કુર્નૂલ: આંધ્રપ્રદેશના કુર્નૂલ જિલ્લામાં આજે વહેલી સવારે એક હૃદયદ્રાવક માર્ગ અકસ્માતની ઘટના સામે આવી છે, જેમાં તીર્થયાત્રા પર નીકળેલા 8 શ્રદ્ધાળુઓના કરૂણ મોત નિપજ્યા છે. ચિલકાલાડોના નજીક હાઈવે પર પૂરપાટ ઝડપે જઈ રહેલી બોલેરો કાર અને ટ્રક વચ્ચે થયેલી ભીષણ અથડામણમાં કારનો કચ્ચરઘાણ વળી ગયો હતો. આ અકસ્માત એટલો ભયાનક હતો કે કારમાં સવાર અનેક લોકો ઘટનાસ્થળે જ કાળનો કોળિયો બની ગયા હતા, જ્યારે 10થી 12 જેટલા લોકો ગંભીર રીતે ઇજાગ્રસ્ત થયા છે. ઘટનાને પગલે સમગ્ર વિસ્તારમાં અરેરાટી વ્યાપી ગઈ છે અને સ્થાનિક પ્રશાસન દ્વારા તાત્કાલિક બચાવ કામગીરી હાથ ધરવામાં આવી છે.
પ્રાપ્ત વિગતો અનુસાર, આ તમામ મૃતકો કર્ણાટકના ચિક્કમગલુરુ વિસ્તારના રહેવાસી હતા અને તેઓ એક ધાર્મિક પ્રવાસ પર નીકળ્યા હતા. યાત્રાળુઓથી ભરેલી બોલેરો કાર જ્યારે કુર્નૂલ જિલ્લામાંથી પસાર થઈ રહી હતી, ત્યારે અચાનક સામેથી આવતી ટ્રક સાથે તેની જોરદાર ટક્કર થઈ હતી. અકસ્માતનો અવાજ સાંભળી આસપાસના સ્થાનિક લોકો દોડી આવ્યા હતા અને પોલીસને જાણ કરી હતી. ઇજાગ્રસ્તોને તાત્કાલિક નજીકની હોસ્પિટલમાં ખસેડવામાં આવ્યા છે, જ્યાં કેટલાકની હાલત અત્યંત નાજુક હોવાનું જણાવાઈ રહ્યું છે, જેને પગલે મૃત્યુઆંક વધવાની આશંકા પણ સેવાઈ રહી છે.
તીર્થયાત્રા બની લોહીયાળ: કર્ણાટકના શ્રદ્ધાળુઓનો વિખેરાયો પરિવાર
અકસ્માતનો ભોગ બનેલા તમામ યાત્રાળુઓ કર્ણાટકના ચિક્કમગલુરુથી આંધ્રપ્રદેશના ધાર્મિક સ્થળોના દર્શન કરવા આવ્યા હતા. ખુશીઓ સાથે શરૂ થયેલી આ તીર્થયાત્રામાં કાળ આંખના પલકારે ત્રાટક્યો હતો. અકસ્માત એટલો જોરદાર હતો કે બોલેરો કારના લોખંડના પતરા ચીરીને મૃતદેહો બહાર કાઢવા પડ્યા હતા. કુર્નૂલ પોલીસે ઘટનાસ્થળે પહોંચી તપાસનો ધમધમાટ શરૂ કર્યો છે અને અકસ્માત ડ્રાઈવરની બેદરકારીને કારણે થયો છે કે અન્ય કોઈ ટેકનિકલ કારણસર, તે અંગે વિગતો મેળવવામાં આવી રહી છે.
આ પણ વાંચો: Lucknow માં ભીષણ આગનો કહેર : 250થી વધુ ઝૂંપડાઓ ખાખ, સિલિન્ડર વિસ્ફોટોથી આખું શહેર ધ્રુજ્યું
PMO દ્વારા સહાયની જાહેરાત: મૃતકોના પરિવારને ₹2 લાખની આર્થિક મદદ
આ દુર્ઘટના પર પ્રધાનમંત્રી કાર્યાલય (PMO) દ્વારા ઘેરો શોક વ્યક્ત કરવામાં આવ્યો છે. વડાપ્રધાન નરેન્દ્ર મોદીએ પીડિત પરિવારો પ્રત્યે સંવેદના વ્યક્ત કરતા આર્થિક સહાયની જાહેરાત કરી છે. પ્રધાનમંત્રી રાહત ફંડમાંથી દરેક મૃતકના પરિવારને 2 લાખ રૂપિયા અને ગંભીર રીતે ઇજાગ્રસ્ત થયેલા લોકોને 50 હજાર રૂપિયાની સહાય આપવામાં આવશે. કેન્દ્ર અને રાજ્ય સરકાર દ્વારા ઇજાગ્રસ્તોને શ્રેષ્ઠ સારવાર મળે તે માટે તંત્રને આદેશો આપવામાં આવ્યા છે.
માર્ગ સુરક્ષા સામે ફરી ઉઠ્યા સવાલો
હાઈવે પર સતત વધતા અકસ્માતોએ ફરી એકવાર માર્ગ સુરક્ષાના નિયમોના કડક અમલીકરણ પર ભાર મૂક્યો છે. પ્રાથમિક અનુમાન મુજબ, રાત્રિના સમયે ડ્રાઈવરને ઝોકું આવી જવું અથવા અતિશય ઝડપ આ અકસ્માતનું કારણ હોઈ શકે છે. આ હૃદયદ્રાવક ઘટનાએ તીર્થયાત્રીઓની સુરક્ષા અને લાંબા અંતરના પ્રવાસમાં ડ્રાઈવરોની સતર્કતા અંગે અનેક પ્રશ્નો ઉભા કર્યા છે.
