Ahmedabad Rath Yatra 2026: અષાઢી બીજના પાવન પર્વે ભગવાન જગન્નાથજીની 149મી રથયાત્રાને લઈને સમગ્ર અમદાવાદ આજે ભક્તિમય વાતાવરણમાં રંગાઈ ગયું છે. શહેરના રસ્તાઓ પર વહેલી સવારથી જ "જય જગન્નાથ"ના જયઘોષ ગુંજી રહ્યા છે અને ભગવાનના દર્શન માટે લાખો શ્રદ્ધાળુઓ ઉમટી પડ્યા છે. ઐતિહાસિક જગન્નાથ મંદિરેથી પરંપરાગત વિધિ-વિધાન સાથે શરૂ થયેલી રથયાત્રા શહેરના વિવિધ વિસ્તારોમાંથી પસાર થઈ રહી છે, જ્યાં દરેક સમાજ અને દરેક વર્ગના લોકો ભગવાનના સ્વાગત માટે આતુર જોવા મળી રહ્યા છે. 149 વર્ષથી સતત ચાલી આવતી આ રથયાત્રા માત્ર ધાર્મિક પરંપરા પૂરતી મર્યાદિત નથી રહી, પરંતુ અમદાવાદની સાંસ્કૃતિક ઓળખ, સામાજિક એકતા અને સેવાભાવનું જીવંત પ્રતિક બની ગઈ છે. દર વર્ષે લાખો લોકો આ યાત્રાના સાક્ષી બને છે અને ભગવાન જગન્નાથ, બહેન સુભદ્રા તથા ભાઈ બલરામના દર્શન કરીને ધન્યતા અનુભવે છે. આ વર્ષે પણ સમગ્ર રૂટ પર ભક્તોમાં અદભૂત ઉત્સાહ જોવા મળી રહ્યો છે. હાલમાં ભગવાન જગન્નાથજીની રથયાત્રા જામાલપુર દરવાજાથી અખાડા પગથિયા તરફ આગળ વધી રહી છે. માર્ગ પર બંને બાજુ હજારો ભક્તો ભગવાનના દર્શન માટે ઊભા રહી ફૂલવર્ષા કરી રહ્યા છે. વિવિધ ધાર્મિક, સામાજિક અને સેવાકીય સંસ્થાઓ દ્વારા ઠંડા પીણાં, પાણી, છાશ અને પ્રસાદનું વિતરણ પણ કરવામાં આવી રહ્યું છે, જેના કારણે સમગ્ર શહેરમાં ઉત્સવનો માહોલ સર્જાયો છે.
લોખંડી સુરક્ષા વચ્ચે શાંતિપૂર્ણ રીતે આગળ વધી રહી છે રથયાત્રા
રથયાત્રાને ધ્યાનમાં રાખીને અમદાવાદ પોલીસ દ્વારા અભૂતપૂર્વ સુરક્ષા વ્યવસ્થા ગોઠવવામાં આવી છે. સમગ્ર રૂટ પર હજારો પોલીસ કર્મચારીઓ, SRP, RAF, ક્વિક રિસ્પોન્સ ટીમ, બોમ્બ ડિસ્પોઝલ સ્ક્વોડ અને ડોગ સ્ક્વોડ તૈનાત કરવામાં આવ્યા છે. સંવેદનશીલ વિસ્તારોમાં ડ્રોન અને સીસીટીવી કેમેરા દ્વારા સતત નજર રાખવામાં આવી રહી છે. લપોલીસ અધિકારીઓ સતત સમગ્ર રૂટનું મોનિટરિંગ કરી રહ્યા છે, જેથી કોઈપણ અનિચ્છનીય ઘટના ન બને અને રથયાત્રા શાંતિપૂર્ણ વાતાવરણમાં પૂર્ણ થઈ શકે. ટ્રાફિક વિભાગ દ્વારા પણ વૈકલ્પિક માર્ગોની વ્યવસ્થા કરવામાં આવી છે, જેથી શહેરમાં વાહનવ્યવહાર સરળતાથી ચાલુ રહી શકે.
