અમદાવાદ: અમદાવાદ શહેરને નવા પોલીસ કમિશનર મળી ગયા છે. 1997 બેચના ગુજરાત કેડરના વરિષ્ઠ IPS અધિકારી અનુપમસિંહ ગેહલોતે આજે શાહીબાગ સ્થિત પોલીસ કમિશનરની કચેરી ખાતે વિધિવત રીતે અમદાવાદના નવા પોલીસ કમિશનર તરીકે કાર્યભાર સંભાળ્યો. પોલીસ કમિશનરની કચેરીમાં યોજાયેલા ચાર્જ હસ્તાંતરણ કાર્યક્રમ બાદ તેમણે સત્તાવાર રીતે અમદાવાદ પોલીસના વડા તરીકે જવાબદારી સંભાળી. ગુજરાતના પોલીસ મહાનિદેશક (DGP) તરીકે જી.એસ. મલિકની નિમણૂક બાદ છેલ્લા 25 દિવસથી અમદાવાદ પોલીસ કમિશનરની જગ્યા ખાલી હતી. હવે અનુપમસિંહ ગેહલોતની નિમણૂક થતાં શહેરના પોલીસ તંત્રને ફરીથી કાયમી નેતૃત્વ મળ્યું છે. તેમના કાર્યભાર સંભાળવાની સાથે જ શહેરમાં કાયદો અને વ્યવસ્થા, ટ્રાફિક મેનેજમેન્ટ અને આવનારી ઐતિહાસિક રથયાત્રાની સુરક્ષા જેવી મહત્વપૂર્ણ જવાબદારીઓ તેમના ખભા પર આવી છે.
સુરત અને વડોદરામાં સફળ કામગીરીનો અનુભવ
અનુપમસિંહ ગેહલોત ગુજરાત કેડરના અનુભવી IPS અધિકારી તરીકે ઓળખાય છે. તેઓ અગાઉ સુરત અને વડોદરાના પોલીસ કમિશનર તરીકે સફળતાપૂર્વક ફરજ બજાવી ચૂક્યા છે. બંને શહેરોમાં કાયદો અને વ્યવસ્થાની સ્થિતિ મજબૂત બનાવવા, સંગઠિત ગુનાઓ સામે કડક કાર્યવાહી કરવા તેમજ પોલીસ અને પ્રજા વચ્ચે વિશ્વાસ વધારવા માટે તેમની કામગીરીની પ્રશંસા થઈ હતી. અમદાવાદ જેવા રાજ્યના સૌથી મોટા મહાનગરની જવાબદારી હવે તેમના હાથમાં આવી છે. આગામી દિવસોમાં શહેરના સુરક્ષા માળખાને વધુ મજબૂત બનાવવાની સાથે આધુનિક પોલીસિંગને પ્રાધાન્ય આપવાની અપેક્ષા વ્યક્ત કરવામાં આવી રહી છે.
રથયાત્રા રહેશે પ્રથમ અને સૌથી મોટી જવાબદારી
કાર્યભાર સંભાળ્યા બાદ નવા પોલીસ કમિશનર અનુપમસિંહ ગેહલોતે જણાવ્યું કે અમદાવાદની ઐતિહાસિક ભગવાન જગન્નાથજીની રથયાત્રા હાલ તેમની પ્રથમ પ્રાથમિકતા રહેશે. દર વર્ષે લાખો શ્રદ્ધાળુઓ અને નાગરિકોની હાજરી વચ્ચે યોજાતી આ રથયાત્રા શાંતિપૂર્ણ અને સુરક્ષિત રીતે સંપન્ન થાય તે માટે પોલીસ દ્વારા વ્યાપક આયોજન કરવામાં આવશે. તેમણે કહ્યું કે શહેરની સુરક્ષા વ્યવસ્થા વધુ મજબૂત બનાવવા માટે તમામ વિભાગો વચ્ચે સંકલન વધારવામાં આવશે અને દરેક સંવેદનશીલ વિસ્તારો પર વિશેષ નજર રાખવામાં આવશે.
"કાયદામાં રહેશો તો ફાયદામાં રહેશો"
પોતાની પ્રથમ જાહેર પ્રતિક્રિયામાં અનુપમસિંહ ગેહલોતે સ્પષ્ટ સંદેશ આપ્યો કે કાયદો અને વ્યવસ્થા સાથે કોઈપણ પ્રકારનો ચેડો સહન કરવામાં આવશે નહીં. તેમણે કહ્યું કે, "કાયદામાં રહેશો તો ફાયદામાં રહેશો." જે લોકો કાયદાનું પાલન કરશે તેમને કોઈ મુશ્કેલી નહીં પડે, પરંતુ કાયદો ભંગ કરનાર સામે કડક અને નિષ્પક્ષ કાર્યવાહી કરવામાં આવશે. તેમણે ઉમેર્યું કે અસામાજિક તત્ત્વો, ગુનાખોરી અને કાયદો ભંગ કરવાના પ્રયાસો સામે અમદાવાદ પોલીસ ઝીરો ટોલરન્સની નીતિ અપનાવશે.
પ્રજાપ્રત્યે સંવેદનશીલ રહેશે પોલીસ
નવા પોલીસ કમિશનરે સ્પષ્ટ કર્યું કે પોલીસની કામગીરી માત્ર ગુનેગારો સામે કડક કાર્યવાહી કરવાની નથી, પરંતુ સામાન્ય નાગરિકોને સન્માન અને વિશ્વાસ આપવાની પણ છે. તેમણે જણાવ્યું કે દરેક પોલીસ કર્મચારીએ સામાન્ય નાગરિકો સાથે નમ્ર અને સન્માનજનક વર્તન કરવું જોઈએ. લોકો પોલીસ સ્ટેશન સુધી આવે ત્યારે તેમના પ્રશ્નોનું શક્ય હોય ત્યાં સુધી પોલીસ સ્ટેશન સ્તરે જ ઝડપી નિરાકરણ લાવવામાં આવશે. તેમણે પોલીસ અને પ્રજા વચ્ચે વિશ્વાસનું વાતાવરણ વધુ મજબૂત બનાવવાનો સંકલ્પ વ્યક્ત કર્યો.
