અમદાવાદના પોશ વિસ્તારમાં પૈસા માટે ફુવાનું ઢીમ ઢાળ્યું : ભત્રીજાની ઉદપુરથી અટકાયત

અમદાવાદ શહેરમાં ગુનાખોરીની ઘટનાઓ વચ્ચે હવે શીલજ વિસ્તારમાંથી એક ચોંકાવનારો હત્યાકાંડ સામે આવ્યો છે. બોપલ પોલીસ સ્ટેશનની હદમાં આવેલા શીલજના અવનીશ હાઈટ્સ એપાર્ટમેન્ટમાંથી એક આધેડનો હત્યા કરાયેલો મૃતદેહ મળી આવતા સમગ્ર વિસ્તારમાં ચકચાર મચી ગઈ હતી. તપાસ દરમિયાન સામે આવ્યું છે કે મૃતકની હત્યા તેમના જ ભત્રીજાએ પૈસાની બાબતે કરી હતી. પોલીસે ગણતરીના કલાકોમાં આરોપીની રાજસ્થાનના ઉદયપુરમાંથી અટકાયત કરીને કેસનો ભેદ ઉકેલી નાખ્યો છે.

મૃતકની ઓળખ મનીષ ચોકસી તરીકે થઈ છે. તેઓ પોતાના પુત્ર અને ભત્રીજા વ્રજ સાથે શીલજ સ્થિત ફ્લેટમાં રહેતા હતા. ઘટનાની જાણ થતા બોપલ પોલીસ, એફએસએલ ટીમ અને ડોગ સ્ક્વોડ ઘટના સ્થળે પહોંચી તપાસ શરૂ કરી હતી. મૃતદેહ પર ખાસ કરીને મોઢાના ભાગે ગંભીર ઇજાના નિશાન જોવા મળ્યા હતા, જેને આધારે પ્રાથમિક તપાસમાં હત્યાની આશંકા મજબૂત બની હતી.

મૃતદેહ મળ્યા બાદથી ભત્રીજો હતો ગુમ

પોલીસ તપાસ દરમિયાન એક મહત્વની બાબત સામે આવી કે મૃતક મનીષભાઈનો ભત્રીજો વ્રજ ઘટના બાદથી ગુમ હતો. પોલીસ દ્વારા સંપર્ક કરવાનો પ્રયાસ છતાં તેનો ફોન બંધ આવી રહ્યો હતો અને કોઈ માહિતી મળી રહી નહોતી. આ શંકાના આધારે પોલીસે વ્રજની શોધખોળ શરૂ કરી હતી.

પ્રાથમિક માહિતી મુજબ મનીષભાઈ થોડા દિવસ પહેલાં જ પોતાના ભત્રીજા વ્રજને પોતાની પાસે રહેવા માટે લાવ્યા હતા. છેલ્લા લગભગ 10 દિવસથી વ્રજ તેમની સાથે જ રહેતો હતો. જોકે, ઘટનાના દિવસે મનીષભાઈનો મૃતદેહ ફ્લેટમાંથી મળતા અને વ્રજ ગાયબ હોવાને કારણે પોલીસનું ધ્યાન તેની તરફ કેન્દ્રિત થયું હતું.

તપાસ દરમિયાન પોલીસને જાણવા મળ્યું કે હત્યા બાદ આરોપી ઘરમાંથી અંદાજે પાંચ લાખ રૂપિયા લઈને ફરાર થઈ ગયો હતો. આ માહિતી મળ્યા બાદ પોલીસે વિવિધ ટેકનિકલ સર્વેલન્સ, મોબાઈલ લોકેશન અને માનવ ગુપ્તચર નેટવર્કના આધારે તેની શોધખોળ તેજ કરી હતી.
ક્યારથી થશે વરસાદનું આગમન? હવામાન વિભાગે આપી તારીખ: ગુજરાત સહિત 4 રાજ્યોને ગરમી અંગે આપવામાં આવી મોટી ચેતવણી

ઉદયપુરથી આરોપીની અટકાયત

બોપલ પોલીસે ઝડપી કાર્યવાહી કરતાં આરોપી વ્રજને રાજસ્થાનના ઉદયપુરમાંથી ઝડપી પાડ્યો હતો. પોલીસે તેની અટકાયત કર્યા બાદ હવે અમદાવાદ લાવી વધુ પૂછપરછ શરૂ કરી છે. પ્રાથમિક પૂછપરછમાં પૈસાની લેતીદેતી અને પારિવારિક વિવાદ હત્યાનું મુખ્ય કારણ હોવાનું સામે આવી રહ્યું છે.

