Ram Mandir Donation Theft Case: અયોધ્યાના ભવ્ય શ્રી રામ મંદિર સાથે જોડાયેલા દાન ચોરીના મામલે પ્રથમ વખત શ્રી રામ જન્મભૂમિ તીર્થક્ષેત્ર ટ્રસ્ટ તરફથી સત્તાવાર સ્વીકાર સામે આવતા સમગ્ર દેશનું ધ્યાન ફરી એકવાર આ કેસ તરફ કેન્દ્રિત થયું છે. કરોડો હિંદુઓની આસ્થાનું કેન્દ્ર ગણાતા રામ મંદિરમાંથી દાનની રકમ ગાયબ થવાના આક્ષેપો છેલ્લા કેટલાક સમયથી ચર્ચામાં હતા, પરંતુ અત્યાર સુધી ટ્રસ્ટ તરફથી કોઈ સ્પષ્ટ નિવેદન આવ્યું નહોતું. હવે ટ્રસ્ટના કોષાધ્યક્ષ ગોવિંદદેવ ગિરીએ જાહેરમાં સ્વીકાર્યું છે કે મંદિરના દાનમાંથી અંદાજે 3 કરોડ રૂપિયાની ચોરી થઈ છે. આ નિવેદન બાદ અત્યાર સુધી ચાલી રહેલી અટકળો પર વિરામ લાગ્યો છે. જોકે ગોવિંદદેવ ગિરીએ સ્પષ્ટ કર્યું છે કે સોશિયલ મીડિયા અને કેટલાક અહેવાલોમાં કરવામાં આવતા 14 કરોડ રૂપિયાના સોનું, ચાંદી અને અન્ય કિંમતી વસ્તુઓની ચોરીના દાવાઓમાં કોઈ સત્ય નથી. તેમના કહેવા મુજબ તપાસમાં હાલ સુધી માત્ર રોકડ દાનની ચોરીની જ પુષ્ટિ થઈ છે અને કિંમતી ધાતુઓની ચોરી અંગેના દાવા આધારહીન છે.
ચોરીનો મામલો કેવી રીતે આવ્યો સામે?
રામ મંદિરના દાનના હિસાબમાં ગડબડ સામે આવ્યા બાદ આ સમગ્ર મામલો ચર્ચામાં આવ્યો હતો. મંદિરના દાનની ગણતરી, બેંકમાં જમા થતી રકમ અને નાણાકીય વ્યવસ્થામાં અનિયમિતતા હોવાની શંકા બાદ તપાસ શરૂ કરવામાં આવી હતી. પ્રાથમિક તપાસમાં કેટલાક કર્મચારીઓ અને વહીવટી પ્રક્રિયાઓ અંગે સવાલો ઊભા થયા હતા. ત્યારબાદ રાજ્ય સરકાર દ્વારા વિશેષ તપાસ ટીમ (SIT)ની રચના કરવામાં આવી હતી. SITએ પોતાની પ્રાથમિક તપાસમાં અંદાજે 80 લાખ રૂપિયાની વસૂલાત કરી હોવાનું જણાવ્યું હતું, પરંતુ હવે ટ્રસ્ટના કોષાધ્યક્ષે કુલ ચોરીની રકમ લગભગ 3 કરોડ રૂપિયા હોવાનું સ્વીકારતા મામલો વધુ ગંભીર બન્યો છે.
ગોવિંદદેવ ગિરીએ શું કહ્યું?
પુણેમાં મીડિયા સાથે વાતચીત દરમિયાન ગોવિંદદેવ ગિરીએ જણાવ્યું કે, "રામ મંદિરના દાનમાંથી અંદાજે ત્રણ કરોડ રૂપિયાની ચોરી થઈ છે, પરંતુ 14 કરોડ રૂપિયાનું સોનું, ચાંદી અને કિંમતી વસ્તુઓની ચોરી થઈ હોવાના અહેવાલો સંપૂર્ણપણે ખોટા છે." તેમણે જણાવ્યું કે, તપાસ એજન્સીઓ પોતાની કામગીરી નિષ્પક્ષ રીતે કરી રહી છે અને ટ્રસ્ટ તરફથી કોઈપણ પ્રકારનો દબાણ કરવાનો પ્રયાસ કરવામાં આવ્યો નથી. તેમણે ભારપૂર્વક કહ્યું કે રામલલાના મંદિરમાં થયેલો આ ગુનો અત્યંત ગંભીર છે અને જે કોઈ પણ દોષિત હશે તેને કાયદા મુજબ કડક સજા મળવી જ જોઈએ.
