CJP Protest: સંસદના ચોમાસુ સત્રના પ્રથમ જ દિવસે દિલ્હીમાં વિરોધ પ્રદર્શન હિંસક બન્યા બાદ રાજધાનીમાં આજે પણ તણાવપૂર્ણ સ્થિતિ યથાવત છે. કોકરોચ જનતા પાર્ટી (CJP)એ સ્પષ્ટ કર્યું છે કે પોલીસ કાર્યવાહી છતાં તેમનું "સંસદ ચલો" અભિયાન અટકશે નહીં અને મંગળવારે પણ સંસદ તરફ માર્ચ કાઢવામાં આવશે. બીજી તરફ દિલ્હી પોલીસે સુરક્ષા વ્યવસ્થા વધુ કડક બનાવી છે અને સંસદ તથા જંતર-મંતર આસપાસના વિસ્તારોમાં વધારાનો પોલીસ બંદોબસ્ત ગોઠવી દીધો છે. સોમવારે પ્રદર્શન દરમિયાન પોલીસ અને આંદોલનકારીઓ વચ્ચે થયેલી અથડામણ બાદ રાજધાનીનું વાતાવરણ વધુ ગરમાયું છે. પોલીસના જણાવ્યા મુજબ હિંસક ઘર્ષણમાં 118થી વધુ પોલીસકર્મીઓ ઘાયલ થયા છે, જ્યારે અનેક પ્રદર્શનકારીઓને પણ ઈજાઓ પહોંચી હોવાનું સામે આવ્યું છે. ઘટનાના વીડિયો સોશિયલ મીડિયા પર વાયરલ થયા બાદ સમગ્ર મામલો દેશભરમાં ચર્ચાનો વિષય બન્યો છે.
પોલીસ કાર્યવાહી છતાં આંદોલન ચાલુ રાખવાની જાહેરાત
સોમવારે મોડી રાત્રે CJPના સ્થાપક અભિજીત દીપકેએ જાહેરાત કરી હતી કે આંદોલન પાછું ખેંચવામાં આવશે નહીં. તેમના જણાવ્યા મુજબ જ્યાં સુધી મુખ્ય માંગણીઓ સ્વીકારવામાં નહીં આવે ત્યાં સુધી સંસદ માર્ચ અને વિરોધ પ્રદર્શન ચાલુ રહેશે. દિલ્હી પોલીસે દિવસ દરમિયાન જંતર-મંતર પરથી પ્રદર્શનનું મંચ અને બેરિકેડ્સ હટાવી દીધા હતા. જોકે મોડી રાત્રે ફરી મોટી સંખ્યામાં પ્રદર્શનકારીઓ ત્યાં એકત્ર થયા અને અસ્થાયી તંબૂ તથા નવું મંચ તૈયાર કરીને રાતભર ધરણું ચાલુ રાખ્યું હતું.
શું છે આંદોલનની મુખ્ય માંગણીઓ?
CJP અને તેની સાથે જોડાયેલા વિદ્યાર્થીઓ છેલ્લા કેટલાક અઠવાડિયાથી જંતર-મંતર પર સતત વિરોધ પ્રદર્શન કરી રહ્યા છે. તેમનો મુખ્ય મુદ્દો પરીક્ષા વ્યવસ્થામાં થયેલી ગેરરીતિઓ સામે કાર્યવાહી અને કેન્દ્રીય શિક્ષણ મંત્રી ધર્મેન્દ્ર પ્રધાનના રાજીનામાની માંગ છે. આંદોલનને સામાજિક કાર્યકર્તા સોનમ વાંગચુકનું પણ સમર્થન મળ્યું હતું, જેમણે અનિશ્ચિતકાલીન ભૂખ હડતાળ શરૂ કરી હતી. બાદમાં તેમની તબિયત બગડતાં પોલીસે તેમને હોસ્પિટલમાં ખસેડ્યા હતા. CJPનું કહેવું છે કે, સરકાર તેમની માંગણીઓ અંગે સ્પષ્ટ નિર્ણય નહીં લે ત્યાં સુધી વિરોધ ચાલુ રહેશે. બીજી તરફ કેન્દ્ર સરકારે વાર્તાલાપ દ્વારા ઉકેલ લાવવાનો પ્રયાસ ચાલુ રાખ્યો હોવાનું પણ સામે આવ્યું છે.