પોલીસ સૂત્રો મુજબ આરોપી અને મૃતક વચ્ચે છેલ્લા કેટલાક દિવસોથી આર્થિક મુદ્દે તણાવ ચાલી રહ્યો હતો. પોલીસ હવે આરોપીએ હત્યા માટે કયા હથિયારનો ઉપયોગ કર્યો હતો, ઘટનાના સમયે ઘરમાં કોણ હાજર હતું અને હત્યા પૂર્વે કોઈ ઝઘડો થયો હતો કે નહીં તે દિશામાં પણ તપાસ કરી રહી છે.

એફએસએલ અને ડોગ સ્ક્વોડની મદદથી તપાસ

ઘટનાની ગંભીરતા જોતા પોલીસે એફએસએલ ટીમ અને ડોગ સ્ક્વોડને પણ તપાસમાં જોડ્યા હતા. ફ્લેટમાંથી ફોરેન્સિક પુરાવા એકત્ર કરવામાં આવ્યા છે. પોલીસને ઘટના સ્થળેથી કેટલીક મહત્વપૂર્ણ વસ્તુઓ પણ મળી હોવાનું જાણવા મળી રહ્યું છે, જેને તપાસ માટે મોકલવામાં આવી છે.

ફોરેન્સિક તપાસના આધારે મૃત્યુનો ચોક્કસ સમય અને હત્યાની પદ્ધતિ અંગે વધુ સ્પષ્ટતા થવાની શક્યતા છે. સાથે જ પોલીસે ફ્લેટની આસપાસના CCTV ફૂટેજ પણ કબજે કર્યા છે, જેમાં આરોપીની હલચલ અંગે મહત્વપૂર્ણ માહિતી મળવાની આશા વ્યક્ત કરવામાં આવી રહી છે.
ક્યારથી થશે વરસાદનું આગમન? હવામાન વિભાગે આપી તારીખ: ગુજરાત સહિત 4 રાજ્યોને ગરમી અંગે આપવામાં આવી મોટી ચેતવણી

અમદાવાદમાં વધતી ગુનાખોરીને લઈને ફરી પ્રશ્નો

આ ઘટના બાદ અમદાવાદ શહેરમાં વધતી હત્યા અને હિંસક ગુનાખોરી અંગે ફરી ચર્ચા શરૂ થઈ છે. ખાસ કરીને નજીકના સંબંધોમાંથી જ હત્યાના બનાવો સામે આવતા સામાજિક અને માનસિક તણાવ અંગે પણ પ્રશ્નો ઉઠી રહ્યા છે.

તાજેતરના સમયમાં અમદાવાદ અને આસપાસના વિસ્તારોમાં પારિવારિક ઝઘડા, આર્થિક વિવાદ અને અંગત અદાવતમાં હત્યાના બનાવોમાં વધારો નોંધાયો છે. પોલીસ અધિકારીઓનું માનવું છે કે નાની બાબતોમાં વધી રહેલી આક્રમકતા અને આર્થિક દબાણ ઘણા ગુનાઓ પાછળનું મહત્વનું કારણ બની રહ્યા છે.

હાલ બોપલ પોલીસે આરોપી સામે હત્યાનો ગુનો નોંધીને આગળની કાર્યવાહી શરૂ કરી છે. આરોપીની વધુ પૂછપરછ બાદ કેસમાં વધુ ખુલાસા થવાની શક્યતા વ્યક્ત કરવામાં આવી રહી છે.