આર્ટિફિશિયલ ઇન્ટેલિજન્સ (AI) દુનિયાને નવી ટેક્નોલોજી અને સુવિધાઓ આપી રહ્યું છે, પરંતુ તેની સાથે ગુનાખોરીના નવા સ્વરૂપો પણ ઝડપથી વધી રહ્યા છે. સંયુક્ત રાષ્ટ્ર (UN)ની નવી રિપોર્ટમાં ચેતવણી આપવામાં આવી છે કે દક્ષિણ-પૂર્વ એશિયામાં સક્રિય આંતરરાષ્ટ્રીય ગુનાહિત ગેંગ હવે AI, ક્રિપ્ટોકરન્સી અને એન્ક્રિપ્ટેડ કમ્યુનિકેશન જેવી આધુનિક ટેક્નોલોજીનો ઉપયોગ કરીને સમગ્ર વિશ્વમાં પોતાનું નેટવર્ક વિસ્તારી રહ્યા છે. ઓનલાઈન ઠગાઈ, મની લોન્ડરિંગ, ડ્રગ્સ તસ્કરી, માનવ તસ્કરી અને બાળકોના યૌન શોષણ જેવા ગંભીર ગુનાઓમાં AIનો ઉપયોગ ઝડપથી વધી રહ્યો હોવાનું રિપોર્ટમાં જણાવાયું છે.
AI અને ક્રિપ્ટોકરન્સી બની રહ્યા છે ગુનેગારોના નવા હથિયાર
સંયુક્ત રાષ્ટ્રના યુનાઇટેડ નેશન્સ ઓફિસ ઓન ડ્રગ્સ એન્ડ ક્રાઈમ (UNODC) દ્વારા જાહેર કરાયેલી રિપોર્ટ અનુસાર, અગાઉ દક્ષિણ-પૂર્વ એશિયા સુધી મર્યાદિત રહેલા આંતરરાષ્ટ્રીય ગુનાહિત નેટવર્ક હવે એશિયાની બહાર પણ ઝડપથી ફેલાઈ રહ્યા છે. આ ગેંગો AI, ક્રિપ્ટોકરન્સી, એન્ક્રિપ્ટેડ મેસેજિંગ પ્લેટફોર્મ અને અન્ય ડિજિટલ ટેક્નોલોજીનો ઉપયોગ કરીને સંગઠિત ગુનાઓને વધુ વ્યવસ્થિત બનાવી રહ્યા છે.
રિપોર્ટમાં જણાવાયું છે કે ઓનલાઈન ઠગાઈના કારણે માત્ર વર્ષ 2025 દરમિયાન વૈશ્વિક અર્થતંત્રને અંદાજે 88.3 અબજથી 114.1 અબજ ડોલર સુધીનું નુકસાન થઈ શકે છે. AIની મદદથી વિશ્વસનીય ફિશિંગ મેસેજ, નકલી વેબસાઇટ, બહુભાષી ઠગાઈ અભિયાન અને રિયલ-ટાઈમ ડીપફેક વીડિયો તૈયાર કરીને લોકો સાથે છેતરપિંડી કરવામાં આવી રહી છે.
બાળકો સામે વધતા ઓનલાઈન જોખમોને લઈને UNએ વ્યક્ત કરી ગંભીર ચિંતા
રિપોર્ટમાં બાળકોની ઓનલાઈન સુરક્ષાને લઈને પણ ગંભીર ચિંતા વ્યક્ત કરવામાં આવી છે. દક્ષિણ-પૂર્વ એશિયામાં કાર્યરત અનેક સ્કેમ સેન્ટરો હવે બાળકોના યૌન શોષણ સાથે સંબંધિત સામગ્રીના ગેરકાયદે વેપારનું માધ્યમ બની રહ્યા હોવાનું જણાવાયું છે.
