રાજકોટ શહેરમાં ભાજપના નવનિયુક્ત ઉપપ્રમુખ સોમાભાઈ ભાલિયાનો એક વીડિયો સોશિયલ મીડિયામાં ભારે ચર્ચાનો વિષય બન્યો છે. તાજેતરમાં જાહેર થયેલા રાજકોટ શહેર ભાજપના નવા સંગઠન માળખામાં 64 વર્ષીય સોમાભાઈ ભાલિયાને ઉપપ્રમુખ જેવી મહત્વપૂર્ણ જવાબદારી સોંપવામાં આવી છે.
ભાજપના નેતા હોદ્દા મળતા ધૂણ્યાં
નિમણૂક બાદ તેઓ માતાજીના માંડવામાં ભક્તિભાવ સાથે હાજરી આપતા અને પરંપરાગત રીતરિવાજ અનુસાર ધૂણતા જોવા મળ્યા હતા. વાયરલ થયેલા વીડિયોમાં સોમાભાઈ માતાજીના માંડવામાં ભાવવિભોર થઈ ધૂણતા તેમજ પોતાના વાંસામાં સાંકળો ઝીંકતા નજરે પડે છે. તેમના આ ભક્તિમય અંદાજે લોકોનું ધ્યાન ખેંચ્યું છે.
સોશિયલ મીડિયામાં ચર્ચા અને કુતૂહલ
સોમાભાઈ માતાજીના અનન્ય ભક્ત તરીકે ઓળખાય છે અને પોતાના સમાજમાં પણ સારી લોકચાહના ધરાવે છે. રાજકીય હોદ્દો મળ્યા બાદ તેમનો આ પરંપરાગત અને ધાર્મિક રંગમાં રંગાયેલો વીડિયો સોશિયલ મીડિયામાં ચર્ચા અને કુતૂહલનું કેન્દ્ર બન્યો છે.
