દિલ્હીમાં લાગુ થઈ આયુષ્માન ભારત યોજના : રેખા ગુપ્તાના AAP પર સણસણતા પ્રહાર

ભાજપના નેતૃત્વવાળી દિલ્હી સરકારે શનિવારે રાષ્ટ્રીય રાજધાનીમાં આયુષ્માન ભારત પ્રધાનમંત્રી જન આરોગ્ય યોજના (આયુષ્માન યોજના)ના અમલીકરણ માટે કેન્દ્ર સાથે એક સમજૂતી પર હસ્તાક્ષર કર્યા હતા. આ સાથે, દિલ્હી આ આરોગ્ય વીમા યોજનાનો અમલ કરનાર 35મું રાજ્ય અથવા કેન્દ્રશાસિત પ્રદેશ બન્યું છે.

પશ્ચિમ બંગાળ હવે એકમાત્ર એવું રાજ્ય છે જેણે આ યોજનાનો અમલ કર્યો નથી. આયુષ્માન ભારત યોજનામાં 27 વિશેષતાઓમાં 1,961 તબીબી પ્રક્રિયાઓ માટે મફત અને 'કેશલેસ' સારવાર પ્રદાન કરે છે, જેમાં દવાઓ, ક્લિનિકલ સેવાઓ, હોસ્પિટલમાં દાખલ થવું, ICU સંભાળ, સર્જરી અને અન્ય ખર્ચનો સમાવેશ થાય છે.

પાત્ર પરિવારોને 10 લાખ રૂપિયા સુધીનું આરોગ્ય કવચ
આ યોજના હેઠળ, દિલ્હીમાં પાત્ર પરિવારોને વાર્ષિક 10 લાખ રૂપિયા સુધીનું આરોગ્ય કવચ મળશે, જેમાંથી પાંચ લાખ રૂપિયા કેન્દ્ર દ્વારા અને બાકીના પાંચ લાખ રૂપિયા દિલ્હી સરકાર દ્વારા આપવામાં આવશે. કેન્દ્રીય આરોગ્ય પ્રધાન જે. પી. નડ્ડા અને દિલ્હીના મુખ્યમંત્રી રેખા ગુપ્તા સહિત અન્ય ટોચના નેતાઓની હાજરીમાં દિલ્હી સરકાર અને રાષ્ટ્રીય આરોગ્ય સત્તામંડળ વચ્ચે સમજૂતી કરાર પર હસ્તાક્ષર કરવામાં આવ્યા હતા.

દિલ્હી સરકાર આયુષ્માન ભારત અભિયાન શરૂ કરશે
નેશનલ હેલ્થ ઓથોરિટીએ આયુષ્માન ભારત આરોગ્ય વીમા યોજનાના અમલીકરણ માટે જવાબદાર સર્વોચ્ચ સંસ્થા છે. સમજૂતી પર હસ્તાક્ષર કર્યા પછી, યોજના હેઠળ લાભાર્થીઓની નોંધણી માટે એક વિશેષ અભિયાન શરૂ કરવામાં આવશે.

હસ્તાક્ષર કર્યા બાદ એમઓયુની આપ-લે કરવામાં આવી હતી. 10 એપ્રિલે વધુ એક MOU કેન્દ્ર અને દિલ્હી સરકાર વચ્ચે કરવામાં આવશે. આ અંતર્ગત કેન્દ્ર સરકાર અને દિલ્હી સરકારને હેલ્થ ઈન્ફ્રાસ્ટ્રક્ચર માટે 2400 કરોડ રૂપિયા આપવામાં આવશે.

મુખ્યમંત્રી રેખા ગુપ્તાએ આપ પર નિશાન સાધ્યું હતું
રેખા ગુપ્તાએ કહ્યું કે અગાઉની સરકારોના ષડયંત્રને કારણે દિલ્હીમાં આયુષ્માન યોજના લાગુ થઈ શકી ન હતી. દિલ્હીની જનતા જાણે છે કે લોકો કેન્દ્ર અને રાજ્ય સરકારની વચ્ચે કેવી રીતે પીસાતી હતી. દિલ્હીમાં હાહાકાર મચી ગયો હતો. એક બેડ પર બે દર્દીઓ હતા, લોકો મરી રહ્યા હતા. આયુષ્માન યોજનાના માધ્યમથી દિલ્હીના લોકો હવે પોતાની પસંદગીની હોસ્પિટલમાં સારવાર મેળવી શકશે.

તેમણે એમ પણ કહ્યું હતું કે, દિલ્હીના લોકો 1961 જેવી બીમારીઓની સારવાર મેળવી શકશે. દિલ્હીના રહેવાસીઓ 30 હજારથી વધુ હોસ્પિટલોમાં મફત સારવાર મેળવી શકે છે. પ્રથમ તબક્કામાં 2 લાખ 60 હજારથી વધુ લોકોને જોડવામાં આવશે. કાર્ડનું વિતરણ 10મી તારીખથી શરૂ થશે.