બ્રાઝીલમાં બે હેલિકોપ્ટર હવામાં ટકરાયા, અમેરિકન સિંગર સહિત 6ના મોત
રિયો ડી જેનેરિયોમાં ઇલેક્ટ્રિક વ્હીકલ ડીલરશિપના પાર્કિંગમાં હેલિકોપ્ટર પડતા બ્લાસ્ટ થયો, 20 ગાડીઓ બળીને ખાખ
બ્રાઝીલના રિયો ડી જેનેરિયો શહેરમાં રવિવારે સવારે એક મોટી અને દર્દનાક હવાઈ દુર્ઘટના સર્જાઈ છે. હવામાં બે હેલિકોપ્ટર એકબીજા સાથે ટકરાઈ જતાં તેમાં સવાર તમામ 6 લોકોના મોત થયા છે. આ મૃતકોમાં જાણીતા અમેરિકન સિંગર ઓલિવર ટ્રી (Oliver Tree) અને આર્જેન્ટિનાના પ્રખ્યાત યુટ્યુબર ગેસ્પી (Gaspi) પણ સામેલ હોવાની સત્તાવાર પુષ્ટિ કરવામાં આવી છે.
ઇલેક્ટ્રિક વ્હીકલના પાર્કિંગમાં હેલિકોપ્ટર પડતા બ્લાસ્ટ થયો
સ્થાનિક ફાયર બ્રિગેડના જણાવ્યા અનુસાર, હવામાં ટક્કર થયા બાદ બંને હેલિકોપ્ટર કાબૂ બહાર ગયા હતા અને શહેરના પશ્ચિમ વિસ્તારમાં આવેલી એક ઇલેક્ટ્રિક વ્હીકલ (EV) ડીલરશિપના પાર્કિંગમાં જઈને ખાબક્યા હતા. જમીન પર પડતાની સાથે જ એક હેલિકોપ્ટરમાં જોરદાર બ્લાસ્ટ થયો હતો. આ આગ પાર્કિંગમાં ઉભેલી અન્ય ગાડીઓમાં પણ ખૂબ જ ઝડપથી ફેલાઈ ગઈ હતી, જેના કારણે ત્યાં પાર્ક કરેલી અંદાજે 20 ઇલેક્ટ્રિક કાર બળીને ખાખ થઈ ગઈ હતી. અકસ્માત બાદ આસપાસના વિસ્તારમાં ધુમાડાના કાળા ગોટેગોટા જોવા મળ્યા હતા.
અમેરિકન સિંગર ઓલિવર ટ્રી અને યુટ્યુબર ગેસ્પીનું મોત
પોલીસ અને એવિએશન ઓથોરિટી દ્વારા જાહેર કરવામાં આવેલી મુસાફરોની યાદી (પેસેન્જર મેનિફેસ્ટ) અનુસાર, આ અકસ્માતમાં 32 વર્ષના લોકપ્રિય અમેરિકન ગાયક ઓલિવર ટ્રીનું અવસાન થયું છે. તેઓ પોતાના વર્લ્ડ ટૂર માટે બ્રાઝીલ આવ્યા હતા.
તેમની સાથે જ હેલિકોપ્ટરમાં સવાર 23 વર્ષના આર્જેન્ટિનાના જાણીતા યુટ્યુબર ગેસ્પર પ્રિમ ડિયાઝ (ગેસ્પી)નું પણ મોત નીપજ્યું છે, જેમના યુટ્યુબ પર 2.8 મિલિયન (28 લાખ)થી વધુ ફોલોઅર્સ હતા. અકસ્માત એટલો ભયાનક હતો કે મૃતદેહો ખરાબ રીતે બળી ગયા હોવાથી તેમની ઓળખ મેળવવામાં શરૂઆતમાં મુશ્કેલી પડી હતી, પરંતુ સત્તાવાર યાદીમાં તેમના નામોની પુષ્ટિ થઈ ગઈ છે.
અકસ્માતનું કારણ અકબંધ, તપાસ શરૂ
રિયો ડી જેનેરિયોના ફાયર વિભાગ અને બચાવ દળે ઘટનાસ્થળે પહોંચીને આશરે 1 કલાકની ભારે જહેમત બાદ આગ પર કાબૂ મેળવ્યો હતો. સુરક્ષાના ભાગરૂપે આસપાસના વિસ્તારને તાત્કાલિક ખાલી કરાવવામાં આવ્યો હતો. આ અકસ્માતમાં માર્યા ગયેલા અન્ય લોકોમાં હેલિકોપ્ટરના પાયલટ અને ક્રૂ મેમ્બર્સનો સમાવેશ થાય છે. હવામાં આ બંને હેલિકોપ્ટર કયા કારણોસર એકબીજા સાથે ટકરાયા તે હજી સ્પષ્ટ થઈ શક્યું નથી. બ્રાઝીલની એવિએશન એજન્સીઓ દ્વારા આ મામલે ઉંડાણપૂર્વકની તપાસ શરૂ કરવામાં આવી છે.
