલ્સને નિશાન બનાવ્યું નથી. આ મામલે વિદેશ મંત્રાલયના પ્રવક્તાનું નિવેદન પણ બહાર આવ્યું છે. મંત્રાલયના પ્રવક્તા રણધીર જયસ્વાલે કહ્યું કે અમારી લશ્કરી કાર્યવાહી સંપૂર્ણપણે પરંપરાગત મર્યાદામાં હતી.

અમેરિકાએ કહ્યું-અમને આ વાતની જાણ નથી
પરમાણુ ઉર્જા એજન્સીએ રેડિયેશન લીકેજને કારણે ભારત અને પાકિસ્તાન વચ્ચે યુદ્ધવિરામ થયો હોવાની અટકળોને ફગાવી દીધી. આ મામલે યુએસ વિદેશ મંત્રાલયના પ્રવક્તાએ પણ એક નિવેદન બહાર આવ્યું છે. તેમણે કહ્યું કે આ સમયે મારી પાસે આ મુદ્દે કંઈ કહેવાનું નથી.

આ કરાર 1988માં ભારત અને પાકિસ્તાન વચ્ચે થયો હતો
તમને જણાવી દઈએ કે ઓપરેશન સિંદૂર હેઠળ, વાયુસેનાએ પાકિસ્તાનમાં સરગોધા અને નૂર ખાન વાયુસેના બેઝ સહિત એક ડઝન લશ્કરી ઠેકાણાઓ પર હુમલો કર્યો હતો. આ હુમલાઓ પછી, સોશિયલ મીડિયા પર એક અફવા ફેલાઈ હતી કે સરગોધાથી 20 કિમી દૂર કિરાના હિલ્સ પર પણ હુમલો કરવામાં આવ્યો હતો જેના કારણે રેડિયેશન લીક થવા લાગ્યું છે. નોંધનીય છે કે 1998માં ભારત અને પાકિસ્તાન વચ્ચે એકબીજાના પરમાણુ સુવિધાઓ પર હુમલો ન કરવાનો કરાર થયો હતો.