આ પણ વાંચો: જંતર-મંતર પર CJPનું પ્રદર્શન બન્યું હિંસક : 118થી વધુ પોલીસકર્મી ઘાયલ, 70 લોકો પોલીસ કસ્ટડીમાં
સંસદ ચલો માર્ચ દરમિયાન શું બન્યું?
ચોમાસુ સત્રના પ્રથમ દિવસે હજારો લોકો "સંસદ ચલો" માર્ચમાં જોડાયા હતા. સંસદ તરફ આગળ વધી રહેલી ભીડને રોકવા માટે પોલીસે અનેક સ્થળોએ બેરિકેડ્સ ગોઠવ્યા હતા. ત્યારબાદ સ્થિતિ બગડતાં કેટલાક વિસ્તારોમાં પથ્થરમારો થયો હોવાનું પોલીસનું કહેવું છે, જ્યારે ભીડને વિખેરવા માટે ટીયર ગેસના શેલ છોડવામાં આવ્યા અને લાઠીચાર્જ કરવામાં આવ્યો હતો. દિલ્હી પોલીસના જણાવ્યા અનુસાર આ અથડામણમાં 118થી વધુ પોલીસકર્મીઓ ઘાયલ થયા છે. બીજી તરફ પ્રદર્શનકારીઓએ પણ પોલીસ પર બળપ્રયોગના આરોપ લગાવ્યા છે. આ સમગ્ર ઘટનાના અનેક વીડિયો અને તસવીરો સોશિયલ મીડિયા પર ઝડપથી વાયરલ થયા છે.
સરકાર સાથે વાટાઘાટોનો પ્રયાસ
હિંસક ઘટનાક્રમ વચ્ચે સરકાર અને પ્રદર્શનકારીઓ વચ્ચે સંવાદની પ્રક્રિયા પણ શરૂ થઈ હતી. CJPના પ્રતિનિધિમંડળે કેન્દ્રીય મંત્રી જે.પી. નડ્ડા સાથે બે તબક્કામાં બેઠક કરી હતી અને પોતાની મુખ્ય માંગણીઓ સાથેનું લેખિત મેમોરેન્ડમ સોંપ્યું હતું. જોકે બેઠક બાદ પણ કોઈ સ્પષ્ટ સમાધાન સામે આવ્યું નથી અને પ્રદર્શન ચાલુ રાખવાની જાહેરાત કરવામાં આવી છે.
દિલ્હીમાં આજે સુરક્ષા વધુ કડક
આજે ફરી સંસદ માર્ચની જાહેરાત બાદ દિલ્હી પોલીસે સંસદ વિસ્તાર, જંતર-મંતર અને આસપાસના સંવેદનશીલ વિસ્તારોમાં સુરક્ષા વ્યવસ્થા વધારી દીધી છે. CCTV ફૂટેજ અને મોબાઇલ વીડિયોના આધારે હિંસાની તપાસ ચાલી રહી છે, જ્યારે અનેક FIR નોંધવાની પ્રક્રિયા પણ શરૂ કરવામાં આવી છે. પોલીસે લોકોને કાયદો અને વ્યવસ્થા જાળવવામાં સહકાર આપવા અપીલ કરી છે. હવે સૌની નજર આજે યોજાનારી સંસદ માર્ચ પર છે. સરકાર અને CJP વચ્ચે સમાધાનનો કોઈ માર્ગ નીકળે છે કે ફરી એકવાર દિલ્હીના રસ્તાઓ પર અથડામણનું દૃશ્ય સર્જાય છે, તે આગામી કલાકોમાં સ્પષ્ટ થશે.
