અમેરિકાના રાષ્ટ્રપતિ ડોનાલ્ડ ટ્રમ્પ અને રશિયાના રાષ્ટ્રપતિ વ્લાદિમીર પુતિન વચ્ચે અલાસ્કાના એન્કોરેજ શહેરમાં મહત્વપૂર્ણ શિખર સંમેલન યોજાયું. ત્રણ કલાક ચાલેલી આ બેઠકમાં બંને દેશોના પ્રતિનિધિમંડળો હાજર રહ્યા હતા. મુખ્યત્વે યુક્રેન યુદ્ધના અંત માટે ચર્ચા થઈ, જોકે કોઈ અંતિમ કરાર સુધી પહોંચવામાં સફળતા મળી ન હતી.
બેઠક અંગે બંનેનું નિવેદન
ટ્રમ્પે સ્પષ્ટ કર્યું કે "જ્યાં સુધી સંપૂર્ણ સહમતિ ન થાય, ત્યાં સુધી કોઈ કરાર થશે નહીં." તેમણે સ્વીકાર્યું કે કેટલાક મુદ્દાઓ પર સહમતિ થઈ છે, પરંતુ અનેક મુદ્દાઓ હજી અપૂર્ણ છે. પુતિને વાટાઘાટોને "સઘન અને ઉપયોગી" ગણાવી અને જણાવ્યું કે રશિયા યુદ્ધનો અંત લાવવા માંગે છે, પરંતુ તેની "અગત્યની ચિંતાઓ"નું ધ્યાન રાખવું પડશે.
વિશેષ સ્વાગત અને પ્રતિનિધિમંડળો
પુતિનનું યુએસ આગમન સમયે બી-2 બોમ્બર દ્વારા સ્વાગત કરવામાં આવ્યું હતું. રેડ કાર્પેટ પર પુતિન આવ્યા ત્યારે ટ્રમ્પે તાળીઓ પાડી. બંને નેતાઓએ પોતાના ટોચના સલાહકારો સાથે "ત્રણ-ત્રણ" ફોર્મેટમાં બેઠક કરી. અમેરિકાની બાજુએ માર્કો રુબિયો સહિતના અધિકારીઓ હાજર રહ્યા, જ્યારે રશિયાની બાજુએ સેરગેઈ લવરોવ અને નાણામંત્રી એન્ટોન સિલુઆનોવ સાથે આર્થિક સલાહકાર કિરિલ દિમિત્રીવ સામેલ હતા.મીડિયા સાથે વાતચીત અને પુતિનની ચેતવણી
સંયુક્ત પત્રકાર પરિષદ દરમિયાન બંને નેતાઓએ પત્રકારોના પ્રશ્નોના જવાબ આપ્યા ન હતા. પુતિને ચેતવણી આપી કે "પડદા પાછળ ઉશ્કેરણી કે કાવતરું" પ્રગતિને અવરોધી શકે છે. તેમણે સ્પષ્ટ કહ્યું કે યુક્રેનનો મુદ્દો રશિયાની રાષ્ટ્રીય સુરક્ષા સાથે સંબંધિત છે અને યુરોપમાં સુરક્ષા સંતુલન પુનઃસ્થાપિત થવું જોઈએ.
રશિયા-યુક્રેનનું વલણ
રશિયાની મુખ્ય માંગ એ છે કે યુક્રેન NATOમાં જોડાવાની મહત્વાકાંક્ષા છોડી દે અને તેના કબ્જામાં આવેલા પૂર્વીય પ્રદેશોને સ્વીકારી લે. યુક્રેનએ આ માંગણીઓને નકારી કાઢી છે અને સુરક્ષા ગેરંટી વિના કોઈ પણ કરાર અસંભવ ગણાવ્યો છે.
ભવિષ્યની સંભાવનાઓ
ટ્રમ્પે જણાવ્યું કે કેટલાક મુદ્દાઓ પર સંમતિ થઈ છે, પરંતુ યુક્રેન યુદ્ધના અંત માટે કોઈ રોડમેપ તૈયાર થયો નથી. પુતિને સહકારની આશા વ્યક્ત કરી અને સ્ટેજ છોડતા પહેલાં અંગ્રેજીમાં કહ્યું – “આવતી વખતે મોસ્કોમાં.”
ટ્રમ્પે અગાઉ પુતિનની ખુલ્લેઆમ પ્રશંસા કરી હતી. 2018ની હેલસિંકી બેઠક બાદ અમેરિકામાં તેમને ભારે ટીકા ભોગવવી પડી હતી, કારણ કે તેમણે અમેરિકન ગુપ્તચર એજન્સીઓ કરતાં પુતિનના નિવેદન પર વધારે ભાર મૂક્યો હતો.
કડક ચેતવણી
વ્હાઇટ હાઉસ પરત જવા પહેલાં ટ્રમ્પે સ્વીકાર્યું કે તેઓ પુતિનથી નિરાશ છે અને ચેતવણી આપી કે જો યુદ્ધવિરામ ન થાય તો રશિયાને "ગંભીર પરિણામો" ભોગવવા પડશે. તેમ છતાં, આ બેઠકને ઐતિહાસિક માનવામાં આવી રહી છે, કારણ કે 1867માં અમેરિકાએ રશિયા પાસેથી અલાસ્કા ખરીદ્યું હતું.
