વડોદરા જિલ્લાના વાઘોડિયા તાલુકામાંથી પસાર થતી નર્મદા મેન કેનાલ પર બાળકોના ખતરનાક સ્ટંટનો એક વીડિયો સોશિયલ મીડિયા પર વાયરલ થતા ચિંતા વ્યાપી છે. વાયરલ થયેલા વીડિયોમાં કેટલાક બાળકો બ્રિજ પરથી સીધા કેનાલના ઊંડા પાણીમાં છલાંગ લગાવતા જોવા મળી રહ્યા છે, જેને લઈને સ્થાનિકોમાં સુરક્ષા વ્યવસ્થાને લઈને ગંભીર પ્રશ્નો ઊભા થયા છે.
મળતી માહિતી મુજબ, નર્મદા મેન કેનાલ પાસેથી પસાર થતા એક વાહનચાલકે આ દ્રશ્યો પોતાના મોબાઇલમાં કેદ કર્યા હતા. વીડિયોમાં સ્પષ્ટ જોવા મળે છે કે એક પછી એક બાળકો બ્રિજની ઊંચાઈ પરથી કેનાલમાં કૂદકો લગાવી રહ્યા છે. આ સમગ્ર ઘટના ખૂબ જોખમી હોવા છતાં આસપાસ કોઈ સુરક્ષા વ્યવસ્થા અથવા દેખરેખ ન હોવાની પણ ચર્ચા ઉઠી છે.
સ્થાનિક લોકોના જણાવ્યા અનુસાર, નર્મદા મેન કેનાલમાં પાણીનો પ્રવાહ ઘણીવાર તેજ રહે છે અને પાણી પણ ખૂબ ઊંડું હોય છે. આવી સ્થિતિમાં બ્રિજ પરથી કૂદકો લગાવવો જીવલેણ સાબિત થઈ શકે છે. અગાઉ પણ નર્મદા કેનાલમાં ડૂબી જવાની અનેક ઘટનાઓ બની ચૂકી છે, છતાં બાળકો આ રીતે સ્ટંટ કરતા હોવા ચિંતાજનક ગણાય છે.
આ ઘટના સામે આવતા નર્મદા નિગમના અધિકારીઓના પેટ્રોલિંગ અને દેખરેખ અંગે પણ પ્રશ્નો ઉભા થયા છે. સ્થાનિકોના મતે જો નિયમિત પેટ્રોલિંગ અને સુરક્ષા વ્યવસ્થા મજબૂત કરવામાં આવે તો આવી જોખમી પ્રવૃત્તિઓ અટકાવી શકાય.
વિસ્તારના લોકોએ તંત્ર પાસે માંગણી કરી છે કે નર્મદા મેન કેનાલ પાસે સુરક્ષા વધારવામાં આવે, બ્રિજ પર ચેતવણી બોર્ડ મૂકવામાં આવે અને આવા જોખમી સ્ટંટ કરતા બાળકોને રોકવા માટે કડક પગલાં લેવામાં આવે.
આ ઘટના ફરી એકવાર એ પ્રશ્ન ઉભો કરે છે કે વારંવાર બનતી દુર્ઘટનાઓ છતાં પણ તંત્ર દ્વારા પૂરતી સાવચેતી કેમ લેવામાં આવતી નથી. સ્થાનિકો હવે આશા રાખી રહ્યા છે કે વાયરલ થયેલા આ વીડિયો બાદ જવાબદાર તંત્ર જાગશે અને ભવિષ્યમાં કોઈ દુર્ઘટના ન બને તે માટે યોગ્ય કાર્યવાહી કરશે.
