જો આ અઠવાડિયે તમારે બેંક બ્રાન્ચમાં જઈને કોઈ મહત્વપૂર્ણ કામ કરવાનું હોય, તો પહેલાં રજાનું કેલેન્ડર જાણી લેવું જરૂરી છે. જુલાઈના અંતિમ સપ્તાહમાં કેટલાક રાજ્યોમાં જાહેર રજા, ચોથા શનિવાર અને રવિવારને કારણે સતત ત્રણ દિવસ સુધી બેંક શાખાઓ બંધ રહી શકે છે. જોકે, આ રજાઓ સમગ્ર દેશમાં લાગુ પડતી નથી અને કેટલીક રજાઓ રાજ્યવાર છે.
રિઝર્વ બેંક ઓફ ઈન્ડિયા (RBI)ના હોલિડે કેલેન્ડર મુજબ, દરેક મહિનાના બીજા અને ચોથા શનિવારે તેમજ તમામ રવિવારે દેશભરની બેંક શાખાઓમાં નિયમિત રજા રહે છે. આ ઉપરાંત વિવિધ રાજ્યોમાં સ્થાનિક તહેવારો અને જાહેર પ્રસંગોને કારણે અલગ-અલગ તારીખે વધારાની રજાઓ પણ જાહેર કરવામાં આવે છે.
કયા ત્રણ દિવસ અસર થઈ શકે?
આ અઠવાડિયે નીચેની તારીખોએ અનેક વિસ્તારોમાં બેંકિંગ કામગીરી પ્રભાવિત થઈ શકે છે:
24 જુલાઈ (શુક્રવાર): કેટલાક રાજ્યોમાં સ્થાનિક જાહેર રજાના કારણે બેંક શાખાઓ બંધ રહેશે.
25 જુલાઈ (ચોથો શનિવાર): RBIના નિયમ મુજબ દેશભરની તમામ બેંક શાખાઓમાં રજા રહેશે.
26 જુલાઈ (રવિવાર): સાપ્તાહિક રજાને કારણે સમગ્ર દેશમાં બેંકો બંધ રહેશે.
નોંધનીય છે કે 24 જુલાઈની રજા તમામ રાજ્યોમાં લાગુ પડતી નથી. તેથી ગ્રાહકોએ પોતાની બેંક શાખા અથવા RBIના રાજ્યવાર હોલિડે કેલેન્ડર મુજબ રજાની પુષ્ટિ કરી લેવી જોઈએ.
આ પણ વાંચો : રોકાણ માટે ગુજરાત દેશનું નંબર-1 રાજ્ય : નીતિ આયોગના Investment Friendliness Index 2026માં પ્રથમ સ્થાન
ડિજિટલ બેંકિંગ સેવાઓ ચાલુ રહેશે
બેંક બ્રાન્ચો બંધ હોવા છતાં UPI, મોબાઇલ બેંકિંગ, ઈન્ટરનેટ બેંકિંગ, ATM, ડેબિટ-ક્રેડિટ કાર્ડ ટ્રાન્ઝેક્શન અને અન્ય ડિજિટલ સેવાઓ સામાન્ય રીતે યથાવત ચાલુ રહેશે. જોકે ચેક ક્લિયરિંગ, પાસબુક અપડેટ, ડિમાન્ડ ડ્રાફ્ટ, લોકર અને કાઉન્ટર સંબંધિત સેવાઓ માટે ગ્રાહકોએ બેંક ખુલ્લી હોય તે દિવસે જ આયોજન કરવું પડશે.
