Ahmedabad News: અમદાવાદમાં ગેરકાયદેસર બાંધકામો સામે અમદાવાદ મ્યુનિસિપલ કોર્પોરેશન (AMC)એ વધુ એક કડક કાર્યવાહી હાથ ધરી છે. શહેરના દક્ષિણ ઝોન હેઠળ આવતા વટવા વિસ્તારમાં ગેરકાયદેસર ઔદ્યોગિક બાંધકામોને તોડી પાડવામાં આવ્યા છે. AMCની આ કાર્યવાહીથી ગેરકાયદેસર દબાણો કરનારાઓમાં હડકંપ મચી ગયો છે. મ્યુનિસિપલ તંત્ર દ્વારા અગાઉથી નોટિસ આપ્યા બાદ પણ નિયમોનું પાલન ન કરનારાઓ સામે કડક વલણ અપનાવવામાં આવ્યું હતું. વટવા વિસ્તારમાં ગેરકાયદેસર રીતે ઉભા કરાયેલા ઔદ્યોગિક શેડ અને બાંધકામોને દૂર કરીને સરકારી જમીન તથા ટાઉન પ્લાનિંગ હેઠળના વિસ્તારોને ફરી ખુલ્લા કરવામાં આવ્યા છે. AMCએ સ્પષ્ટ સંદેશ આપ્યો છે કે શહેરમાં ગેરકાયદેસર બાંધકામો અને દબાણો સામે હવે સતત ઝુંબેશ ચાલુ રહેશે.
વટવામાં ગેરકાયદેસર ઔદ્યોગિક બાંધકામો પર કાર્યવાહી
માહિતી મુજબ, AMCના સાઉથ ઝોન એસ્ટેટ વિભાગ દ્વારા વટવા (નૉર્થ) વોર્ડ વિસ્તારમાં રઘુવીર એસ્ટેટ ખાતે ગેરકાયદેસર રીતે ઉભા કરાયેલા આશરે 1,120 ચોરસ ફૂટ જેટલા ઔદ્યોગિક બાંધકામને તોડી પાડવામાં આવ્યું. અધિકારીઓએ અગાઉથી નોટિસ આપ્યા બાદ સમયમર્યાદા પૂર્ણ થતાં કાર્યવાહી હાથ ધરી હતી.
લાંભા વિસ્તારમાં પણ દબાણો દૂર
માત્ર વટવા જ નહીં પરંતુ નજીકના લાંભા વિસ્તારમાં પણ AMCએ દબાણ હટાવવાની ઝુંબેશ ચલાવી હતી. અહીં બળિયાદેવ મંદિર નજીક જાહેર જગ્યાઓ પર ગેરકાયદેસર રીતે ઉભા કરાયેલા કાચા-પક્કા શેડ અને માળખાં દૂર કરવામાં આવ્યા. આ કામગીરી દરમિયાન અનેક ગેરકાયદેસર વસાહતો અને વેપારી દબાણો સામે કાર્યવાહી કરાઈ હોવાનું સામે આવ્યું છે.
ટાઉન પ્લાનિંગ રોડને ખુલ્લો કરવામાં આવ્યો
AMC દ્વારા શહેરના વિકાસ કાર્યોને ધ્યાનમાં રાખીને ટાઉન પ્લાનિંગ (TP) યોજના હેઠળની 12 મીટર પહોળી રોડ પરના અવરોધો પણ દૂર કરવામાં આવ્યા. સરદાર પટેલ રિંગ રોડ નજીકના વિસ્તારોમાં જાહેર ઉપયોગ માટે ફાળવાયેલા પ્લોટને પણ દબાણમુક્ત કરાયા છે, જેથી ભવિષ્યમાં વિકાસકાર્યો સરળતાથી આગળ વધી શકે.
ગેરકાયદેસર બાંધકામો સામે AMCનું કડક વલણ
અમદાવાદમાં છેલ્લા કેટલાક મહિનાઓથી AMC દ્વારા ગેરકાયદેસર દબાણો સામે સતત અભિયાન ચલાવવામાં આવી રહ્યું છે. ખાસ કરીને વટવા અને આસપાસના વિસ્તારોમાં તળાવો, જાહેર રસ્તા અને સરકારી જમીન પર થયેલા દબાણો સામે તંત્ર વધુ સક્રિય બન્યું છે. અગાઉ પણ મોટા પાયે ગેરકાયદેસર માળખાં દૂર કરવાની કામગીરી હાથ ધરાઈ હતી.
