અમદાવાદ વિમાન દુર્ઘટના કેસમાં સામે આવી સૌથી મોટી ભૂલ : પરિવારજનોને સોંપી દેવાયા ખોટા મૃતદેહ!

Air India Plane crash Flight AI-171: અમદાવાદમાં એર ઇન્ડિયા વિમાન દુર્ઘટનામાં ભોગ બનેલા લોકોના પરિવારોએ ખૂબ જ ચોંકાવનારો દાવો કર્યો છે. અકસ્માતમાં માર્યા ગયેલા લોકોના પરિવારોના વકીલોનો દાવો છે કે પીડિત પરિવારોને ખોટા મૃતદેહ મળ્યા છે. લંડનમાં રહેતા પીડિતોના પરિવારોનું પ્રતિનિધિત્વ કરતા વકીલોનું કહેવું છે કે મૃતકોના અવશેષોની ખોટી ઓળખ કરીને તેમને બ્રિટન મોકલવામાં આવ્યા.

લંડનમાં ફરીથી કરવામાં આવી મૃતદેહોની તપાસ

વકીલોના મતે લંડનમાં કોરોનર એટલે કે અકસ્માતમાં માર્યા ગયેલા લોકોની તપાસ કરતા અધિકારીએ મૃતકોના અવશેષોના ડીએનએ મેચ કરીને ઓળખવાનો પ્રયાસ કર્યો ત્યારે આ વાત બહાર આવી. વકીલોનું કહેવું છે કે એક પરિવારે મૃતકના અંતિમ સંસ્કાર રદ કરવા પડ્યા કારણ કે કોરોનરએ તેમને કહ્યું હતું કે શબપેટીમાં તેમના પરિવારના સભ્યનો નહીં પરંતુ એક અજાણ્યા વ્યક્તિનો મૃતદેહ છે.

બીજા પીડિત પરિવારને તેમના પરિવારના સભ્યોના અવશેષો બીજા મુસાફરના અવશેષો સાથે ભળેલા મળ્યા. બંનેના અવશેષો એક જ શબપેટીમાં રાખવામાં આવ્યા હતા. પરિવારે તેમના મૃતકોના અંતિમ સંસ્કાર કરતા પહેલા બંને મુસાફરોના અવશેષોને અલગ કરવા પડ્યા.

અજાણ્યા મૃતદેહોનો અગ્નિસંસ્કાર પણ નહીં

વકીલો કહે છે કે ખોટા અવશેષો મળવાથી પરિવારો ખૂબ જ નારાજ છે. એક પરિવારને ખ્યાલ આવ્યો કે તેમને ખોટા મૃતદેહ મળ્યા છે, જેના પછી તે મૃતદેહને દફનાવવા માટે મનાઈ કરી દીધી. વકીલોએ કહ્યું કે અમે અમદાવાદ અકસ્માત પછી મુસાફરોના મૃતદેહ કેવી રીતે મળી આવ્યા અને ઓળખાયા તેની ઘટનાઓની સાંકળ સ્થાપિત કરવા પર કામ કરી રહ્યા છીએ.

વકીલોએ પુષ્ટિ આપી કે આ કેસમાં તપાસની માંગ કરવામાં આવી છે. પરિવારોનું પ્રતિનિધિત્વ લંડન સ્થિત કાયદાકીય પેઢી કીસ્ટોન લો દ્વારા કરવામાં આવી રહ્યું છે. પીડિત પરિવારોનો આરોપ છે કે અકસ્માત પછી મૃતકોના ડીએનએ મેચિંગની પ્રક્રિયા યોગ્ય રીતે કરવામાં આવી ન હતી, જેના કારણે ખોટા મૃતદેહો બ્રિટન પહોંચ્યા છે.

અમદાવાદથી લંડન જતું એર ઇન્ડિયાનું બોઇંગ ડ્રીમલાઇનર વિમાન ટેકઓફ થયાની થોડી મિનિટો પછી જમીન પર તૂટી પડ્યું. વિમાનમાં સવાર ૨૪૨ મુસાફરોમાંથી ફક્ત એક જ વ્યક્તિ બચી ગયો. આ અકસ્માતમાં કુલ ૨૬૦ લોકોએ જીવ ગુમાવ્યો. વિમાનમાં ૧૬૯ ભારતીય, ૫૩ બ્રિટિશ નાગરિકો, સાત પોર્ટુગીઝ નાગરિકો અને એક કેનેડિયન નાગરિક સવાર હતા.

જમીન પર પડતા પહેલ વિમાન એક મેડિકલ હોસ્ટેલની ઇમારત સાથે અથડાયું હતું, જેના કારણે ઇમારત અને આસપાસના વિસ્તારમાં હાજર કેટલાક લોકો ઘાયલ થયા હતા. વિમાન જમીન પર પડતાની સાથે જ તે આગનો ગોળો બની ગયું હતું અને મોટાભાગના મૃતદેહો ખરાબ રીતે બળી ગયા હતા, જેના કારણે પીડિતોના પરિવારોના ડીએનએ નમૂના લેવામાં આવ્યા હતા જેથી તેમની ઓળખ કરી શકાય.