UNODCના સંશોધક ઇન્શિક સિમના જણાવ્યા અનુસાર, જનરેટિવ AI, ડીપફેક ટેક્નોલોજી અને મેલવેરનો ઉપયોગ કરીને બાળકોની નકલી અશ્લીલ તસવીરો તૈયાર કરવામાં આવી રહી છે. આ સામગ્રીનો ઉપયોગ બ્લેકમેલિંગ, ઓનલાઈન ગ્રૂમિંગ અને યૌન શોષણ જેવા ગંભીર ગુનાઓ માટે થઈ રહ્યો છે. આ ઉપરાંત ઓનલાઈન ગેમિંગ પ્લેટફોર્મ અને સોશિયલ મીડિયા દ્વારા પણ બાળકોને નિશાન બનાવવાના બનાવોમાં વધારો નોંધાયો છે.
રિપોર્ટમાં એવો પણ ઉલ્લેખ કરવામાં આવ્યો છે કે દક્ષિણ-પૂર્વ એશિયામાં મોટી સંખ્યામાં બાળકો ઓનલાઈન જુગાર સાથે જોડાઈ રહ્યા છે અને તેમાંના ઘણા વ્યસનનો શિકાર બની રહ્યા છે. નિષ્ણાતોનું માનવું છે કે આ ડિજિટલ પ્લેટફોર્મ હવે બાળકો અને કિશોરો માટે નવા પ્રકારનું જોખમ બની રહ્યા છે.
ડ્રગ્સ, માનવ તસ્કરી અને વન્યજીવોના ગેરકાયદે વેપારમાં પણ વધારો
UNની રિપોર્ટ અનુસાર, AI આધારિત ટેક્નોલોજી માત્ર સાયબર ગુનાઓ પૂરતી મર્યાદિત નથી રહી પરંતુ તેનો ઉપયોગ ડ્રગ્સ, માનવ તસ્કરી અને વન્યજીવોના ગેરકાયદે વેપારમાં પણ થઈ રહ્યો છે.
અંદાજ મુજબ દક્ષિણ-પૂર્વ એશિયા અને આસપાસના વિસ્તારોમાં માદક પદાર્થોનો ગેરકાયદે વેપાર હવે 109 અબજ ડોલર સુધી પહોંચી ગયો છે. ગુનાહિત ગેંગો ચીની ચાના નામે લેટિન અમેરિકાથી ઇન્ડોનેશિયા, મલેશિયા અને ફિલિપાઈન્સ જેવા દેશોમાં નશીલા પદાર્થોની હેરફેર કરી રહ્યા છે. આ જ નેટવર્ક વન્યજીવો અને નાના હથિયારોની તસ્કરીમાં પણ સક્રિય હોવાનું રિપોર્ટમાં જણાવાયું છે.
AI આધારિત ડીપફેક અને એન્ક્રિપ્ટેડ પ્લેટફોર્મથી વધી રહ્યો છે ખતરો
રિપોર્ટમાં જણાવાયું છે કે આંતરરાષ્ટ્રીય ગુનાહિત ગેંગોએ સરહદ પાર નાણાકીય અને ટેક્નોલોજીકલ નેટવર્ક તૈયાર કરી દીધા છે, જેના કારણે સંગઠિત ગુનાખોરી વધુ મજબૂત બની રહી છે. ક્રિપ્ટોકરન્સી દ્વારા નાણાંની લેવડદેવડ, એન્ક્રિપ્ટેડ કમ્યુનિકેશન પ્લેટફોર્મ દ્વારા ગુપ્ત સંચાર અને જનરેટિવ AI દ્વારા અનેક ભાષાઓમાં વિશ્વસનીય ફિશિંગ અભિયાન ચલાવવામાં આવી રહ્યા છે.
રિયલ-ટાઈમ ડીપફેક વીડિયો અને AI આધારિત છેતરપિંડીને કારણે સામાન્ય લોકો માટે નકલી અને સાચી માહિતી વચ્ચેનો ભેદ પારખવો વધુ મુશ્કેલ બનતો જઈ રહ્યો છે. નિષ્ણાતોનું માનવું છે કે જો ટેક્નોલોજીના દુરુપયોગ સામે વૈશ્વિક સ્તરે કડક કાર્યવાહી નહીં કરવામાં આવે તો આગામી વર્ષોમાં સાયબર ગુનાઓમાં વધુ વધારો થઈ શકે છે.
