નાણામંત્રી નિર્મલા સીતારમણ દ્વારા 01 ફેબ્રુઆરી 2026ના રોજ રજૂ કરવામાં આવેલા બજેટમાં શિક્ષણ અને કૌશલ્ય વિકાસ પર વિશેષ ધ્યાન કેન્દ્રિત કરવામાં આવ્યું છે. સરકારની આ વખતની યોજનાઓમાં આયુર્વેદ, ફાર્માસ્યુટિકલ, ડિઝાઇન અને ટેકનિકલ શિક્ષણને પ્રાધાન્ય આપવામાં આવ્યું છે. શિક્ષણને રોજગારલક્ષી બનાવવા અને વિદ્યાર્થીઓને આધુનિક સુવિધાઓ પૂરી પાડવા માટે બજેટમાં અનેક મહત્વની જાહેરાતો કરવામાં આવી છે.
આયુર્વેદ અને ફાર્મા શિક્ષણનો વ્યાપ વધશે
પરંપરાગત ચિકિત્સા પદ્ધતિને પ્રોત્સાહન આપવા માટે દેશમાં 3 નવા આયુર્વેદ સંસ્થાન અને 3 નવી આયુર્વેદ કોલેજો શરૂ કરવાની જાહેરાત કરાઈ છે. આ ઉપરાંત, દવાઓની ગુણવત્તા ચકાસવા માટે Drug Testing Labsને પણ આધુનિક બનાવવામાં આવશે. ફાર્મા સેક્ટરને મજબૂત કરવાના હેતુથી સરકાર 3 નવી ફાર્માસ્યુટિકલ શિક્ષણ સંસ્થાઓ પણ સ્થાપશે, જે સંશોધન અને ઉત્પાદન ક્ષેત્રે ભારતની શક્તિ વધારશે.
યુનિવર્સિટી ટાઉનશીપ અને ઉચ્ચ શિક્ષણ
બજેટ 2026ની સૌથી આકર્ષક જાહેરાત 5 University Townshipના વિકાસની છે. આ ટાઉનશીપમાં શિક્ષણ, રિસર્ચ, હોસ્ટેલ, રમતગમત અને સ્ટાર્ટઅપ માટેની તમામ સુવિધાઓ એક જ કેમ્પસમાં ઉપલબ્ધ હશે. આ સાથે જ દેશમાં 5 નવી યુનિવર્સિટીઓ ખોલવાની પણ દરખાસ્ત છે, જેનાથી ઉચ્ચ શિક્ષણ મેળવવું વિદ્યાર્થીઓ માટે વધુ સરળ બનશે.
ડિજિટલ સ્કિલ્સ અને ડિઝાઇન સંસ્થાન
ABGC Content Creator Lab: ડિજિટલ યુગમાં વિદ્યાર્થીઓને તૈયાર કરવા માટે IIT Mumbaiના સહયોગથી 15,000 સેકન્ડરી શાળાઓ અને 500 કોલેજોમાં કન્ટેન્ટ ક્રિએટર લેબ બનાવવામાં આવશે. અહીં વિદ્યાર્થીઓ એનિમેશન, ગેમિંગ અને નવી ટેકનોલોજી શીખી શકશે.
નવી ડિઝાઇન સંસ્થાન: પૂર્વી ભારતના વિદ્યાર્થીઓ માટે સારા સમાચાર એ છે કે ત્યાં એક નવું Indian Institute of Design (IIND) સ્થાપવામાં આવશે.
ગર્લ્સ હોસ્ટેલ: મહિલા શિક્ષણને પ્રોત્સાહન આપવા માટે દરેક જિલ્લામાં ઉચ્ચ શિક્ષણ સંસ્થાઓ માટે સ્પેશિયલ ગર્લ્સ હોસ્ટેલ બનાવવાની જાહેરાત પણ નાણામંત્રીએ કરી છે.