ભગવાનના મોસાળ સરસપુરમાં ભક્તિમય માહોલ
રથયાત્રાનું સૌથી મહત્વપૂર્ણ અને ભાવનાત્મક સ્થળ એટલે ભગવાન જગન્નાથનું મોસાળ ગણાતું સરસપુર. વર્ષોથી ચાલતી પરંપરા મુજબ ભગવાન જગન્નાથ પોતાની માસીના ઘરે પધારે છે અને અહીં તેમનું વિશેષ સ્વાગત કરવામાં આવે છે. આ પરંપરાને કારણે સરસપુરનું સ્થાન માત્ર અમદાવાદમાં જ નહીં પરંતુ સમગ્ર ગુજરાતના ભક્તોમાં વિશેષ મહત્વ ધરાવે છે. આ વર્ષે પણ સરસપુરની દરેક પોળ, દરેક શેરી અને દરેક મંદિરને રંગોળી, ફૂલોના શણગાર અને ધાર્મિક સજાવટથી સુશોભિત કરવામાં આવ્યા છે. સ્થાનિક લોકો છેલ્લા એક મહિનાથી ભગવાનના આગમનની તૈયારીઓમાં દિવસ-રાત વ્યસ્ત રહ્યા છે. સમગ્ર વિસ્તાર ભક્તિ અને સેવાભાવથી છલકાઈ રહ્યો છે.
26 સ્થળોએ ધમધમતા રસોડા, હજારો સ્વયંસેવકો સેવામાં વ્યસ્ત
સરસપુરમાં ભગવાનના આગમન નિમિત્તે કુલ 26 સ્થળોએ વિશાળ રસોડા શરૂ કરવામાં આવ્યા છે. મોટી સાળવી વાડ, લુહાર શેરી, કડિયા વાડ, પીપળા પોળ, લીમડા પોળ સહિત અનેક વિસ્તારોમાં વહેલી સવારથી જ મહાપ્રસાદ તૈયાર કરવાની કામગીરી શરૂ થઈ ગઈ છે. આ રસોડાઓમાં માત્ર ભોજન બનાવવાનું જ નહીં, પરંતુ પ્રસાદનું પેકિંગ, વિતરણ અને ભક્તોને સુવિધા મળી રહે તેની સંપૂર્ણ વ્યવસ્થા પણ કરવામાં આવી છે. ખલાસી સમાજના સભ્યો, સાધુ-સંતો, અખાડાના સભ્યો અને સામાન્ય ભક્તો માટે અલગ-અલગ વ્યવસ્થાઓ ઉભી કરવામાં આવી છે. આ સમગ્ર આયોજનમાં મહિલાઓ, યુવાનો, વડીલો અને બાળકો સહિત હજારો સ્વયંસેવકો કોઈપણ પ્રકારના ભેદભાવ વિના સેવા આપી રહ્યા છે. દરેક વ્યક્તિ માટે આ સેવા ભગવાનની ભક્તિ સમાન માનવામાં આવે છે.
આ પણ વાંચો: અમદાવાદ રથયાત્રા દરમિયાન પ્રતિબંધ છતાં ઉડ્યા બે ડ્રોન : એન્ટી-ડ્રોન સિસ્ટમ થઈ સક્રિય, પોલીસે ડ્રોન ઉતરાવાયા
એક જ પોળમાં 30 હજાર ભક્તો માટે જમણવાર
મોટી સાળવી વાડમાં દર વર્ષની જેમ આ વર્ષે પણ સૌથી વિશાળ જમણવારનું આયોજન કરવામાં આવ્યું છે. આયોજકો નરસિંહ પટેલ અને જનક પટેલના જણાવ્યા મુજબ માત્ર એક જ પોળમાં અંદાજે 25 હજારથી 30 હજાર ભક્તો માટે મહાપ્રસાદ તૈયાર કરવામાં આવી રહ્યો છે. આ આયોજનને સફળ બનાવવા માટે 200થી વધુ સ્વયંસેવકો સતત કામગીરી કરી રહ્યા છે. રસોડામાં સવારથી મોડી રાત સુધી સતત ભોજન તૈયાર કરવાની પ્રક્રિયા ચાલે છે. રસોઈ બનાવવાથી લઈને ભોજન પીરસવા સુધીની દરેક જવાબદારી અલગ-અલગ ટીમોને સોંપવામાં આવી છે.
