બારામતીમાં સર્જાયેલી વિમાન દુર્ઘટનાનો લાઈવ વીડિયો હવે સપાટી પર આવ્યો છે. આ હૃદયદ્રાવક દ્રશ્યોમાં સ્પષ્ટ જોઈ શકાય છે કે કેવી રીતે એક સુરક્ષિત ઉડાન ભરી રહેલું વિમાન પળવારમાં જમીનદોસ્ત થઈ ગયું. ગભરાટ ફેલાવી દેનારી આ સમગ્ર ઘટના ગૌજુબાવી ગ્રામપંચાયત વિસ્તારમાં લાગેલા CCTV કેમેરામાં રેકોર્ડ થઈ છે.
હવામાં સંતુલન ગુમાવ્યું અને થયો જોરદાર ધડાકો
બુધવારે સવારે બનેલી આ ઘટનામાં અજિત પવાર (66) સહિત કુલ 5 લોકોના કરુણ મોત નીપજ્યા છે. પ્રત્યક્ષદર્શીઓના જણાવ્યા અનુસાર, દુર્ઘટના પૂર્વે વિમાન હવામાં જ અસંતુલિત જણાતું હતું. રનવે પર લેન્ડિંગ કરવાનો પ્રયાસ કરી રહેલું પ્લેન અચાનક પલટી ખાઈને જમીન સાથે અથડાયું હતું. અથડાતાની સાથે જ પ્લેનમાં પ્રચંડ વિસ્ફોટ થયો હતો અને ચારેતરફ આગની જ્વાળાઓ ફેલાઈ ગઈ હતી.
સતત 5 વિસ્ફોટોથી વિસ્તાર ધ્રૂજી ઉઠ્યો
ઘટનાસ્થળે હાજર રહેલી એક મહિલાએ જણાવ્યું કે, વિમાન હવાઈ મથક ઉપર ચક્કર લગાવી રહ્યું હતું ત્યારે જ તે અસ્થિર દેખાતું હતું. પ્લેન જ્યારે ગ્રાઉન્ડ લેવલથી આશરે 100 ફૂટની ઊંચાઈ પર હતું, ત્યારે જ તે નિયંત્રણ ગુમાવી બેઠું અને નીચે પટકાયું. વિમાન જમીન પર પડ્યા બાદ એક પછી એક સતત 4 થી 5 ધડાકા થયા હતા. આ વિસ્ફોટો એટલા ભયાનક હતા કે તેનો અવાજ છેક રહેણાંક ઘરો સુધી સંભળાયો હતો.
બચાવ કામગીરી અને ઓળખ
આગની ભીષણતા એટલી વધારે હતી કે સ્થાનિક લોકો પણ બચાવ માટે વિમાનની નજીક જઈ શક્યા નહોતા. ફાયર વિભાગ અને ઈમરજન્સી ટીમો ઘટનાસ્થળે પહોંચી તે પહેલા જ વિમાનમાં સવાર તમામ લોકોએ જીવ ગુમાવ્યા હતા. અન્ય એક સાક્ષી પ્રમોદ મદુરીકરના જણાવ્યા મુજબ, સ્થળ પર પહોંચેલી ટીમે મૃતદેહોને બહાર કાઢીને તરત જ એમ્બ્યુલન્સ મારફતે હોસ્પિટલ ખસેડ્યા હતા.
