કેન્દ્રીય નાણામંત્રી નિર્મલા સીતારમણ દ્વારા રજૂ કરવામાં આવેલા વર્ષ 2026ના બજેટમાં વાહન ચાલકો માટે સારા સમાચાર સામે આવ્યા છે. સરકાર દ્વારા સીએનજી અને બાયોગેસના ભાવમાં કાપ મૂકવાનો નિર્ણય લેવામાં આવ્યો છે જેના પરિણામે સામાન્ય જનતાના ખિસ્સા પરનો બોજ હળવો થશે. ઇંધણના દરમાં ઘટાડો થવાથી માત્ર ખાનગી વાહન માલિકોને જ નહીં પરંતુ પબ્લિક ટ્રાન્સપોર્ટ સાથે સંકળાયેલા ઓપરેટરોને પણ આર્થિક રીતે મોટો ફાયદો થવાની સંભાવના છે.
વાસ્તવમાં કેન્દ્ર સરકારે આ વખતે બાયોગેસ મિશ્રિત સીએનજી પર લેવામાં આવતી કસ્ટમ ડ્યુટીની પ્રક્રિયામાં મહત્વપૂર્ણ સુધારો કર્યો છે. નવી જોગવાઈ મુજબ હવે સીમા શુલ્કની ગણતરી કરતી વખતે બાયોગેસના મૂલ્યને ધ્યાનમાં લેવામાં આવશે નહીં એટલે કે તેમાં કર મુક્તિ આપવામાં આવશે. આ ટેકનિકલ ફેરફારના કારણે આગામી સમયમાં બાયોગેસ આધારિત ઇંધણના વેચાણ ભાવમાં મોટો ઘટાડો જોવા મળી શકે છે જેની સીધી અસર ઓટોમોબાઈલ સેક્ટર પર પડશે.
સીએનજી વાહનોના વપરાશકારો માટે આ સમાચાર રાહતના છે કારણ કે તેનાથી દર મહિને થતા ઇંધણના ખર્ચમાં સીધી બચત થશે. આ ઉપરાંત બજેટમાં EV Battery પણ સસ્તી કરવાની જાહેરાત કરવામાં આવી છે. ઇલેક્ટ્રિક વાહનોના ઉત્પાદનમાં વપરાતી બેટરીઓ પરની રાહતને કારણે હવે દેશમાં ઇલેક્ટ્રિક કાર અને ટુ વ્હીલર ખરીદવા પહેલા કરતા વધુ સરળ અને સસ્તા બનશે. સરકારના આ પગલાથી પ્રદૂષણ મુક્ત વાહનોના વેચાણમાં વધારો થવાની આશા રાખવામાં આવી રહી છે.
