કોલકાતા: પશ્ચિમ બંગાળના રાજકારણમાં એક નવા અધ્યાયનો પ્રારંભ થયો છે. આજે રાજભવન ખાતે આયોજિત ભવ્ય શપથવિધિ સમારોહમાં મુખ્યમંત્રી શુભેન્દુ અધિકારીની સરકારનું પ્રથમ મંત્રીમંડળ વિસ્તરણ કરવામાં આવ્યું છે. રાજ્યપાલ આર.એન. રવિ દ્વારા કુલ 35 નવા મંત્રીઓને હોદ્દા અને ગુપ્તતાના શપથ લેવડાવવામાં આવ્યા હતા. આ મહત્વપૂર્ણ કાર્યક્રમમાં મુખ્યમંત્રી શુભેન્દુ અધિકારી પણ ખાસ ઉપસ્થિત રહ્યા હતા. આ વિસ્તરણ સાથે હવે રાજ્યમાં મંત્રીઓની કુલ સંખ્યા વધીને 41 થઈ ગઈ છે, જે સરકારની કામગીરીને વધુ ગતિશીલ બનાવશે.
આ શપથવિધિ બાદ પશ્ચિમ બંગાળમાં સરકારનું માળખું સંપૂર્ણ રીતે તૈયાર થઈ ગયું છે. નવા નિયુક્ત થયેલા મંત્રીઓમાં અર્જુન સિંહ, દીપક બર્મન, તપસ રોય અને ડૉ. શંકર ઘોષ જેવા અનુભવી નેતાઓનો સમાવેશ થાય છે. આ વિસ્તરણ દ્વારા સરકારે રાજ્યના વિવિધ વિસ્તારો અને સમુદાયોને યોગ્ય પ્રતિનિધિત્વ આપવાનો પ્રયાસ કર્યો છે. હવે મંત્રી પરિષદની રચના થતાં રાજ્યમાં વહીવટી કામગીરીને વેગ મળવાની અપેક્ષા છે.
કોનો થયો મંત્રીમંડળમાં સમાવેશ?
શપથ લેનારા 35 મંત્રીઓમાં 13 કેબિનેટ મંત્રીઓ અને 3 રાજ્ય મંત્રી (સ્વતંત્ર હવાલો) નો સમાવેશ થાય છે. મુખ્ય મંત્રીમંડળમાં દીપક બર્મન, તપસ રોય, ડૉ. શંકર ઘોષ, મનોજ કુમાર ઉરાંવ, અર્જુન સિંહ, ગૌરી શંકર ઘોષ, સ્વપન દાસગુપ્તા, જગન્નાથ ચટ્ટોપાધ્યાય, કલ્યાણ ચક્રવર્તી, અજય પોદ્દાર, શરદ્વત મુખર્જી, દૂધ કુમાર મંડલ અને અનુપ કુમાર દાસે શપથ લીધા છે. આ ઉપરાંત, ડૉ. ઈન્દ્રનીલ ખાન, માલતી રવા રોય અને રાજેશ મહતોને સ્વતંત્ર હવાલો સોંપવામાં આવ્યો છે.
બંધારણીય મર્યાદા અને સરકારનું આયોજન
બંધારણના 91મા સુધારા અનુસાર, કોઈપણ રાજ્યના મંત્રીમંડળમાં સભ્યોની સંખ્યા વિધાનસભાની કુલ બેઠકોના 15% થી વધુ ન હોવી જોઈએ. પશ્ચિમ બંગાળ વિધાનસભાની 294 બેઠકો જોતા, મંત્રીમંડળમાં વધુમાં વધુ 44 સભ્યો હોઈ શકે છે. હાલના 41 મંત્રીઓ સાથે સરકારે આ મર્યાદાનું પાલન કર્યું છે. અહેવાલો મુજબ, બાકીની 4 જગ્યાઓ અત્યારે ખાલી રાખવામાં આવશે, જે ભવિષ્યના રાજકીય સમીકરણો માટે મહત્વની સાબિત થઈ શકે છે.
આ પણ વાંચો: યુપીના એટાહમાં મોર્નિંગ વોક પર મહિલા પર ફાયરિંગ: બાઇક સવારોએ મહિલાને મારી ગોળી, પોલીસ તપાસ શરૂ
