Adelaide Oval Test: એશિઝ સિરીઝના ત્રીજા અને અત્યંત મહત્ત્વપૂર્ણ ટેસ્ટ મેચ માટે ઓસ્ટ્રેલિયાએ પોતાની પ્લેઇંગ-11ની જાહેરાત કરી દીધી છે. આ ટેસ્ટ મેચ એડિલેડ ઓવલમાં રમાશે, અને તેમાં બે મોટા ફેરફારો જોવા મળ્યા છે, નિયમિત કેપ્ટન પેટ કમિન્સ અને અનુભવી ઓફ-સ્પિનર નાથન લાયનનું ટીમમાં પુનરાગમન થયું છે. ગાબા ટેસ્ટમાં શાનદાર 8 વિકેટથી જીત મેળવનારી ટીમમાંથી બે ખેલાડીઓને બહાર કરવામાં આવ્યા છે. ઓલરાઉન્ડર માઇકલ નેસરને પડતો મૂકવામાં આવ્યો છે, જેણે ગાબામાં સારી બોલિંગ કરી હતી. નેસરને આ નિર્ણયથી સૌથી વધુ દુર્ભાગ્યશાળી ખેલાડી ગણવામાં આવી રહ્યો છે. તેની સાથે ઝડપી બોલર બ્રેન્ડન ડોગેટને પણ ટીમમાંથી બહાર બેસવું પડ્યું છે.
ઉસ્માન ખ્વાજાને ટીમમાંથી પડતો મૂકાયો
કેપ્ટન પેટ કમિન્સ માટે આ ટેસ્ટ ગયા વર્ષના મધ્યમાં વેસ્ટ ઈન્ડિઝ સામે રમાયેલા મેચ પછીનો પ્રથમ ટેસ્ટ હશે. કમિન્સે પુષ્ટિ કરી છે કે તેઓ સંપૂર્ણપણે ફિટ છે અને આ મેચમાં બોલિંગમાં ઓવરની કોઈ મર્યાદા રહેશે નહીં. તેમણે કહ્યું કે જો તેઓ બ્રિસ્બેન ટેસ્ટમાં રમ્યા હોત, તો કદાચ ઓછા ઓવર ફેંક્યા હોત, પરંતુ એડિલેડ ટેસ્ટમાં તેઓ સામાન્ય ટેસ્ટ મેચની જેમ સંપૂર્ણ ક્ષમતાથી રમશે. કમિન્સનું નેતૃત્વ અને ઝડપી બોલિંગની ધાર ઓસ્ટ્રેલિયા માટે નિર્ણાયક સાબિત થઈ શકે છે. સિલેક્ટર્સ દ્વારા ઓપનિંગ જોડી તરીકે ટ્રેવિસ હેડ અને જેક વેધરલ્ડ પર વિશ્વાસ જાળવી રાખવામાં આવ્યો છે. પરિણામે, અનુભવી સલામી બેટ્સમેન ઉસ્માન ખ્વાજાને ફરી એકવાર પ્લેઇંગ-11માં જગ્યા મળી નથી. ખ્વાજાના સ્થાન અંગેના સવાલોના જવાબમાં કમિન્સે સ્પષ્ટ કર્યું કે ખ્વાજાની આંતરરાષ્ટ્રીય કારકિર્દી સમાપ્ત થઈ નથી અને તે ટીમ માટે હંમેશા તૈયાર રહેનારા ખેલાડી છે.
એશિઝમાં 'કરો યા મરો'ની સ્થિતિ
વિકેટકીપર બેટ્સમેન જોશ ઈંગ્લિસ પણ ટીમમાં યથાવત્ છે અને તે સાતમા નંબર પર બેટિંગ કરશે, જે ટીમને નીચેના ક્રમમાં બેટિંગની મજબૂતી પૂરી પાડશે. મિડલ ઓર્ડરમાં માર્નસ લાબુશેન, સ્ટીવ સ્મિથ અને કેમરૂન ગ્રીન જેવા મજબૂત બેટ્સમેનો ટીમનો આધારસ્તંભ છે. કમિન્સે બ્યુ વેબસ્ટર, માઇકલ નેસર અને બ્રેન્ડન ડોજેટ જેવા ખેલાડીઓની સકારાત્મક ભૂમિકાની પ્રશંસા કરી, જેઓ આ સિરીઝમાં બહાર હોવા છતાં ટીમનો માહોલ સારો જાળવી રાખ્યો છે. તેમણે કહ્યું કે એશિઝ સિરીઝ જીતવા માટે માત્ર મજબૂત ટીમ જ નહીં, પણ મોટો અને સહાયક સ્ક્વોડ પણ જરૂરી છે. પાંચ મેચોની એશિઝ ટેસ્ટ સિરીઝમાં, ઓસ્ટ્રેલિયાએ બેન સ્ટોક્સની આગેવાનીવાળી ઇંગ્લેન્ડની ટીમને શરૂઆતી બંને ટેસ્ટ મેચોમાં હરાવીને 2-0ની મજબૂત લીડ મેળવી છે. એડિલેડમાં ત્રીજો ટેસ્ટ જીતીને ઓસ્ટ્રેલિયા સિરીઝમાં અજેય લીડ મેળવી લેશે, જેનાથી ઇંગ્લેન્ડની ટીમ સામે હવે 'કરો યા મરો'ની મોટી ચેલેન્જ છે.
ઓસ્ટ્રેલિયાની પ્લેઇંગ-11:
ટ્રેવિસ હેડ, જેક વેધરલ્ડ, માર્નસ લાબુશેન, સ્ટીવ સ્મિથ, કેમરૂન ગ્રીન, એલેક્સ કેરી (વિકેટકીપર), જોશ ઈંગ્લિસ, પેટ કમિન્સ (કેપ્ટન), મિચેલ સ્ટાર્ક, નાથન લાયન, સ્કોટ બોલન્ડ
