અમદાવાદ: શહેરના પોશ ગણાતા સેટેલાઈટ વિસ્તારમાં ભારે વરસાદ બાદ સોમવારે એક ગંભીર ઘટના સામે આવી છે. વિસ્તારમાં અચાનક આરસીસી (RCC) રોડનો મોટો ભાગ ધસી પડતાં અંદાજે 20 ફૂટ જેટલો ઊંડો ભૂવો સર્જાયો હતો. આ સમયે રોડની બાજુમાં પાર્ક કરાયેલી એક કાર સીધી જ ખાડામાં ખાબકી ગઈ હતી. સદનસીબે ઘટનાના સમયે કારમાં કોઈ વ્યક્તિ હાજર ન હોવાથી જાનહાનિ ટળી હતી, પરંતુ ઘટનાએ સ્થાનિકોમાં ભારે ચિંતા અને ભયનો માહોલ સર્જ્યો છે.
ભૂવો પડતાં અંડર કન્સ્ટ્રક્શન સાઇટને પણ મોટું નુકસાન
ભૂવો પડવાની સાથે જ તેની બાજુમાં આવેલી અંડર કન્સ્ટ્રક્શન બિલ્ડિંગ સાઇટને પણ ભારે નુકસાન પહોંચ્યું હતું. બિલ્ડર દ્વારા સાઇટની સુરક્ષા માટે બનાવવામાં આવેલી પ્રોટેક્શન વોલ અચાનક ધરાશાયી થઈ ગઈ હતી, જ્યારે સાઇટને ઘેરીને લગાવવામાં આવેલા પતરા પણ તૂટી પડ્યા હતા. ઘટનાના દ્રશ્યો જોઈ સ્થાનિક લોકોમાં ગભરાટ ફેલાઈ ગયો હતો અને આસપાસના વિસ્તારમાં લોકોની ભીડ એકત્ર થઈ હતી.
ડ્રેનેજ લાઇનમાં લીકેજ બન્યું હોવાની પ્રાથમિક માહિતી
પ્રાથમિક માહિતી અનુસાર, અંડર કન્સ્ટ્રક્શન સાઇટ પાસેથી પસાર થતી ડ્રેનેજ લાઇનમાં અગાઉથી જ ભંગાણ સર્જાયું હતું. છેલ્લા કેટલાક દિવસોથી પડેલા વરસાદને કારણે આ લાઇનમાં પાણીનું દબાણ વધી ગયું હતું. પરિણામે રોડની નીચેની માટી ધીમે ધીમે ધોવાઈ ગઈ અને અંદરથી ખોખલી બની ગઈ હતી. અંતે રોડનું ભારણ સહન ન થતાં આખો આરસીસી રોડ ધસી પડ્યો અને વિશાળ ભૂવો સર્જાયો.
સ્થાનિકોની ફરિયાદ છતાં તંત્રએ ન લીધા સમયસર પગલાં
સ્થાનિક રહિશોના જણાવ્યા મુજબ, ડ્રેનેજ લાઇનમાં લીકેજ અને રોડની નીચે ધસારો થવાની સમસ્યા અંગે અગાઉ અનેક વખત સંબંધિત વિભાગોને રજૂઆત કરવામાં આવી હતી. તેમ છતાં સમસ્યાના કાયમી નિરાકરણ માટે કોઈ અસરકારક કાર્યવાહી કરવામાં આવી ન હતી. સ્થાનિકોનો આક્ષેપ છે કે જો સમયસર સમારકામ કરવામાં આવ્યું હોત તો આજે આવી ગંભીર ઘટના ટાળી શકાય તેમ હતી.
ઘટનાસ્થળે તંત્ર દોડી આવ્યું, વિસ્તારને કરાયો બેરિકેડ
ઘટનાની જાણ થતાં જ અમદાવાદ મહાનગરપાલિકાના અધિકારીઓ, ફાયર બ્રિગેડની ટીમ અને પોલીસ કાફલો ઘટનાસ્થળે પહોંચી ગયો હતો. સુરક્ષાના ભાગરૂપે સમગ્ર વિસ્તારને બેરિકેડ કરીને વાહનવ્યવહાર પર નિયંત્રણ મૂકવામાં આવ્યું છે. ખાડામાં પડેલી કારને બહાર કાઢવા માટે ક્રેન સહિતના સાધનો મંગાવવામાં આવ્યા હતા. સાથે જ આસપાસના રોડ અને જમીનની સ્થિરતાની પણ તપાસ શરૂ કરવામાં આવી છે.
નિષ્ણાતોની ટીમ કરશે તકનિકી તપાસ
મહાનગરપાલિકા દ્વારા સમગ્ર ઘટનાની તકનિકી તપાસ હાથ ધરવામાં આવી રહી છે. રોડ ધસી પડવાનું ચોક્કસ કારણ, ડ્રેનેજ લાઇનની સ્થિતિ, અંડર કન્સ્ટ્રક્શન સાઇટની કામગીરી અને પ્રોટેક્શન વોલની ગુણવત્તા સહિતના મુદ્દાઓની તપાસ માટે નિષ્ણાતોની ટીમને જવાબદારી સોંપવામાં આવી છે. તપાસના આધારે જો કોઈ બેદરકારી સામે આવશે તો સંબંધિત જવાબદારો સામે કાર્યવાહી કરવામાં આવશે તેવી શક્યતા છે.
વરસાદી મોસમમાં વધતી આવી ઘટનાઓ ચિંતાજનક
આ પણ વાંચો: જૈશ-એ-મહોમ્મદ કનેક્શનની તપાસ તેજ : મુદ્દસીર ગાજીવાલા અને અહેમદ અબ્દુલ ગાજીવાલાના ઘરે ત્રાટકી ગુજરાત ATS
અમદાવાદમાં દર વર્ષે ચોમાસા દરમિયાન રોડ ધસી પડવા, ભૂવા પડવા અને ડ્રેનેજ સંબંધિત સમસ્યાઓના બનાવો સામે આવતા રહે છે. શહેરમાં ચાલી રહેલા ઇન્ફ્રાસ્ટ્રક્ચર વિકાસ અને અંડરગ્રાઉન્ડ યુટિલિટી લાઇનો વચ્ચે યોગ્ય સંકલનના અભાવ અંગે વારંવાર પ્રશ્નો ઉઠતા રહ્યા છે. સેટેલાઈટ જેવી પોશ વસાહતમાં બનેલી આ ઘટના બાદ ફરી એકવાર શહેરી માળખાકીય સુરક્ષા, ડ્રેનેજ સિસ્ટમની જાળવણી અને વિકાસકાર્યોની ગુણવત્તા અંગે ચર્ચા શરૂ થઈ છે.