રાજીનામાની અટકળો પર લગાવ્યો પૂર્ણવિરામ
તાજેતરમાં એવી ચર્ચા ચાલી રહી હતી કે દાન ચોરીના વિવાદ બાદ ટ્રસ્ટના કોષાધ્યક્ષ ગોવિંદદેવ ગિરી રાજીનામું આપી શકે છે. જોકે તેમણે આ તમામ અટકળોને નકારી કાઢી હતી. તેમણે કહ્યું કે તેમણે ક્યારેય રાજીનામું આપવાની વાત કરી નથી અને તેમના મનમાં પણ એવો કોઈ વિચાર નથી. તેમણે કહ્યું કે, "હું છત્રપતિ શિવાજી મહારાજના આદર્શોને માનું છું. મુશ્કેલીઓ સામે જવાબદારી છોડીને ભાગી જવાનો પ્રશ્ન જ ઊભો થતો નથી." ગોવિંદદેવ ગિરીએ પોતાની સાદગીનો ઉલ્લેખ કરતાં કહ્યું કે તેમના નામે કોઈ વૈભવી સંપત્તિ નથી અને તેઓ સામાન્ય જીવન જીવે છે.
ચંપત રાયના રાજીનામા અંગે પણ કરી સ્પષ્ટતા
ટ્રસ્ટના પૂર્વ મહાસચિવ ચંપત રાયના રાજીનામા અંગે પણ ગોવિંદદેવ ગિરીએ મહત્વપૂર્ણ નિવેદન આપ્યું હતું. તેમણે જણાવ્યું કે ચંપત રાયે કોઈ દબાણ હેઠળ નહીં પરંતુ પોતાની નૈતિક જવાબદારી સ્વીકારી સ્વેચ્છાએ પદ છોડ્યું છે. તેમના જણાવ્યા અનુસાર, વહીવટી સ્તરે કેટલીક બેદરકારી થઈ હોવાનો તેમને અહેસાસ થયો હતો અને તેના કારણે તેમણે પોતે રાજીનામું આપવાનો નિર્ણય લીધો હતો. તેમને "બલિનો બકરો" બનાવવામાં આવ્યો હોવાનો દાવો યોગ્ય નથી.
આ પણ વાંચો: રામ મંદિર ટ્રસ્ટે બહાર પાડી CEOની ભરતી : ઉંમરથી લઈને લાયકાત સુધી જાણો તમામ વિગતો
SIT તપાસ હવે નિર્ણાયક તબક્કામાં
વિશેષ તપાસ ટીમ (SIT) હાલમાં સમગ્ર નાણાકીય વ્યવહારની ઊંડાણપૂર્વક તપાસ કરી રહી છે. દાનપેટીઓમાંથી એકત્ર થતી રકમની ગણતરીથી લઈને બેંકમાં જમા કરવાની પ્રક્રિયા, હિસાબી દસ્તાવેજો, સુરક્ષા વ્યવસ્થા અને જવાબદાર કર્મચારીઓની ભૂમિકા સહિતના તમામ મુદ્દાઓની ચકાસણી થઈ રહી છે. તપાસ દરમિયાન સીસીટીવી ફૂટેજ, બેંક ટ્રાન્ઝેક્શન, હિસાબી રજીસ્ટરો અને સંબંધિત કર્મચારીઓના નિવેદનો પણ નોંધવામાં આવી રહ્યા છે. તપાસ એ દિશામાં પણ આગળ વધી રહી છે કે આ ગેરરીતિ કોઈ વ્યક્તિગત સ્તરે થઈ હતી કે તેમાં વધુ લોકો સંડોવાયેલા હતા.