આ પણ વાંચો: પૂરી રથયાત્રાની અસર વડોદરાવાસી પર : 26 દિવસ માટે રદ આ ટ્રેન રદ, દૈનિક હજારો મુસાફરો મુશ્કેલીમાં
ટ્રાફિક વ્યવસ્થામાં પણ આવશે સુધારા
અમદાવાદમાં છેલ્લા કેટલાક વર્ષોથી ટ્રાફિકનું દબાણ સતત વધી રહ્યું છે. નવા પોલીસ કમિશનરે જણાવ્યું કે ટ્રાફિક વ્યવસ્થાને વધુ સુચારૂ બનાવવા માટે વિશેષ આયોજન હાથ ધરવામાં આવશે. ટ્રાફિક નિયમોના અસરકારક અમલ, સ્માર્ટ ટ્રાફિક મેનેજમેન્ટ અને જાહેર જનજાગૃતિ દ્વારા શહેરમાં ટ્રાફિક સમસ્યાઓ ઘટાડવાના પ્રયાસો કરવામાં આવશે.
મીડિયાના સહયોગથી ઝડપી ઉકેલ
અનુપમસિંહ ગેહલોતે મીડિયા સાથેના સંવાદમાં જણાવ્યું કે મીડિયા અને પોલીસ બંને સમાજના હિત માટે કાર્ય કરે છે. મીડિયાના સહયોગથી લોકોના પ્રશ્નો સુધી ઝડપથી પહોંચી શકાય છે અને તેમના ઉકેલમાં પણ મદદ મળે છે. તેમણે વિશ્વાસ વ્યક્ત કર્યો કે મીડિયા સાથે સકારાત્મક સંકલન દ્વારા પોલીસ વધુ અસરકારક રીતે કામગીરી કરી શકશે.
આ પણ વાંચો: વડોદરામાં પરિવાર ગામડે ગયો અને તસ્કરો ઘરમાં ઘૂસ્યા : રોકડ, દાગીના સહિત લાખો ચોરી ફરાર
"અમદાવાદનું નામ ખરાબ ન થાય તે અમારી જવાબદારી"
કાર્યભાર સંભાળ્યા બાદ તેમણે એક મહત્વપૂર્ણ નિવેદન આપતાં કહ્યું કે, "અમદાવાદ શહેરનું નામ ખરાબ ન થાય તે અમારી સૌથી મોટી જવાબદારી છે." તેમણે જણાવ્યું કે શહેરની શાંતિ, સુરક્ષા અને કાયદો-વ્યવસ્થાને જાળવી રાખવા માટે પોલીસ સંપૂર્ણ પ્રતિબદ્ધ રહેશે. ગુનેગારો સામે કડક કાર્યવાહી કરવામાં આવશે, જ્યારે કાયદાનું પાલન કરતા સામાન્ય નાગરિકોને પોલીસ તરફથી સંપૂર્ણ સહકાર આપવામાં આવશે.
નવા નેતૃત્વ સાથે નવી અપેક્ષાઓ
અમદાવાદ રાજ્યનું સૌથી મહત્વપૂર્ણ મહાનગર હોવાને કારણે અહીં કાયદો-વ્યવસ્થા જાળવવી એક પડકારરૂપ જવાબદારી છે. આગામી દિવસોમાં ભગવાન જગન્નાથજીની ઐતિહાસિક રથયાત્રા, વધતું ટ્રાફિક, સાઇબર ક્રાઇમ, સંગઠિત ગુનાખોરી અને શહેરી સુરક્ષા જેવા અનેક મુદ્દાઓ પર નવા પોલીસ કમિશનરની કામગીરી પર સૌની નજર રહેશે.
અનુપમસિંહ ગેહલોતના અનુભવ, કડક વહીવટી અભિગમ અને પ્રજાપ્રત્યે સંવેદનશીલ વલણને ધ્યાનમાં લેતા શહેરમાં પોલીસિંગ વધુ અસરકારક બનશે તેવી અપેક્ષા વ્યક્ત થઈ રહી છે. હવે જોવાનું રહેશે કે તેમના નેતૃત્વ હેઠળ અમદાવાદ પોલીસ શહેરની સુરક્ષા અને જનવિશ્વાસને વધુ કેવી રીતે મજબૂત બનાવે છે.
અનુપમસિંહ ગેહલોતે ભદ્રકાળી માતાના કર્યા દર્શન
અમદાવાદના નવા પોલીસ કમિશનર તરીકે કાર્યભાર સંભાળ્યા બાદ IPS અધિકારી અનુપમસિંહ ગેહલોતે શહેરના ઐતિહાસિક ભદ્રકાળી માતા મંદિર ખાતે પહોંચી માતાજીના દર્શન કરી આશીર્વાદ મેળવ્યા. કાર્યભારના પ્રથમ દિવસે તેમણે શહેરની સુખ-શાંતિ, કાયદો-વ્યવસ્થા અને આવનારી ભગવાન જગન્નાથજીની રથયાત્રા નિર્વિઘ્ન અને શાંતિપૂર્ણ રીતે સંપન્ન થાય તે માટે પ્રાર્થના કરી હતી.
