Assam Weather: આસામ અને પડોશી અરુણાચલ પ્રદેશમાં સતત વરસી રહેલા ભારે વરસાદને કારણે પૂરની સ્થિતિ ગંભીર બની છે. આસામ રાજ્ય આપત્તિ વ્યવસ્થાપન સત્તામંડળ (ASDMA)ના તાજા આંકડા મુજબ રાજ્યના છ જિલ્લાઓમાં 22 હજારથી વધુ લોકો પૂરથી પ્રભાવિત થયા છે. ધેમાજી જિલ્લો સૌથી વધુ અસરગ્રસ્ત બન્યો છે, જ્યાં હજારો લોકોના ઘરો અને ખેતીની જમીન પાણીમાં ગરકાવ થઈ ગઈ છે. પરિસ્થિતિને ધ્યાનમાં રાખીને મુખ્યમંત્રી હિમંતા બિસ્વા શર્માએ રાહત અને બચાવ કામગીરી ઝડપી બનાવવા અધિકારીઓને તાત્કાલિક સૂચનાઓ આપી છે.
છ જિલ્લાઓમાં પૂરનો વ્યાપક પ્રભાવ
ASDMAના જણાવ્યા અનુસાર ધેમાજી, નલબારી, ડિબ્રુગઢ, ચિરાંગ, લખીમપુર અને કોકરાઝાર જિલ્લામાં કુલ 22,124 લોકો પૂરથી પ્રભાવિત થયા છે. તેમાં સૌથી વધુ અસર ધેમાજી જિલ્લામાં જોવા મળી રહી છે, જ્યાં 15,483 લોકો પૂર વચ્ચે જીવન જીવવા મજબૂર બન્યા છે. પૂરના કારણે ધેમાજીના 96 ગામો પાણીમાં ગરકાવ થઈ ગયા છે. ઉપરાંત અંદાજે 1,690 હેક્ટર ખેતીની જમીનને નુકસાન થયું છે, જેના કારણે ખેડૂતોને ભારે આર્થિક ફટકો પડ્યો છે. માત્ર માનવજીવન જ નહીં પરંતુ લગભગ 48,199 પશુઓ પણ પૂરની અસર હેઠળ આવ્યા છે.
બ્રહ્મપુત્ર અને સહાયક નદીઓ ખતરાના સ્તરે
સતત વરસાદને કારણે બ્રહ્મપુત્ર અને તેની સહાયક નદીઓના જળસ્તરમાં સતત વધારો નોંધાઈ રહ્યો છે. શિવસાગર જિલ્લાના નંગલમુરાઘાટ ખાતે દિસાંગ નદી જોખમી સપાટીથી ઉપર વહી રહી છે, જેના કારણે નીચાણવાળા વિસ્તારોમાં વધુ પાણી ભરાવાની આશંકા વ્યક્ત કરવામાં આવી છે. રાજ્યના અનેક વિસ્તારોમાં સ્થાનિક પ્રશાસન સતત દેખરેખ રાખી રહ્યું છે અને લોકોને સલામત સ્થળોએ ખસેડવાની કામગીરી હાથ ધરવામાં આવી રહી છે.
મુખ્યમંત્રી હિમંતા બિસ્વા શર્માના મહત્વપૂર્ણ નિર્દેશ
મુખ્યમંત્રી હિમંતા બિસ્વા શર્માએ જણાવ્યું કે રાજ્ય સરકાર અસરગ્રસ્ત પરિવારોને તાત્કાલિક રાહત પહોંચાડવા માટે તમામ જરૂરી સંસાધનો ઉપલબ્ધ કરાવી રહી છે. તેમણે સોશિયલ મીડિયા પર પોસ્ટ કરીને જણાવ્યું કે તેઓ સમગ્ર પરિસ્થિતિ પર સતત નજર રાખી રહ્યા છે અને સરકાર દરેક અસરગ્રસ્ત પરિવારની સાથે છે. મુખ્યમંત્રીએ જળ સંસાધન મંત્રી સુશાંત બોરગોહેન અને મહેસૂલ તથા આપત્તિ વ્યવસ્થાપન મંત્રી કેશવ મહંતને ધેમાજીમાં રહીને રાહત અને પુનર્વસન કામગીરીનું સીધું નિરીક્ષણ કરવાની સૂચના આપી છે.
રેલવે પુલને નુકસાન, ટ્રેન સેવા સ્થગિત
ભારે વરસાદ અને માટી ધોવાણના કારણે ધેમાજી જિલ્લામાં સિમેન નદી પર આવેલ રેલવે પુલને આંશિક નુકસાન પહોંચ્યું છે. આ ઘટનાને પગલે નોર્થઈસ્ટ ફ્રન્ટિયર રેલવેએ આર્ચીપથર અને સિમેન છાપરી સ્ટેશન વચ્ચે ટ્રેન સેવા આગામી સૂચના સુધી સ્થગિત કરી છે. રેલવેના જણાવ્યા અનુસાર ભારે વરસાદના કારણે નદીનો પ્રવાહ વધતા પુલનો એક થાંભલો અસ્થિર બની ગયો હતો. જોકે આ ઘટનામાં કોઈ ટ્રેનને નુકસાન થયું નથી અને કોઈ જાનહાનિ પણ થઈ નથી.
મુસાફરો માટે ખાસ વ્યવસ્થા
રેલવે વિભાગે જણાવ્યું છે કે મુરકોંગસેલેક અને સિલાપથર વચ્ચેની ટ્રેન સેવા હાલ બંધ રાખવામાં આવી છે. ટ્રેનો હાલ સિલાપથર સુધી જ દોડાવવામાં આવી રહી છે.
મુસાફરોને મુશ્કેલી ન પડે તે માટે ધેમાજી, સિલાપથર અને મુરકોંગસેલેક સ્ટેશનો પર હેલ્પ ડેસ્ક શરૂ કરવામાં આવ્યા છે. ઉપરાંત અસરગ્રસ્ત મુસાફરો માટે બસ દ્વારા પરિવહનની પણ વ્યવસ્થા કરવામાં આવી છે.
આ પણ વાંચો: ભારે વરસાદથી લઈને વાવાઝોડા સુધી... : IMDએ 15 રાજ્યો માટે જાહેર કર્યું હાઈ એલર્ટ, 70 કિમીની ઝડપે ફૂંકાશે પવન
શા માટે મહત્વપૂર્ણ છે આ સ્થિતિ?
ચોમાસાની શરૂઆત સાથે ઉત્તર-પૂર્વ ભારતમાં ભારે વરસાદનું પ્રમાણ વધ્યું છે. આસામમાં દર વર્ષે પૂર મોટી સમસ્યા બને છે, પરંતુ આ વર્ષે શરૂઆતના તબક્કામાં જ હજારો લોકો અસરગ્રસ્ત બન્યા છે. જો આગામી દિવસોમાં વરસાદ યથાવત રહેશે તો વધુ જિલ્લાઓમાં પણ પૂરનું જોખમ વધી શકે છે. રાજ્ય સરકાર અને આપત્તિ વ્યવસ્થાપન તંત્ર પરિસ્થિતિ પર સતત નજર રાખી રહ્યા છે.