22 જુલાઈની બેઠકમાં થઈ શકે છે મોટા નિર્ણયો
શ્રી રામ જન્મભૂમિ તીર્થક્ષેત્ર ટ્રસ્ટની આગામી મહત્વપૂર્ણ બેઠક 22 જુલાઈના રોજ યોજાવાની છે. આ બેઠકને સમગ્ર વિવાદની દૃષ્ટિએ અત્યંત મહત્વપૂર્ણ માનવામાં આવી રહી છે. બેઠકમાં SITની પ્રાથમિક અને અંતિમ તપાસ અંગે ચર્ચા કરવામાં આવશે. ઉપરાંત ટ્રસ્ટના ખાલી પડેલા હોદ્દાઓ પર નવી નિમણૂકો, વહીવટી સુધારાઓ અને સુરક્ષા વ્યવસ્થાને વધુ મજબૂત બનાવવાના મુદ્દાઓ પર પણ નિર્ણય લેવામાં આવી શકે છે.
પાંચ સમિતિઓમાં થઈ શકે છે ફેરફાર
ટ્રસ્ટના બાયલોઝ મુજબ નિર્માણ, નાણાકીય (ફાઈનાન્સ), ઓડિટ, ધાર્મિક અને મેનેજમેન્ટ એમ પાંચ મુખ્ય સમિતિઓ કાર્યરત છે. વતાજેતરમાં ચંપત રાય અને ડૉ. અનિલ મિશ્રના રાજીનામા તેમજ અયોધ્યા નરેશ વિમલેન્દ્ર મોહન પ્રતાપ મિશ્રના અવસાન બાદ અનેક જગ્યાઓ ખાલી પડી છે. હવે આ સમિતિઓમાં નવા સભ્યોની નિમણૂક થવાની શક્યતા છે. નિષ્ણાતોને પણ સમિતિમાં સામેલ કરવાની ચર્ચા ચાલી રહી છે જેથી ભવિષ્યમાં આવી કોઈ અનિયમિતતા ફરી ન સર્જાય.
દાન વ્યવસ્થામાં પારદર્શિતા વધારવા નવા પગલાં શક્ય
આ સમગ્ર વિવાદ બાદ ટ્રસ્ટ હવે દાન વ્યવસ્થાને વધુ પારદર્શક અને ટેક્નોલોજી આધારિત બનાવવાના વિકલ્પો પર પણ વિચાર કરી રહ્યું હોવાનું માનવામાં આવે છે. સૂત્રોના જણાવ્યા મુજબ, દાનની ગણતરીમાં ડિજિટલ સિસ્ટમ, વધુ સીસીટીવી દેખરેખ, સ્વતંત્ર ઓડિટ, મલ્ટી-લેવલ વેરિફિકેશન અને સુરક્ષા વ્યવસ્થામાં સુધારા જેવા પગલાં અંગે પણ ચર્ચા થઈ શકે છે.
દેશભરમાં ચર્ચાનો વિષય બન્યો મામલો
અયોધ્યાનું શ્રી રામ મંદિર કરોડો શ્રદ્ધાળુઓની આસ્થાનું કેન્દ્ર છે. આવી સ્થિતિમાં મંદિરના દાન સાથે જોડાયેલા આ વિવાદે દેશભરમાં ચર્ચા જગાવી છે. શ્રદ્ધાળુઓ હવે ઈચ્છી રહ્યા છે કે સમગ્ર ઘટનાની પારદર્શક તપાસ થાય, દોષિતોને કડક સજા મળે અને ભવિષ્યમાં આવી ઘટના ફરી ક્યારેય ન બને તે માટે કડક વ્યવસ્થા અમલમાં મૂકવામાં આવે. હવે સમગ્ર દેશની નજર 22 જુલાઈએ યોજાનારી શ્રી રામ જન્મભૂમિ તીર્થક્ષેત્ર ટ્રસ્ટની બેઠક અને SITની અંતિમ તપાસ રિપોર્ટ પર ટકેલી છે. આ બેઠકમાં લેવાતા નિર્ણયો માત્ર આ કેસ માટે જ નહીં, પરંતુ મંદિરના વહીવટી માળખા અને દાન વ્યવસ્થાના ભવિષ્ય માટે પણ અત્યંત મહત્વપૂર્ણ સાબિત થઈ શકે છે.
