CJP Student Protest Warning: દેશભરમાં વિદ્યાર્થી આંદોલન અને પેપર લીકના મુદ્દે શરૂ થયેલી રાજકીય ચર્ચા વચ્ચે હવે 'કોકરોચ જનતા પાર્ટી' (CJP)એ કેન્દ્ર સરકારને ફરી ચેતવણી આપી છે. જંતર-મંતર પર લાંબા સમય સુધી ચાલેલા વિરોધ પ્રદર્શનને સ્થગિત કર્યા બાદ CJPએ આરોપ લગાવ્યો છે કે, સરકાર સાથે થયેલા સમજૂતીના મુદ્દાઓનું પાલન કરવામાં આવ્યું નથી. પાર્ટીનું કહેવું છે કે વિદ્યાર્થીઓ અને આંદોલનકારીઓ સામે હજુ પણ પોલીસ કાર્યવાહી થઈ રહી છે, જેના કારણે તેઓ ફરીથી આંદોલનનો માર્ગ અપનાવવા મજબૂર થઈ શકે છે. CJPના પ્રવક્તા આશુતોષ રાંકાએ સોશિયલ મીડિયા પ્લેટફોર્મ X પર પોસ્ટ કરીને કેન્દ્રીય મંત્રી જે.પી. નડ્ડા અને ડૉ. જીતેન્દ્ર સિંહને ટેગ કર્યા હતા. તેમણે દાવો કર્યો કે સરકાર સાથે થયેલી સમજૂતી મુજબ આંદોલનકારીઓ સામે કોઈ પોલીસ કાર્યવાહી નહીં થાય તેવી ખાતરી આપવામાં આવી હતી. જોકે, તેમના જણાવ્યા મુજબ કેટલાક રાજ્યોમાં વિદ્યાર્થીઓની ધરપકડ અને અન્ય કાર્યવાહી ચાલુ છે.
સમજૂતીનું પાલન ન થવાનો CJPનો આરોપ
આશુતોષ રાંકાએ પોતાના નિવેદનમાં દાવો કર્યો કે સમજૂતી મુજબ આંદોલન સાથે જોડાયેલા વિદ્યાર્થીઓ સામે પોલીસ કેસ નોંધવામાં નહીં આવે અને કોઈપણ પ્રકારની દંડાત્મક કાર્યવાહી કરવામાં નહીં આવે. તેમણે આરોપ લગાવ્યો કે, બિહાર અને પશ્ચિમ બંગાળમાં મોટી સંખ્યામાં વિદ્યાર્થીઓની ધરપકડ કરવામાં આવી છે. ઉપરાંત દિલ્હીમાં પણ કેટલાક વિદ્યાર્થીઓ પર નજર રાખવામાં આવી રહી હોવાનું અને હેરાનગતિ થતી હોવાનો દાવો તેમણે કર્યો.
તમામ કેસ પાછા ખેંચવાની માંગ
CJPએ સરકાર સમક્ષ માંગણી કરી છે કે, વિદ્યાર્થીઓ સામે નોંધાયેલા તમામ કેસ તાત્કાલિક અસરથી પાછા ખેંચવામાં આવે. સાથે જ ભવિષ્યમાં પણ આંદોલન સાથે જોડાયેલા વિદ્યાર્થીઓ સામે કોઈ નવી કાયદાકીય કાર્યવાહી ન કરવામાં આવે. પાર્ટીએ કેન્દ્ર સરકારને આ મુદ્દે સ્પષ્ટ માહિતી આપવા પણ અપીલ કરી છે અને પૂછ્યું છે કે, સરકાર આ મામલે શું પગલાં લઈ રહી છે અથવા આગળ શું કાર્યવાહી કરશે.
ફરી જંતર-મંતર પર આંદોલનની ચીમકી
આશુતોષ રાંકાએ જણાવ્યું કે જો વિદ્યાર્થીઓ સામેની કાર્યવાહી બંધ નહીં થાય અને કેસો પાછા નહીં ખેંચવામાં આવે તો CJP ફરીથી દિલ્હીના જંતર-મંતર પર ધરણાં શરૂ કરશે. તેમણે કહ્યું કે, વિદ્યાર્થીઓના હિતોની રક્ષા માટે ફરીથી વિરોધ પ્રદર્શન કરવાનો નિર્ણય લેવામાં આવી શકે છે.
સત્તાવાર પુષ્ટિ હજુ સામે નથી આ સમગ્ર મામલે નોંધપાત્ર બાબત એ છે કે, CJP દ્વારા કરવામાં આવેલા દાવાઓ અંગે હજુ સુધી સંબંધિત સત્તાવાર એજન્સીઓ અથવા સરકાર તરફથી કોઈ સત્તાવાર પુષ્ટિ જાહેર કરવામાં આવી નથી. તે ઉપરાંત, આ સમાચાર લખાય ત્યાં સુધી વિદ્યાર્થીઓ સામે કેસ નોંધાયા હોવાના અથવા મોટા પાયે ધરપકડ થઈ હોવાના દાવાઓ અંગે સ્વતંત્ર સત્તાવાર માહિતી પણ ઉપલબ્ધ નથી. CJPના પ્રવક્તાએ પણ પોતાના નિવેદનમાં કોઈ ચોક્કસ કેસ અથવા FIRનો ઉલ્લેખ કર્યો નથી.
સરકારની પ્રતિક્રિયાની રાહ
હાલ CJPએ કેન્દ્ર સરકાર પર સમજૂતીનું પાલન ન કરવાનો આરોપ મૂક્યો છે, જ્યારે સરકાર તરફથી આક્ષેપો અંગે કોઈ સત્તાવાર નિવેદન આવ્યું નથી. આગામી દિવસોમાં સરકાર તરફથી પ્રતિક્રિયા અને આંદોલન અંગે CJPના આગામી પગલાં પર સૌની નજર રહેશે. હાલ આ મુદ્દો રાજકીય અને વિદ્યાર્થી સંગઠનો વચ્ચે ચર્ચાનો વિષય બન્યો છે.
