મુંબઈ, જેને ભારતનું આર્થિક હૃદય અને “સપનાઓનું શહેર” કહેવામાં આવે છે, તે જ શહેરમાં મોડી રાત્રે એક ભયાનક દુર્ઘટનાએ બધાને હચમચાવી દીધા છે. ભાંડુપના સ્ટેશન રોડ પર BESTની ઇલેક્ટ્રિક મિડી બસ રિવર્સ લેતી વખતે અચાનક બેકાબૂ થઈ અને ફૂટપાથ પર ઊભેલા રાહદારીઓને કચડી નાખ્યા હોવાની ઘટના સામે આવી છે.
મળતી માહિતી અનુસાર,અકસ્માત રાત્રે લગભગ 9:35 વાગ્યે થયો, જેમાં બસ એક વીજળીના થાંભલા સાથે અથડાઈ હતી. આનાથી વિસ્તારમાં વીજ પુરવઠો ખોરવાઈ ગયો અને અંધારું છવાઈ ગયું હતું. ઘટના બાદ એમ્બ્યુલન્સ, ફાયર બ્રિગેડ અને BESTની ટીમ તુરંત ઘટનાસ્થળે પહોંચી. ઘાયલોને તાત્કાલિક હોસ્પિટલમાં ખસેડવામાં આવ્યા અને બચાવ કાર્ય ઝડપથી પૂરું કરવામાં આવ્યું હતું.
અકસ્માતમાં 3 મહિલા સહિત 4 લોકોનાં મોત થયાં છે. 9 લોકો ગંભીર રીતે ઘાયલ છે અને તેમને રાજવાડી તથા એમ.ટી. અગ્રવાલ હોસ્પિટલમાં દાખલ કરવામાં આવ્યા છે. કેટલાક ઘાયલોની હાલત હજુ ગંભીર છે અને મૃત્યુઆંક વધવાની આશંકા છે.
પોલીસ કાર્યવાહી અને તપાસ
ડીસીપી હેમરાજ સિંહ રાજપૂતે જણાવ્યું હતું કે, ચાલક વિરુદ્ધ FIR નોંધવાની પ્રક્રિયા ચાલુ છે અને બસની મિકેનિકલ તપાસ કરવામાં આવશે. અકસ્માતનું અસલી કારણ તપાસ પૂરી થયા પછી જ સ્પષ્ટ થશે, પરંતુ શરૂઆતી અહેવાલોમાં ટેકનિકલ ખામી કે ચાલકની ભૂલની આશંકા વ્યક્ત કરવામાં આવી રહી છે.
BESTની બસ અને વિસ્તારની પૃષ્ઠભૂમિ
ઉલ્લેખનીય છે કે,આ ઘટનાએ મુંબઈના રહેવાસીઓમાં ભય અને ગુસ્સાનું વાતાવરણ ઊભું કર્યું છે. BEST મુંબઈની લાઇફલાઇન છે અને તેની પાસે 3,000થી વધુ બસો છે, જેમાં ઇલેક્ટ્રિક બસોનો વધતો સમાવેશ છે. પરંતુ આવી ઘટનાઓથી પબ્લિક ટ્રાન્સપોર્ટની સલામતી પર પ્રશ્નો ઉભા થઈ રહ્યા છે. આ વર્ષે BESTની ઇલેક્ટ્રિક બસો સાથે આ પ્રકારની આ બીજી મોટી ઘટના છે, જે પબ્લિક ટ્રાન્સપોર્ટની સલામતી અને ઇલેક્ટ્રિક વાહનોની વિશ્વસનીયતા પર મોટા સવાલો ઉભા કરી રહી છે. ત્યારે અકસ્માત બાદ BEST તરફથી તાત્કાલિક પ્રતિક્રિયા આવી નહોતી.
