પહેલગામમાં થયેલા આતંકી હુમલાને લઈને એક મોટો ખુલાસો થયો છે, જેમાં પાકિસ્તાનની સીધી સંડોવણી સામે આવી છે. આ હુમલામાં ત્રણ પાકિસ્તાની આતંકવાદીઓ સામેલ હતા, જેમણે સ્થાનિક લોકોને તેમની યોજનાની સહેજ પણ જાણ થવા દીધી ન હતી. નેશનલ ઇન્વેસ્ટિગેશન એજન્સી (NIA) ની તપાસમાં જાણવા મળ્યું છે કે ઘટના સ્થળેથી મળી આવેલા કારતૂસ એ જ હતા જે એન્કાઉન્ટર બાદ આતંકવાદીઓ પાસેથી જપ્ત થયા હતા.
બૈસરન ખીણ જ કેમ?
NIAની તપાસમાં એક ચોંકાવનારો ખુલાસો પણ થયો છે કે આતંકવાદીઓએ બૈસરન ખીણને વારંવાર રેકી કરીને પસંદ કરી હતી. આનું મુખ્ય કારણ એ હતું કે બૈસરન ખીણ એકદમ સુમસામ જગ્યા હતી અને ત્યાં પર્યટકોની સંખ્યા પણ વધારે રહે છે. આતંકીઓનો હેતુ વધુમાં વધુ નિર્દોષ લોકોને નિશાન બનાવવાનો હતો. NIAનો દાવો છે કે લશ્કર-એ-તૈયબાના ત્રણ પાકિસ્તાની આતંકવાદીઓએ આ હુમલો કર્યો હતો, જેમાં 26 લોકોએ જીવ ગુમાવ્યો હતો.
'ઓપરેશન મહાદેવ' અને NIAનું સત્તાવાર નિવેદન
શરૂઆતમાં આ હુમલામાં ચારથી પાંચ આતંકીઓ સામેલ હોવાની અટકળો હતી, પરંતુ NIAની તપાસે સ્પષ્ટ કર્યું છે કે માત્ર ત્રણ આતંકીઓએ જ આ કૃત્ય કર્યું હતું. તાજેતરમાં ગૃહમંત્રી અમિત શાહે પણ સંસદમાં 'ઓપરેશન મહાદેવ' દરમિયાન આ ત્રણ આતંકીઓ માર્યા ગયા હોવાની વાત જણાવી હતી. તેમણે કહ્યું હતું કે આ એ જ આતંકીઓ હતા જેમણે પહેલગામમાં નિર્દોષ લોકોનો જીવ લીધો હતો.
'ઓપરેશન મહાદેવ' બાદ NIA દ્વારા પહેલીવાર આ હુમલા અંગે સત્તાવાર નિવેદન બહાર પાડવામાં આવ્યું છે, જેણે સમગ્ર ઘટના પરથી પડદો ઉઠાવ્યો છે. હાલમાં પણ આ કેસની વધુ તપાસ ચાલુ છે.
