દેશભરના કેન્દ્રીય કર્મચારીઓ હજુ આઠમા વેતન પંચ અને આગામી મોંઘવારી ભથ્થાની જાહેરાતની રાહ જોઈ રહ્યા છે ત્યારે આસામ સરકારે પોતાના સરકારી કર્મચારીઓ અને પેન્શનરોને મોટી ભેટ આપી છે. રાજ્ય સરકારે મોંઘવારી ભથ્થું (DA) અને મોંઘવારી રાહત (DR)માં 2 ટકાનો વધારો જાહેર કર્યો છે. આ નિર્ણયના કારણે લાખો કર્મચારીઓના માસિક વેતનમાં વધારો થશે અને પેન્શનરોને પણ વધારાની આર્થિક રાહત મળશે.
આસામ સરકારે DA અને DRમાં 2% વધારાની જાહેરાત કરી
મુખ્યમંત્રી હિમંત બિસ્વા સરમાના નેતૃત્વ હેઠળ યોજાયેલી કેબિનેટ બેઠકમાં રાજ્યના કર્મચારીઓ અને પેન્શનરો માટે મહત્વપૂર્ણ નિર્ણય લેવામાં આવ્યો હતો. સરકાર દ્વારા મોંઘવારી ભથ્થું અને મોંઘવારી રાહત બંનેમાં 2 ટકાનો વધારો મંજૂર કરવામાં આવ્યો છે. આ વધારા બાદ DA અને DRનો દર 58 ટકાથી વધીને 60 ટકા થઈ ગયો છે.
સરકારના જણાવ્યા અનુસાર આ વધારો 1 જાન્યુઆરી 2026થી અમલમાં ગણવામાં આવશે. એટલે કર્મચારીઓને વધારાનો લાભ બાકી રહેલા સમયગાળાના એરીયર્સ સાથે પણ મળી શકે છે. મોંઘવારી સતત વધી રહી હોવાથી કર્મચારીઓ પર પડતા આર્થિક બોજને ઘટાડવા માટે રાજ્ય સરકારે આ પગલું ભર્યું હોવાનું માનવામાં આવે છે.
મુખ્યમંત્રી હિમંત બિસ્વા સરમાની જીત બાદ તેમની અધ્યક્ષતામાં યોજાયેલી આ પ્રથમ કેબિનેટ બેઠક હતી, જેમાં કર્મચારીઓ અને પેન્શનરોના હિતમાં મહત્વના નિર્ણયો લેવામાં આવ્યા છે.
કેટલો વધશે કર્મચારીઓનો પગાર?
DAમાં થયેલો વધારો કર્મચારીઓના મૂળ વેતન (Basic Pay) પર લાગુ પડે છે. તેથી જે કર્મચારીઓનું મૂળ વેતન વધુ હશે તેમને વધુ નાણાકીય લાભ મળશે.
ઉદાહરણ તરીકે જો કોઈ કર્મચારીનું બેઝિક વેતન 30,000 રૂપિયા છે તો અગાઉ 58 ટકા DAના આધારે તેને દર મહિને 17,400 રૂપિયા મોંઘવારી ભથ્થા તરીકે મળતા હતા. હવે 60 ટકા DA લાગુ થતાં તેને 18,000 રૂપિયા મળશે. એટલે કે દર મહિને 600 રૂપિયાનો વધારાનો લાભ મળશે.
તે જ રીતે જો કોઈ કર્મચારીનું બેઝિક વેતન 50,000 રૂપિયા છે તો અગાઉ 58 ટકા DA પ્રમાણે તેને 29,000 રૂપિયા મળતા હતા. હવે 60 ટકા DA સાથે આ રકમ 30,000 રૂપિયા થઈ જશે. એટલે દર મહિને 1,000 રૂપિયાનો સીધો વધારો થશે. આ વધારો અમલમાં આવ્યા બાદ કર્મચારીઓના ખાતામાં વધેલી રકમ આગામી પગાર સાથે જમા થવાની શક્યતા છે. મોંઘવારીના સમયમાં આ વધારાની આવક કર્મચારીઓના ઘરેલુ બજેટને મજબૂત બનાવવામાં મદદરૂપ બનશે.
ગ્રેડ-4 કર્મચારીઓ માટે પણ મોટી જાહેરાત
માત્ર DA વધારો જ નહીં પરંતુ રાજ્ય સરકારે નીચલા સ્તરના કર્મચારીઓના કારકિર્દી વિકાસને ધ્યાનમાં રાખીને એક મહત્વપૂર્ણ નીતિગત નિર્ણય પણ લીધો છે. કેબિનેટ દ્વારા 'અસમ માધ્યમિક શિક્ષણ (પ્રાંતીયકૃત શાળા) સેવા નિયમો, 2026'માં સુધારાને મંજૂરી આપવામાં આવી છે. આ સુધારા બાદ શાળાઓ અને સરકારી વિભાગોમાં કાર્યરત ગ્રેડ-4 કર્મચારીઓને ગ્રેડ-3 પદો પર પ્રમોશન મેળવવાની પ્રક્રિયા વધુ સરળ અને નિયમિત બનશે. લાંબા સમયથી પ્રમોશનની રાહ જોતા કર્મચારીઓ માટે આ નિર્ણય મહત્વપૂર્ણ માનવામાં આવી રહ્યો છે. સરકારનું માનવું છે કે પ્રમોશનની વધુ સારી તકો મળવાથી કર્મચારીઓમાં ઉત્સાહ વધશે અને તેમની કાર્યક્ષમતા પણ સુધરશે. ખાસ કરીને નીચલા સ્તરના કર્મચારીઓને તેમની સેવાઓના આધારે આગળ વધવાની વધુ તક મળશે.