હજારો કિલો સામગ્રીથી તૈયાર થઈ રહ્યો છે મહાપ્રસાદ
લાખો ભક્તોને મહાપ્રસાદ મળી રહે તે માટે વિશાળ પ્રમાણમાં ખાદ્યસામગ્રીનો ઉપયોગ કરવામાં આવી રહ્યો છે. અંદાજે 1800 કિલો બુંદી, 1800 કિલો ફૂલવડી, 1500 કિલો બટાકાનું શાક અને 2500 કિલો લોટમાંથી પૂરી તૈયાર કરવામાં આવી રહી છે. તે ઉપરાંત ભોજન બનાવવા માટે આશરે 60 ડબા જેટલા તેલનો ઉપયોગ થઈ રહ્યો છે. રસોડામાં એક સાથે અનેક મોટા કડાહોમાં શાક અને બુંદી તૈયાર કરવામાં આવી રહી છે, જ્યારે સેંકડો મહિલાઓ અને સ્વયંસેવકો સતત પૂરી બનાવવામાં વ્યસ્ત જોવા મળી રહ્યા છે. આ આયોજન પાછળ માત્ર ભોજન પીરસવાનો હેતુ નથી, પરંતુ ભગવાનના મોસાળમાં આવનાર દરેક ભક્તને પ્રેમ, સ્નેહ અને સેવાભાવનો અનુભવ કરાવવાનો પણ પ્રયાસ કરવામાં આવે છે.
149 વર્ષની પરંપરા આજે પણ એટલી જ જીવંત
ભગવાન જગન્નાથની રથયાત્રાનો ઇતિહાસ લગભગ દોઢ સદી જેટલો જૂનો છે. સમય બદલાયો, શહેર બદલાયું અને વ્યવસ્થાઓ આધુનિક બની, છતાં ભગવાનના મોસાળ સરસપુરની પરંપરા આજે પણ એટલી જ જીવંત છે. સ્થાનિક પરિવારો પેઢી દર પેઢી આ સેવાકાર્ય સાથે જોડાયેલા રહ્યા છે. અનેક પરિવારો એવા છે કે જેમના પૂર્વજો પણ આ આયોજનમાં સેવા આપતા હતા અને આજે તેમની નવી પેઢી પણ એ જ પરંપરાને આગળ વધારી રહી છે. આ કારણે રથયાત્રા માત્ર ધાર્મિક કાર્યક્રમ નહીં પરંતુ સામાજિક એકતા અને સાંસ્કૃતિક વારસાનું પણ પ્રતિક બની ગઈ છે.
આ પણ વાંચો: આજે રથયાત્રાના દિવસે અમદાવાદમાં વરસશે મેઘરાજા? : હવામાન વિભાગે કરી મોટી આગાહી
ભક્તોમાં અનેરો ઉત્સાહ, માર્ગો પર ઉમટ્યો માનવમેદનીનો પ્રવાહ
રથયાત્રાના રૂટ પર જ્યાં નજર કરો ત્યાં ભક્તોની ભીડ જોવા મળી રહી છે. ભગવાનના દર્શન કરવા માટે લોકો કલાકો પહેલાંથી જ રસ્તાની બંને બાજુ ઊભા રહી ગયા હતા. અનેક સ્થળોએ ભગવાનના રથ પર ફૂલવર્ષા કરવામાં આવી રહી છે, જ્યારે બાળકો, યુવાનો અને વૃદ્ધો સૌ ભક્તિભાવ સાથે ભગવાનના દર્શન કરી રહ્યા છે. લસામાજિક સંસ્થાઓ દ્વારા પાણી, છાશ, શરબત અને આરોગ્ય સેવાઓની પણ વ્યવસ્થા કરવામાં આવી છે. ગરમીને ધ્યાનમાં રાખીને મેડિકલ ટીમો અને એમ્બ્યુલન્સ પણ સતત તૈનાત રાખવામાં આવી છે.
આસ્થાની સાથે સેવાભાવનું અનોખું ઉદાહરણ
અમદાવાદની જગન્નાથ રથયાત્રાની સૌથી મોટી વિશેષતા એ છે કે, અહીં માત્ર ભગવાનના દર્શન જ નહીં, પરંતુ સેવાભાવની અનોખી પરંપરા પણ જોવા મળે છે. હજારો લોકો કોઈપણ અપેક્ષા વિના દિવસ-રાત સેવા આપે છે, લાખો ભક્તોને મહાપ્રસાદ પીરસે છે અને સમગ્ર આયોજનને સફળ બનાવે છે. 149મી રથયાત્રા ફરી એકવાર સાબિત કરી રહી છે કે, અમદાવાદની આ પરંપરા માત્ર એક ધાર્મિક યાત્રા નથી, પરંતુ ભક્તિ, સેવા, સામાજિક સમરસતા અને સાંસ્કૃતિક વારસાનું જીવંત પ્રતિક છે. ભગવાન જગન્નાથના આશીર્વાદ મેળવવા માટે ઉમટી પડેલા લાખો ભક્તો અને સરસપુરના મોસાળમાં થતી ભવ્ય સેવા આ ઐતિહાસિક પરંપરાની મહત્તાને વધુ ઉજાગર કરી રહી છે.
